မဲခေါင်၊ ဒီဇင်ဘာ ၂၂

ရုရှားနိုင်ငံ၊ မော်စကိုမြို့တောင်ပိုင်းတွင် ကားဗုံးပေါက်ကွဲမှုကြောင့် ရုရှားထိပ်တန်း ဗိုလ်ချုပ်ကြီးတစ်ဦး သေဆုံးသွားကြောင်း စုံစမ်း စစ်ဆေးရေးမှူးများက ပြောသည်။

ရုရှား စစ်ဆင်ရေးလေ့ကျင့်ရေးဌာန အကြီးအကဲဖြစ်သူ ဒုတိယဗိုလ်ချုပ်ကြီး ဖာနေးလ်ဆာဗာရော့ဗ် သတ်ဖြတ်ခံ ရမှုနှင့် ပတ်သက်၍ စုံစမ်း စစ်ဆေးမှုများ စတင်နေပြီ ဖြစ်ကြောင်း ရုရှားစုံစမ်း စစ်ဆေးရေးကော်မတီက ယနေ့တွင် ထုတ်ပြန်ခဲ့သည်။

ယင်းဖြစ်စဉ်တွင် ယူကရိန်း အထူးတပ်ဖွဲ့များ ပါဝင်ပတ်သက်နိုင်ခြေ ရှိ၊ မရှိကိုလည်း ထည့်သွင်း စုံစမ်းနေကြောင်း တာဝန်ရှိသူများက ပြောသည်။

ဆာဗာရော့ဗ်၏ ကားအောက်၌ ဖောက်ခွဲရေးပစ္စည်းတစ်ခု ပေါက်ကွဲခဲ့ခြင်းဖြစ်ပြီး ရရှိထားသော ဒဏ်ရာများဖြင့် ဆေးရုံတွင် သေဆုံးသွားခြင်းခြင်း ဖြစ်ကြောင်း အထူးစုံစမ်းစစ်ဆေးရေးအဖွဲ့က ဆိုသည်။

မော်စကိုစံတော်ချိန် ယနေ့နံနက် ၇ နာရီခန့်တွင် ယာဆနီဗာယာလမ်းရှိ ကားပါကင်တစ်ခုအတွင်း အဖြူရောင်ယာဉ်တစ်စီး ပေါက်ကွဲသွားခဲ့ကြောင်း ရုရှားသတင်းဌာနများ ဖော်ပြသည်။

“မော်စကိုမြို့ ယာဆနီဗာယာလမ်းမှာ ပေါက်ကွဲမှုတစ်ခု ဖြစ်ခဲ့ပါတယ်။ စစ်ဘက်ဆိုင်ရာ စစ်ဆင်ရေး လေ့ကျင့်ရေး ညွှန်ကြားမှုဦးစီးဌာန အကြီးအကဲ ဖာနေးလ်ဆာဗာရော့ဗ်ဟာ ပေါက်ကွဲမှုကြောင့် ရရှိတဲ့ ဒဏ်ရာတွေနဲ့ သေဆုံးသွားပါပြီ ”ဟု စုံစမ်းစစ်ဆေးရေး ကော်မတီ ပြောရေးဆိုခွင့်ရှိသူ ဆဗက်လာနာပီထရန်ကိုက ပြောကြားကြောင်း ရုရှားနိုင်ငံပိုင် TASS သတင်းဌာနက ဆိုသည်။

ယင်းအမှုနှင့်ပတ်သက်၍ စုံစမ်းစစ်ဆေးရေး လမ်းကြောင်းများစွာကို စုံစမ်းစစ်ဆေးရေးမှူးများက လိုက်နေပြီး ယူကရိန်းထောက်လှမ်းရေးဌာနများက စီစဉ်ညွှန်ကြားခဲ့ခြင်း ဖြစ်နိုင်သည့် အချက်လည်း ပါဝင်ကြောင်း ပီထရန်ကိုက ဆက်ပြောသည်။

၂၀၂၄ ခုနှစ်၊ ဒီဇင်ဘာလတွင်လည်း ရုရှား၏ နျူကလီးယား၊ ဇီဝနှင့် ဓာတုဗေဒဆိုင်ရာ ကာကွယ်ရေးတပ်ဖွဲ့ အကြီးအကဲ ဒုတိယဗိုလ်ချုပ်ကြီး အီဂေါကီရီလော့ဗ်ကို ၎င်း၏ နေအိမ်တိုက်ခန်း အပြင်ဘက်ရှိ လျှပ်စစ်စကူတာ တစ်စီးတွင် ဗုံးထောင် လုပ်ကြံခဲ့မှုတွင် ၎င်းတို့ လက်ချက်ဖြစ်ကြောင်း ကိဗ်ဘက်က ဝန်ခံခဲ့သည်။

ယင်းမတိုင်မီ တစ်လကလည်း အရပ်သား ပစ်မှတ်များကို ဒုံးကျည်ဖြင့် တိုက်ခိုက်ရန် အမိန့်ပေးခဲ့မှုကြောင့် ယူကရိန်းဘက်က စစ်ရာဇဝတ်ကောင် အဖြစ် စွပ်စွဲထားသည့် ရုရှားရေတပ်ဗိုလ်ကြီး ဗလာရီထရန်‌ကော့ဗ်စကီးကို ကားဗုံးဖြင့် လုပ်ကြံနိုင်ခဲ့ကြောင်း ယူကရိန်း သတင်းရင်းမြစ်များက ပြောသည်။

ထို့ပြင် ၂၀၂၃ ခုနှစ်၊ ဇူလိုင်လအတွင်းကလည်း ပင်လယ်နက်အတွင်း ရေငုပ်သင်္ဘောကို ကွပ်ကဲခဲ့ပြီး ယူကရိန်း၏ စစ်ရာဇဝတ်ကောင် စာရင်းတွင် ပါဝင်နေသူ ရုရှားစစ်အရာရှိ စတန်နီဆလဗ်ရစ်စကီသည် ရုရှားတောင်ပိုင်း ခရက်စနိုဒါမြို့တွင် နံနက်ခင်း အပြေးလေ့ကျင့်နေစဉ် သေနတ်ဖြင့် ပစ်သတ်ခံခဲ့ရသည်။

၂၀၂၂ ခုနှစ် ဩဂုတ်လတွင်မူ အစွန်းရောက် အမျိုးသားရေးဝါဒီ သဘောတရားရေး ပညာရှင် အလက်ဇန်းဒါးဒူဂျင်း၏ သမီးဖြစ်သူ ဒါရီယာဒူဂျီနာသည်လည်း ကားဗုံး ပေါက်ကွဲမှုကြောင့်ပင် သေဆုံးခဲ့သေးသည်။

#MeKongNews
#မော်စကို
#ကားဗုံးကွဲ
#ဗိုလ်ချုပ်ကြီး
#သေဆုံး

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)