မဲခေါင်၊ ဒီဇင်ဘာ ၁၉
မကြာသေးမီက ပြုလုပ်ခဲ့သော စစ်ဆင်ရေးများအတွင်း ပစ်မှတ်ထားခဲ့သည့် ကမ္ဘောဒီးယား ကာစီနို အဆောက် အအုံများမှာ အလွန်ခိုင်ခံ့အောင် တည်ဆောက်ထားပြီး F-16 တိုက်လေယာဉ်များက လေကြောင်းမှ ဗုံးကြဲရုံမျှဖြင့် ပြိုကျနိုင်ခြင်း မရှိကြောင်း ထိုင်းလုံခြုံရေး တာဝန်ရှိသူများက ယနေ့တွင် ပြောကြားသည်။
ယင်းအဆောက်အအုံများကို အထူး အဆင့်မြှင့်တင်ပြီး ခိုင်ခံ့အောင် တည်ဆောက်ထားကြောင်း ထိုင်းစစ်တပ်က ဆိုသည်။
ယင်းကာစီနိုများရုံကို တိုက်ပွဲများအား ကွပ်ကဲရန်၊ ဒရုန်းများ လွှတ်တင်ရန်၊ ဒရုန်းရန် ကာကွယ်ရေးစနစ်များ အသုံးပြုရန်နှင့် ထိုင်းနိုင်ငံအတွင်းရှိ အရပ်သားနယ်မြေများ အပါအဝင် အခြားနေရာများသို့ အမြောက်များနှင့် BM-21 ဒုံးကျည်များဖြင့် ပစ်ခတ်ရန် ရှေ့တန်းစစ်ဌာနချုပ်များ အဖြစ် ပြောင်းလဲ အသုံးပြုထားကြောင်း ထိုင်းတာဝန်ရှိသူများက ဆိုသည်။
ထိုအဆောက်အအုံများသည် တည်ဆောက်ပုံ အထူးခိုင်ခံ့ပြီး အမည်မဲစာရင်းဝင် ရင်းနှီးမြှုပ်နှံသူများနှင့် ဆက်နွှယ်နေကာ အဆောက်အအုံ၏ ဘေးနံရံများကို ဦးစွာဖောက်ထွင်းရန် ထိုင်းတပ်ဖွဲ့များက အမြောက်များကို အသုံးပြုခဲ့ပြီးနောက်မှ F-16 တိုက်လေယာဉ်များဖြင့် အမိုးများကို ဗုံးကြဲကာ အတွင်း၌ ပေါက်ကွဲစေမည့် ဗုံးများကို ချခဲ့ရခြင်းဖြစ်ကြောင်း ဆိုသည်။
ယင်းအဆောက်အအုံများအား ပြင်ပမှ ကြည့်လျှင် မပြိုမပျက်ဘဲ ကျန်ရှိနေသော်လည်း အတွင်းပိုင်းတွင်မူ ပျက်စီးသွားပြီ ဖြစ်ကြောင်း ထိုင်းတာဝန်ရှိသူများက ပြောကြားသည်။
ယမန်နေ့တွင်လည်း ကမ္ဘောဒီးယားနိုင်ငံ အတွင်းရှိ စစ်ဘက်ဆိုင်ရာ အခြေစိုက်စခန်းများကို လေကြောင်းမှ ဗုံးကြဲ တိုက်ခိုက်ခဲ့ကြောင်း ထိုင်းလေတပ်က အတည်ပြုပြောကြားသည်။
ယင်းတိုက်ခိုက်မှုတွင် အာရညပရာထက် ခရိုင် နှင့် မျက်နှာချင်းဆိုင်ရှိ ကမ္ဘောဒီးယား၏ ပွိုင်ပက်နှင့် သီရိသုဘုံ ခရိုင်တို့ရှိ စစ်တပ်စခန်းများ၊ လက်နက်ခဲယမ်း သိုလှောင်ရုံများနှင့် ယမ်းဂိုထောင်များကို ပစ်မှတ်ထားခဲ့ခြင်း ဖြစ်သည်။
ထို့နောက် ပြီးခဲ့သည့် အောက်တိုဘာ ၂၆ ရက်တွင် နှစ်နိုင်ငံ ဝန်ကြီးချုပ်များ လက်မှတ်ရေးထိုးခဲ့သည့် ပူးတွဲကြေညာချက်နှင့် အပစ်အခတ်ရပ်စဲရေး သဘောတူညီချက်ကို ထိုင်းစစ်တပ်က ပြောင်ပြောင်တင်းတင်း ချိုးဖောက်ကာ ကမ္ဘောဒီးယား၏ အမှတ် (၄)နှင့် အမှတ်(၅) စစ်ဒေသ ဧရိယာများအတွင်း ဆက်တိုက် တိုက်ခိုက်နေကြောင်း ကာကွယ်ရေးဝန်ကြီးဌာန ပြောရေးဆိုခွင့်ရှိသူ ဒုဗိုလ်ချုပ်ကြီး မာလီဆိုချီတာက ယမန်နေ့တွင် စွပ်စွဲ ပြောကြားခဲ့သည်။
#MeKongNews
#ကမ္ဘောဒီးယား
#ကာစီနိုရုံများ
#ဂျက်ဖိုက်တာ
#ဗုံးကြဲ
#ထိုင်းစစ်တပ်
