မဲခေါင်၊ ဒီဇင်ဘာ ၁၅
– အမြင့်မားဆုံး ထိန်းထိန်းသိမ်းသိမ်း ဆောင်ရွက်ကြရန်၊ တိုက်ခိုက်မှုများ ရပ်တန့်စေမည့် အတိုင်းအတာ အားလုံး အကောင်အထည်ဖော်ရန်နှင့် အခြေအနေကို အမြန်ဆုံး လျော့ပါးသက်သာစေရန် ကမ္ဘောဒီးယားနှင့် ထိုင်းနိုင်ငံတို့ အား တရုတ် နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ ကောကျားခွန်းက တောင်းဆိုလိုက် သည်။
– ဒေသစံတော်ချိန် ယနေ့ နံနက် ၁၀ နာရီ အကြားတွင် ထိုင်း F-16 တိုက်လေယာဉ်များက ဗုံး ၂ လုံးကို အော့ဒါမိန်းချေး ပြည်နယ်၊ ချောင်းကယ်ခရိုင်နှင့် စီယမ်ရိ ပြည်နယ်၊ ဆရီစနမ်ခရိုင်တို့ရှိ စစ်ပြေးဒုက္ခသည် စခန်းများ အနီးသို့ ကြဲချခဲ့ကြောင်း ကမ္ဘောဒီးယား ကာကွယ်ရေးဝန်ကြီးဌာနနှင့် ပြန်ကြားရေးဝန်ကြီးဌာနတို့က ထုတ်ပြန်သည်။ ကမ္ဘောဒီးယား အာဏာပိုင်များ၏ ပြောကြားချက်အရ ကမ္ဘောဒီးယားပိုင်နက် နယ်မြေအတွင်း ၄၃ မိုင် ကျော်အကွာတွင်ရှိသော ဆရီစနမ်ခရိုင်ရှိ ဗုံးကြဲတိုက်ခိုက်မှုမှာ တံတားတစ်စင်းကို ပစ်မှတ်ထားခြင်းဖြစ်သည်ဟု သိရသည်။
– ထိုင်းစစ်တပ်၏ ထုတ်ပြန်ချက်အရ ယနေ့ မွန်းလွဲ ၂ နာရီ ၄၀ မိနစ်ခန့်တွင် ဘူရာဖာ အထူးတပ်ဖွဲ့က ကမ္ဘောဒီးယား၏ လက်နက် ထောက်ပံ့ရေး နေရာတစ်ခုပေါ်သို့ ဒရုန်းဖြင့် ဗုံးကြဲခဲ့ကြောင်း သိရသည်။
– ဥဘွန်ရတ်ချဌာနီ ပြည်နယ်ရှိ ချောင်မက် နယ်စပ်ဂိတ်တွင် လောင်စာဆီတင် ကားများကို ဖမ်းဆီးခဲ့သည့် ဖြစ်စဉ်နှင့် ပတ်သက်၍ ထိုင်းဘုရင့်တပ်မတော်က ရှင်းလင်းချက် ထုတ်ပြန်ခဲ့ပြီး လာအို ပြည်သူများအား တောင်းပန်ခဲ့သည်။
ယင်းဖြစ်စဉ်ကြောင့် စိတ်မချမ်းမသာ ဖြစ်ခဲ့ရမှုအတွက် ထိုင်းစစ်တပ်က တောင်းပန်ကြောင်းနှင့် ထိုင်းနိုင်ငံအနေဖြင့် အိမ်နီးချင်းဖြစ်သော လာအိုအား ထိခိုက် နစ်နာစေလိုသည့် ရည်ရွယ်ချက် လုံးဝမရှိကြောင်း အာမခံ ပြောကြားသည်။
– ထိုင်းနိုင်ငံ၏ လုံခြုံရေးနှင့် လူသားချင်း စာနာမှုဆိုင်ရာ လုပ်ဆောင်ချက်များနှင့် ပတ်သက်၍ အဓိကအချက် ၄ ချက်ကို ထိုင်း – ကမ္ဘောဒီးယားနယ်စပ် အခြေအနေဆိုင်ရာ ပူးတွဲသတင်းစာ ရှင်းလင်းပွဲဌာန၏ ညွှန်မှူးဖြစ်သူ လေတပ်ဦးစီးချုပ် ဗိုလ်ချုပ်ကြီး ဖရဖတ်ဆွန်ချိုင်းယာဒီးက ယနေ့တွင် ရှင်းလင်း ပြောကြားခဲ့သည်။
ထိုင်းတပ်ဖွဲ့များက တာခွဲ ဘုရားကျောင်း ကို အောင်မြင်စွာ ပြန်လည် သိမ်းပိုက်နိုင်ခဲ့ပြီး ထိုဒေသပေါ်တွင် ထိုင်းအလံကို လွှင့်ထူနိုင်ခဲ့ပြီဖြစ်ကာ နောက်ထပ် ပစ်မှတ်မှာ တောင်ကုန်းအမှတ် (၃၅၀)ကို တိုက်ခိုက် သိမ်းပိုက်ရန် ဖြစ်ကြောင်း ထိုင်းကြည်းတပ် စစ်ဆင်ရေးအဖွဲ့က လူမှုကွန်ရက်တွင် ယနေ့ ဖော်ပြသည်။
#MeKongNews
#ထိုင်း
#ကမ္ဘောဒီးယား
#စစ်ပွဲ
#နောက်ဆုံးရ
