မဲခေါင်၊ ဒီဇင်ဘာ ၂၅
တောင်နှင့်မြောက်ကိုရီးယားတို့၏ စစ်ရေးခြိမ်းခြောက်မှုများသည် ပင်လယ်ပြင်အောက်အထိပါ ရောက်ရှိလာကာ ဒီဇင်ဘာ ၂၅ ရက်တွင် မြောက်ကိုရီးယားတည်ဆောက်နေသော နျူကလီးယား ရေငုပ်သင်္ဘောကိုယ်ထည်အား ခေါင်းဆောင်ကင်ဂျုံအန်သွားရောက်ကြည့်ရှုစစ်ဆေးသည့် သတင်းရုပ်သံ ဓာတ်ပုံများကို ကမ္ဘာသိစေရန် ထုတ်ဖော်ပြသသွားခဲ့သည်။
ကင်ဂျုံအန်သည် ၂၀၂၁ ခုနှစ်က ၎င်း၏အလုပ်သမားပါတီ အထွေထွေညီလာခံကြီး၌ ထိပ်တန်းလက်နက် ဆန်းများတပ်ဆင်မည့် နျူကလီးယားရေငုပ်သင်္ဘောတည်ဆောက်ရေး အတည်ပြုခဲ့ကာ မတ်လက ယင်းရေငုပ်သင်္ဘောတည်ဆောက်နေမှု ဓာတ်ပုံများ စတင်ထုတ်ပြခဲ့ကာ ယခုတစ်ဖန်ထုပ်ပြသည့် ဓာတ်ပုံများအရ ကိုယ်ထည်မှာ တည်ဆောက်ပြီးစီးသွားပြီး အတွင်းထဲ၌ နျူကလီးယားစွမ်းအင်ဖြင့် လည်ပတ်နိုင်စေရေး အဏုမြူဓာတ်ပေါင်းဖိုတစ်ခု ထည့်သွင်းပြီးနှင့်နေလောက်ပြီဟု ကိုရီးယားပြန်လည်ပေါင်းစည်းရေးအင်စတီကျုမှ မြောက်ကိုရီးယားစစ်ရေး အထူးလေ့လာသူ ဟောင်မင်က ခန့်မှန်းသုံးသပ်ခဲ့သည်။
ယူကရိန်းရှေ့တန်းသို့ မြောက်ကိုရီးယားစစ်သားများ စေလွှတ်ပေး နေခြင်းကြောင့် ယခု မြောက်ကိုရီးယားနျူကလီးယား ရေငုပ်သင်္ဘောအားတည်ဆောက်မှုတွင် ရုရှားဘက်မှ နည်းပညာနှင့် အကူအညီများပေးအပ်ထားဖွယ်ရှိသည်ဟု ၎င်းက သုံးသပ်ပြောဆိုသွားသည်။
ယင်းရေငုပ်သင်္ဘော မည်သည့်အချိန် ပြီးစီးကာ ရေချမည်ကို မြောက်ကိုရီးယားဘက်မှ မထုတ်ပြန်သော်လည်း မကြာခဏ စမ်းသပ်ပစ်ခတ်နေသည့် နျူကလီးယားစွမ်းအင်သုံး မဟာဗျူဟာပဲ့ထိန်းဒုံး ကျည်းစနစ်များ၊ ပဲ့ထိန်းခရုဇ်ဒုံးများ၊ တော်ပီဒိုများ တပ်ဆင်လာဖွယ်ရှိကြောင်း စစ်ရေးကျွမ်းကျင်သူ များက သုံးသပ်နေသည်။
ဒီဇင်ဘာ ၂၄ ရက်တွင် အမေရိကန်၏ လော့စ်အိန်းဂျလိစ် class ဖြစ်သော USS Greeneville နျူကလီးယားရေငုပ်သင်္ဘောသည် တောင်ကိုရီးယားဆိပ်ကမ်း ဘူဆန်သို့ ရောက်ရှိ ရပ်နားထားသည် ကို မြောက်ကိုရီးယားဘက်က ဒေသတွင်း တင်းမာမှုကိုပိုမိုမြင့်တက်စေသော ခြိမ်းခြောက်မှုပြုလုပ် ခြင်းဖြစ်သည်ဟု ခါးခါးသီးသီးဝေဖန် ထုတ်ပြန်ခဲ့သေးသည်။
အမေရိကန်ဘက်ကလည်း နိုဝင်ဘာလ ကတည်းက မဟာမိတ်တောင်ကိုရီးယားအတွက် နျူကလီးယားရေငုပ်သင်္ဘော တည်ဆောက်ပေးအပ် သွားရန် သဘောတူလက်မှတ်ရေးထိုးခဲ့ရာ တောင်နှင့်မြောက်ကိုရီးယား စစ်ရေးအားပြိုင်မှုသည် ပိုမိုတင်းမာမြင့်တက်လာပြီဖြစ်သည်။
၂၀၂၆ နှစ်ဆန်းပိုင်းတွင် ၅ နှစ်တစ်ကြိမ်ကျင်းပသည့် အလုပ်သမားပါတီ ညီလာခံကြီး၌ ကင်ဂျုံအန်သည် နောက် ၅ နှစ်အတွင်း စစ်ရေးလက်နက်သစ်များ ထပ်မံတီထွင်ပိုင်ဆိုင်ရေး အရေးပါသော ဆုံးဖြတ်ချက် များထပ်မံချမှတ်ကာ တီထွင်းပြီးသား လက်နက်အင်အားကို ချပြလာဖွယ်ရှိသည်ဟုလည်း ကြိုတင် သုံးသပ်နေကြသည်။
ကိုကလင်း
Ref: Bangkokpost
#MeKongNews
#မြောက်ကိုရီးယား
#ရေငုပ်သင်္ဘော
#နျူကလီးယား
#ရုရှား
