မဲခေါင်၊ ဇန်နဝါရီ ၆
ဒီဇင်ဘာ ၂၈ ရက်မှ စတင်ပြီး ကုန်စျေးနှုန်း ကြီးမြင့်လာခြင်းနှင့် ငွေကြေးတန်ဖိုး လျော့ကျလာခြင်းကြောင့် တီဟီရန်မြို့တော်ရှိ စျေးသည်များ စတင်ဆန္ဒပြရာမှ နိုင်ငံအတွင်း မြို့ပေါင်း ၂၀ ကျော် တွင် လူထုအုံကြွမှုကြီး ဖြစ်ပွားနေကာ ထိန်းမရသည့် အခြေအနေကြောင့် အီရန် ခေါင်းဆောင်အဖြစ် နှစ်ပေါင်းများစွာ မင်းမူ အုပ်ချုပ်နေသော ၈၆ နှစ်အရွယ် အလီခါမီနီသည် အနီးဆုံးမိသားစု အပေါင်းအပါ ၂၀ ဝန်းကျင်ဖြင့် မော်စကိုသို့ ထွက်ပြေးတော့မည် ဖြစ်ကြောင်း ထောက်လှမ်းရေး သတင်းရင်းမြစ်အရ သိရသည်။
စားသောက်ကုန် စျေးနှုန်းများ ၇၂ ရာခိုင်နှုန်း မြင့်တက်နေပြီး ငွေကြေး ဖောင်းပွမှုနှုန်းမှာ တစ်နှစ် အတွင်း ၄၂ ဒသမ၂ ရာခိုင်နှုန်း ရှိလာပြီ ဖြစ်သောကြောင့် အမျိုးသမီး၊ လူငယ်များမကျန် အီရန် ပြည်သူများက ခါမီနီ ဇာတ်သိမ်းပါစေ၊ အစိုးရကျဆုံးပါစေ ဆိုသော ကြွေးကြော်သံများဖြင့် ဆန္ဒပြသည့် အပြင် အစိုးရရုံးများ၊ ကားများကို မီးရှို့ ဖျက်ဆီးခြင်းနှင့် ခါမီနီပုံများ၊ အီရန်အလံများ မီးရှို့ ဆန္ဒပြမှုများ ပြင်းထန်လာနေသည်။
ယင်းဖြစ်ရပ်များအတွင်း အီရန် လုံခြုံရေးတပ်များက ဆန္ဒပြသူများကို ပစ်ခတ်ရာ အနည်းဆုံး ၁၂ ဦး သေဆုံးပြီး ကလေး ၃ ဦးပါဝင်ကာ ၅၀ ကျော် ဒဏ်ရာရခဲ့သည်။
အီရန်အနေဖြင့် ကိုယ့်ပြည်သူများကို ပြန်သတ်နေမည် ဆိုလျှင် စစ်ရေးအရ ဝင်ရောက် စွက်ဖက်ရမည်ဟု အမေရိကန်သမ္မတ ဒေါ်နယ်ထရမ့်က ရာဇသံ ပေးထားသေးရာ နောက်ဆုံးသော ထိန်းသိမ်း ဖျောင်းဖျမှုအဖြစ် အလွန် ကပ်စေးနှဲသော ခါမီနီသည် ပြည်သူများအား ထောက်ပံ့ငွေ ဘောက်ချာ ရီယယ် ၁၀ သန်းစီ ပေးမည်ဖြစ်ကာ ဆန္ဒပြမှုများ ရပ်ကြရန် ကမ်းလှမ်းခဲ့သည်။
သို့သော် အီရန်ငွေ ရီယယ် ၁၀ သန်းသည် စတာလင်ပေါင် ၅ ပေါင်ခွဲသာရှိကာ အီရန်လူဦးရေ သန်း ၈၀ က မည်သို့မျှ လက်မခံဘဲ အစွမ်းကုန် တိုက်ပွဲဝင်ရန် လမ်းပေါ် ထွက်လာနေကြပြီဖြစ်သည်။
စစ်တပ်နှင့် လုံခြုံရေးတပ်များသည် ပြည်သူ့အုံကြွမှုအား မထိန်းချုပ်နိုင်လျှင် သို့မဟုတ် မထိန်းချုပ်ပေးတော့လျှင် ခါမီနီအနေဖြင့် မည်သို့မျှ မနေသာတော့ဘဲ မဟာမိတ်ပူတင် အကူအညီဖြင့် မော်စကိုသို့ မိသားစု အပေါင်းအပါ ၂၀ ဝန်းကျင်ဖြင့် အတူထွက်ပြေးရန် စီစဉ်နေပြီ ဖြစ်ကြောင်း အီရန်တွင် အစ္စရေး ထောက်လှမ်းရေး အဖြစ် ၈ နှစ်ကြာ တာဝန်ထမ်းခဲ့သော အစ္စရေး ဝါရင့် ထောက်လှမ်းရေးဟောင်း ဘီနီဆက်ဘ်တီက ထုတ်ဖော် ပြောဆိုသွားခဲ့သည်။
ကိုကလင်း
Ref: Thesun
#MeKongNews
#ဆန္ဒပြ
#ချွေးသိပ်
#ခါမီနီ
#မော်စကို
