မဲခေါင်၊ ဇန်နဝါရီ ၉
ဒိန်းမတ် အချုပ်အခြာ အာဏာပိုင် နယ်မြေအတွင်း တည်ရှိသည့် ဂရင်းလန်းကျွန်းသည် နေတိုးအဖွဲ့ အနာဂတ်အတွက် အသက်သွေးကြော ဖြစ်သောကြောင့် အမေရိကန်အောက် သွတ်သွင်းနိုင်ရန် သိမ်းပိုက်သွားဖွယ် ရှိသည်ဟု အမေရိကန်သမ္မတ ဒေါ်နယ်ထရမ့်က ပြောဆိုနေရာ အမေရိကန် အမှန်တကယ် ကျူးကျော်လာလျှင် ဒိန်းမတ်ဘက်က အမေးအမြန်းမရှိ ပစ်မိန့်ပေးထားကြောင်း သိရသည်။
ဒေါ်နယ်ထရမ့်သည် ဗင်နီဇွဲလားနိုင်ငံ ကာရာကက်စ်မြို့အတွင်း အင်အား အလုံးအရင်းဖြင့် ဝင်ရောက် စီးနင်းကာ သမ္မတမာဂျူရိုနှင့် ဇနီးကို ဖမ်းဆီးခဲ့ပြီးနောက် ထရမ့်၏ အရင်းနှီးဆုံး အစိုးရအကြီးအကဲ တစ်ဦးက ဂရင်းလန်းသည် အမေရိကန်၏ နောက်ထပ် ပစ်မှတ်ဟု လူမှုကွန်ရက်တွင် ရေးတင်ခဲ့သလို ထရမ့် ကိုယ်တိုင်ကလည်း ရုရှားနှင့် စစ်အင်အား ပြိုင်ဆိုင်မှု၌ ဂရင်းလန်းကျွန်းမှာ အခရာကျသည့် နေရာ ဖြစ်သောကြောင့် ဥရောပအောက်တွင် မထားဘဲ အမေရိကန် လက်အောက်တွင် ထားမည်ဟု ဆက်တိုက် ပြောဆိုနေခဲ့သည်။
ဒိန်းမတ်နိုင်ငံ၏ ၁၉၅၂ ခုနှစ်ကတည်းက ပြဌာန်းထားသော ဥပဒေတွင် အခြားနိုင်ငံမှ စစ်သားများ ကျူးကျော်ဝင် ရောက်လာပါက အမိန့် စောင့်စရာမလို၊ မေးမြန်းစရာမလို ပစ်ခတ်နိုင်ခွင့် ပေးထားသဖြင့် လက်ရှိ ဒိန်းမတ် စစ်တပ် သည်လည်း အမေရိကန် ကျူးကျော်လာလျှင် တန်ပြန် တိုက်ခိုက်သွားရန် သေချာနေသည်ဟု အစိုးရ အကြီးအကဲတစ်ဦးက ပြောသွားခဲ့သည်။
ကိုကလင်း
Ref: Thesun
#MeKongNews
#ဂရင်းလန်း
#ထရမ့်
#ဒိန်းမတ်
#သိမ်းပိုက်
