မဲခေါင်၊ ဒီဇင်ဘာ ၁၈
အမေရိကန် အထက်လွှတ်တော်သည် လာမည့် ၂၀၂၆ ခုနှစ် တစ်နှစ်တာ စစ်အသုံးစရိတ်ကို ယခုနှစ်ထက် ၄ ရာခိုင်နှုန်း မြှင့်တင်၍ ဒေါ်လာ ၉၀၁ ဘီလီယံအထိ သုံးစွဲသွားရန် အတည်ပြုလိုက်ပြီး ဖြစ်ကာ သမ္မတဒေါ်နယ်ထရမ့် လက်မခံလိုသည့် ယင်းဆုံးဖြတ်ချက်အား ဥပဒေကြောင်းအရ လွန်ဆန်ခွင့်မရှိဘဲ ၎င်းကိုယ်တိုင် လက်မှတ် ထိုးပေးရတော့မည် ဖြစ်သည်။
၂၀၂၆ ဘဏ္ဍာနှစ် အမျိုးသားကာကွယ်ရေး ခွင့်ပြုချက်အက်ဥပဒေ – NDAA အရ ပင်တဂွန်စစ်ဌာ နချုပ် အတွက် စစ်အသုံးစရိတ်ကို ၂၀၂၅ ခုနှစ် အစောပိုင်းကတည်းက ချင့်တွက် ဆွေးနွေးမှုများ ပြုလုပ်အပြီး နောက်ဆုံးတွင် တရုတ်နှင့် ရုရှားတို့၏ စစ်ရေးအင်အားနှင့် ယှဉ်ပြိုင် အသာယူနိုင်စွမ်း အတွက် ထိုမျှသုံးစွဲရန် အထက်လွှတ်တော်၌ မဲခွဲရာ ထောက်ခံမဲ ၇၇ မဲ၊ ကန့်ကွက်မဲ ၂၀ နှင့် မဲမပေးသူ ၂ ဦးဖြင့် အတည်ပြုခဲ့ရာ သမ္မတကိုယ်တိုင် မဖြစ်မနေ လက်မှတ် ထိုးပေးရန်သာ ကျန်တော့သည်။
အမေရိကန် အထက်လွှတ်တော်သည် ၆၅ နှစ်ဆက်တိုက် နိုင်ငံ၏ စစ်ရေးအသုံးစရိတ်ဘတ်ဂျက်ကို တိုးမြှင့်သထက် တိုးမြှင့်ခဲ့ခြင်း ဖြစ်ကာ ပြီးခဲ့သည့် တစ်ပတ်က အောက်လွှတ်တော် မဲခွဲမှုတွင်လည်း ထောက်ခံမဲ ၃၁၂ မဲ၊ ကန့်ကွက်မဲ ၁၁၂ မဲဖြင့် အတည်ပြုပြီးနောက် အထက်လွှတ်တော်သို့ ရောက်ကာ အဓိကပါတီကြီး ၂ ရပ်စလုံးမှ ထောက်ခံမဲ အများဆုံး ပေးခြင်းဖြင့် အတည်ပြုနိုင်ခဲ့ခြင်း ဖြစ်သည်။
ယခုလဆန်းပိုင်း၌ အဓိကမဟာမိတ်အဖြစ် ဥရောပနှင့်ဆက်ဆံနေမှုအစား ရုရှားနှင့်မဟာမိတ်ဖွဲ့နိုင်ရေး စဉ်းစား သင့်သည်ဟု ဒေါ်နယ်ထရမ့်က ပြောခဲ့ပြီး ယခုလို စစ်အသုံးစရိတ်များပြားစွာ မသုံးလိုသည့်သဘော ပြော ဆိုခဲ့ သော်လည်း လွှတ်တော် ၂ ရပ်စလုံးမှ အတည်ပြုပေးခဲ့သဖြင့် သမ္မတအမိန့်ဖြင့် လွန်ဆန်ရန် မဖြစ်နိုင်တော့ကြောင်း သိရသည်။
၂၀၂၆ အမေရိကန် စစ်အသုံးစရိတ်များတွင် ယူကရိန်းအတွက် ဒေါ်လာသန်း ၈၀၀ ကို နောက် ၂ နှစ်အတွင်း သန်း ၄၀၀ စီ ပေးသွားရန်လည်း ပါဝင်သလို ရုရှားရန်မှ ကာကွယ်ရန်အရေးကြီးသော ဘောလ်တစ်နိုင်ငံများဖြစ်သည့် လတ်ဗီးယား၊ လစ်သူရေးနီးယား၊ အက်စတိုနီးယားတို့အတွက် ကာကွယ်ရေးဆိုင်ရာ အသုံးပြုရေး ဒေါ်လာ ၁၇၅ သန်းလည်း ပါဝင်သည်။
ယခု လွှတ်တော်မှ အတည်ပြု လိုက်သည့် ၂၀၂၆ စစ်အသုံးစရိတ် ဒေါ်လာ ၉၀၁ ဘီလီယံသည် ထရမ့်တင်ပြသည့် ဘတ်ဂျက်ထက် ၈ ဘီလီယံ ပိုများနေသည်။
ကိုကလင်း
Ref: indiatoday
#MeKongNews
#စစ်အသုံးစားရိတ်
#အမေရိကန်
#အထက်လွှတ်တော်
#အတည်ပြု
