မဲခေါင်၊ ဒီဇင်ဘာ ၂၀
– ကမ္ဘောဒီးယား စစ်ရေးပစ်မှတ်များအပေါ် ထိုင်းလေတပ်က လေကြောင်း တိုက်ခိုက်မှုများကို အရှိန်မြှင့်နေပြီး ဖနွမ်းပင်အစိုးရ အနေဖြင့် ငြိမ်းချမ်းရေးအတွက် အဓိကသတ်မှတ်ချက် ၃ ချက်ကို လက်မခံမချင်း စစ်ဆင်ရေးများကို ရပ်တန့်မည် မဟုတ်ကြောင်း သတိပေးလိုက်သည်။
– ထိုင်းတပ်ဖွဲ့ဝင်များက ထမော်ဒါ ကာစီနိုရုံကို အောင်မြင်စွာ ပြန်လည် သိမ်းပိုက်နိုင်ခဲ့ပြီး ယင်းအဆောက်အအုံ တစ်ခုလုံးသည် ထိုင်းပိုင်နက်ထဲသို့ ကျူးကျော် ဝင်ရောက်နေသော ကမ္ဘောဒီးယားပိုင် ဖြစ်ကြောင်းနှင့် တိုက်ပွဲအတွင်း ကမ္ဘောဒီးယားစစ်သား ၁၀ ဦး သေဆုံးခဲ့ကြောင်း ထိုင်းစစ်တပ်၏ ထုတ်ပြန်ချက်အရ သိရသည်။
– ယနေ့တွင် ထိုင်းလေတပ်မှ F – 16 တိုက်လေယာဉ်များက ပဲ့ထိန်းဗုံးများဖြင့် အိုချစ်တံတားကို တိုက်ခိုက်ခဲ့ခြင်းကြောင့် တောင်ကုန်းအမှတ်(၃၅၀)နှင့် ပရာဆက်တာကွေးရှိ ကမ္ဘောဒီးယားတပ်ဖွဲ့ဝင်များအတွက် အဓိက ထောက်ပို့လမ်းကြောင်း ပြတ်တောက်သွားခဲ့သည်။
ကမ္ဘောဒီးယားဘက်မှ တံတားကို ပြန်လည်ပြင်ဆင်ရန် သို့မဟုတ် ရှေ့တန်းသို့ စစ်ရေး ထောက်ပို့မှုများ ပြန်လည် စတင်ရန် ကြိုးပမ်းပါက ထပ်မံတိုက်ခိုက်ရန် အသင့်ရှိကြောင်း ထိုင်းလေတပ်က သတိပေးထားသည်။
– ထိုင်းစစ်တပ်၏ ယနေ့ ထုတ်ပြန်ချက်အရ ထိုင်းတပ်ဖွဲ့ဝင်များသည် အငြင်းပွားနေသော တောင်ကုန်းအမှတ် (၃၅၀) ကို အောင်မြင်စွာ ထိန်းချုပ်နိုင်ခဲ့ပြီး တိုက်ပွဲအတွင်း ကျဆုံးခဲ့သည့် စစ်သည်နှစ်ဦး၏ ရုပ်အလောင်းများကို တောင်ခြေရှိ ပြန်လည် သယ်ဆောင်နေပြီ ဖြစ်ကြောင်း သိရသည်။
– ထိုင်း – ကမ္ဘောဒီးယား နယ်စပ်တစ်လျှောက် ကမ္ဘောဒီးယားစစ်တပ်၏ တိုက်ခိုက်မှုများကြောင့် ထိုင်းအရပ်သား ၂၃ ဦး သေဆုံးပြီး ၆ ဦး ဒဏ်ရာရရှိကာ အနည်းဆုံး နေအိမ် ၃၀ ခန့် ပျက်စီးခဲ့ကြောင်း ထိုင်းတော်ဝင်တပ်မတော်က သတင်းထုတ်ပြန်ခဲ့သည်။
အရပ်သား သေဆုံးမှုများထဲတွင် လူနေ ရပ်ကွက်များအတွင်းသို့ BM-21 ဒုံးကျည် တိုက်ရိုက်ကျရောက် ပေါက်ကွဲမှုကြောင့် တစ်ဦးသေဆုံးခဲ့ပြီး ကျန်ရှိသူများမှာ ပဋိပက္ခ၏ နောက်ဆက်တွဲ အကျိုးဆက်များကြောင့် သေဆုံးခဲ့ရခြင်း ဖြစ်သည်ဟု ဆိုသည်။
– ထိုင်း – ကမ္ဘောဒီးယား နယ်စပ်တိုက်ပွဲများအတွင်း ရှေးဟောင်း သမိုင်းဝင် နေရာ များကို ကမ္ဘောဒီးယား တပ်ဖွဲ့ များ က စစ်ရေးအရ အသုံးချနေကြောင်း ထိုင်းအမှတ်(၂) စစ်ဒေသက ယနေ့တွင် ပြောကြားသည်။
ထိုင်းအာဏာပိုင်များက စစ်ဆေးတွေ့ရှိရသည့် ဗီဒီယိုများနှင့် မှတ်တမ်းဓာတ်ပုံများအရ အမျိုးသမီးများနှင့် ကလေး ငယ်များအပါအဝင် အရပ်သားများကို တိုက်ပွဲနယ်မြေအတွင်း ထားရှိထားကြောင်းနှင့် ယင်းနေရာများအတွင်း မြေမြှုပ်မိုင်းများနှင့် ပေါက်ကွဲစေတတ်သော ပစ္စည်းများကို အသုံးပြုနေကြောင်း တွေ့ရှိရသည်ဟု ဆိုသည်။
#MeKongNews
#ထိုင်း
#ကမ္ဘောဒီးယား
#စစ်ပွဲ
#နောက်ဆုံးရ
