မဲခေါင်၊ ဇန်နဝါရီ ၅
UWSA ထိန်းချုပ် နမ့်တစ်မြို့မှ အစောင့်ကိုသတ်ပြီး ထောင်ဖောက်ပြေးသူ ၇ ဦးကို ပြန်လည် ဖမ်းဆီးမိကြောင်း UWSA နှင့်နီးစပ်သူများ၏ သတင်းပေးပို့ချက်အရ သိရသည်။
ပြီးခဲ့သည့် ဇန်နဝါရီ ၂ ရက်က နမ့်တစ်မြို့တွင် အကျဉ်းသား ၇ ဦးသည် ပြင်ပတွင် အလုပ်လုပ်နေစဉ် ကြိုတင် ကြံစည်ထားသော တိုက်ခိုက်မှု ပြုလုပ်ခဲ့ရာ အစောင့်တစ်ဦး သေဆုံးပြီး အခြားတစ်ဦး ပြင်းထန်စွာ ဒဏ်ရာရရှိခဲ့ကြောင်း သိရသည်။
ယင်းနေ့ နံနက် ၈ နာရီခန့်တွင် အကျဥ်းသားများက အစောင့်တာဝန်ကျ ရဲအရာရှိ Lu ကို အနောက်မှ ရုတ်တရက် ရိုက်ပြီး ၎င်းမေ့မြောသွားချိန်တွင် ၎င်း၏ ကျည် ၅ တောင့်ပါ K12 ရိုင်ဖယ် ကိုလုယူသွားကြောင်း သိရသည်။
ဖူးဘန်ကောင်တီ ထိန်းသိမ်းရေးစခန်းမှ ရဲအရာရှိ Li ၊ Lu နှင့် အစောင့် Zhou Shuangzhu တို့ဦးဆောင်သော အကျဉ်းသား ၁၀ ဦးကို နန်ဒင်းခရိုင် ဓာတ်အားပေး စက်ရုံအနီးရှိ ကျွန်းတောတွင် အလုပ်လုပ်ရန် စီစဉ်ခဲ့ခြင်း ဖြစ်သည်ဟု ဆိုသည်။
ထို့နောက် အကျဉ်းသား ၇ ဦးက Lu ကို နွယ်ကြိုးများဖြင့် တုပ်ထားပြီးကုန်စုံဆိုင်မှ ပြန်လာသော အလုပ်သမား Ai ကိုပါ ဖမ်းဆီးကာ ၎င်း၏ ဖုန်းနှင့် ကားကို လုယူပြီး ထွက်ပြေးခဲ့ကြကြောင်း သိရသည်။
နောက်ပိုင်းတွင် Ai ကထွက်ပြေးနိုင်ခဲ့ပြီး Lu နှင့် ပြန်ဆုံခဲ့ပြီးနောက် ဖြစ်ရပ်ကို တိုင်ကြားရန် ထိန်းသိမ်းရေးစခန်းသို့ အပြေးအလွှား ပြန်လာခဲ့ကြသည်ဟု ဆိုသည်။
တစ်ချိန်တည်းမှာပင် အလုပ်ခွင်အနီးတွင် ချက်ပြုတ်နေသော ရဲအရာရှိ Li သည်လည်း ဖြစ်ရပ်ကို သိရှိပြီး အလုပ် ခွင်သို့ ရောက်လာရာ ဦးခေါင်းတွင် ဓားဒဏ်ရာများစွာဖြင့် မြေပြင်ပေါ်တွင် လဲကျနေသည့် အလှည့်ကျကြီးကြပ် ရေးမှူး ‘ကျိုး’ကို တွေ့ရှိခဲ့ကြောင်း သိရသည်။
ထို့နောက် Li က ဖြစ်ရပ်ကို အထက်သို့ ချက်ချင်း သတင်းပို့ခဲ့ပြီး အပြင်းအထန် ဒဏ်ရာရထားသူ ‘ကျိုး’ ကို နန်ဒင်းဆေးရုံသို့ အမြန်ပို့ဆောင်ခဲ့သော်လည်း နောက်ဆုံးတွင် ဒဏ်ရာများကြောင့် သေဆုံးသွားခဲ့ကြောင်း ဆိုသည်။
ဝရမ်းပြေးများက နယ်စပ်ဖြတ်ကျော် လာနိုင်သောကြောင့် “ဝ” ဒေသ တရားစီရင်ရေး ကော်မတီက ဒေသဖြတ် ကျော် တရားစီရင်ရေးအရ ကိုးကန့်ဒေသရှိ သက်ဆိုင်ရာဌာနများသို့ အကြောင်းကြားပြီး ထိရောက်သော ပူးပေါင်း ဆောင်ရွက်မှုဖြင့် ထွက် ပြေးသူ ၇ ဦးစလုံးကို ဖမ်းဆီးမိခဲ့ကြောင်း ယနေ့တွင် UWSA နှင့် နီးစပ်သူတစ်ဦးက မဲခေါင်သို့ ပြောသည်။
လက်ရှိတွင် ပါဝင်ပတ်သက်သူ အားလုံးကို ဖမ်းဆီးထားပြီး UWSA တရားရေးဌာနက အမှုကို ဥပဒေနှင့်အညီ တင်းကျပ်စွာ စစ်ဆေးနေကြောင်း သိရသည်။
#MeKongNews
#UWSA
#နမ့်တစ်
#ထောင်ဖောက်
#အကျဥ်းသား
#ပြန်မိ
