မဲခေါင်၊ ဇန်နဝါရီ ၇
နာမည်ကြီး ထိုင်းဒုရဲချုပ်ဟောင်း Big Joke ခေါ် ဆူရာချိတ်ဟက်ခ်ပန်းသည် ဒုစရိုက်သမားများထံမှ နှုတ်ပိတ်နေပေးရန် ပေးသည့် ရွှေချောင်များကို အမျိုးသားအကျင့်ပျက်ခြစားမှုတိုက်ဖျက်ရေးကော်မရှင်မှ ကော်မရှင်နာတစ်ဦးထံ လာဘ်ပေးလာဘ်ယူခွဲပေးနေသည့် ရုပ်သံနှင့် အသံမှတ်တမ်းများမှာ ခိုင်လုံမှုရှိသည်ဟုဆိုကာ နေ့စွဲအချိန်နှင့်တကွ ဇန်နဝါရီ ၆ ရက်၌ ရာဇဝတ်မှုနှိမ်နင်းရေးဌာနချုပ် (CSD) ထံ သက်သေများ တင်သွင်းခဲ့သည်။
၂၀၂၄ ဩဂုတ် ၃၁ ရက်နှင့် နိုဝင်ဘာ အကြား အလေးချိန်ပေါင်း ၂၄၆ ဘတ်ရှိသည့် ရွှေချောင်းများကို ဟက်ခ်ပန်း၏ ထိုစဉ်က တပည့် ရဲမှူးအဆင့်ရှိ ပါ့ခ်ဖူမီ ပီဆာမိုင်က NACC ကော်မရှင်နာ အက်ကာဝတ် ဝပ်ချာဝယ်လ်ကူထံသို့ ပေးရာတွင် ဝပ်ချာဝယ်လ်ကူ၏ တပည့် အထူးစုံစမ်းရေးမှူး ဆွန်ဘတ်သွန်သန် နှင့် ကားချင်းချိန်းဆိုတွေ့ဆုံပြီး ပေးခဲ့သည့် မှတ်တမ်းများကို အစိုးရသက်သေအဖြစ် ဖုန်းပြောသည့် အသံဖိုင်များ၊ ဗီဒီယိုဖိုင်များပါ တင်ပြခဲ့ခြင်းဖြစ်သည်။
ယခုအမှုကို ထိုင်းတော်ဝင်ရဲတပ်ဖွဲ့အကြီးအကဲများ၊ ဗဟိုစုံစမ်းထောက်လှမ်းရေးဗျူရို CSD တို့က သက်သေများ ခိုင်လုံသဖြင့် CSD ရုံးထံ လွှဲအပ်ပြီး ဆက်လက်စုံစမ်းအရေးယူသွားရေး တင်ပြရှင်းလင်းခဲ့ခြင်းဖြစ်သည်။
ဟက်ခ်ပန်းသည် NACC ကော်မရှင်နာအား ဒုစရိုက်သမားများထံမှ နောက်ထပ်ရမည့် လာဘ်ထိုးငွေများမှ အလေးချိန် ဘတ် ၂၀၀၀ ရှိ ရွှေများထပ်ဝယ်ပေးဦးမည်ဟု ပြောဆိုခဲ့သည့် အသံဖိုင်ပါ ရရှိပြီး လက် တွေ့တင်မှု အလေးချိန် ၂၆ ဘတ်ရှိ ရွှေချောင်းများသာ ပေးခဲ့သည်ဟု ဆိုသည်။
ဖော်ကောင်လုပ်သည့် ဟက်ခ်ပန်း၏ တပည့်ဟောင်း ပါ့ခ်ဖူမီက ယခုအမှုကို ဖော်ထုတ်ရခြင်းမှာ ဖခင်ကလည်း ရဲအရာရှိကြီး တစ်ဦးဖြစ်သောကြောင့် မျိုးရိုးသိက္ခာအတွက် လာဘ်စားမှုအား ဖော်ထုတ်ရန် ခိုင်းစေခြင်းနှင့် တခြား အကြောင်းများကြောင့် သက်သေများပါ တင်ပြခြင်းဖြစ်သည်ဟု ပြောဆိုထားသည်။
ကိုကလင်း
Ref: The Nation
#MeKongNews
#ထိုင်းနိုင်ငံ
#ရဲတပ်ဖွဲ့
#လာဘ်စားမှု
#ဒုစရိုက်မှု
