မဲခေါင်၊ ဒီဇင်ဘာ ၁၂
အမေရိကန်သမ္မတဒေါ်နယ်ထရမ့်သည် ၎င်းသမ္မတသက်တမ်းအတွင်း ဥရောပနိုင်ငံ ၄ ခုဖြစ်သော ဩစတြီးယား၊ အီတလီ၊ ဟန်ဂေရီနှင့်ပိုလန်တို့အား အီးယူမှထွက်ပြီး အမေရိကတိုက်နှင့်ပူးပေါင်းသော နိုင်ငံများအဖြစ်ရှိစေရေ လျှို့ဝှက်ရေးဆွဲထားသော မူကြမ်းစာရွက်စာတမ်းများ ပေါက်ကြားထွက်ပေါ် လာခဲ့သည်။
အမေရိကန်အမျိုးသားလုံခြုံရေးမဟာဗျူဟာ (NSS) သို့ ဒေါ်နယ်ထရမ့်က ၎င်းနှင့် နွေးထွေးသော ရင်းနှီးမှုရှိသည့်ခေါင်းဆောင်များအုပ်ချုပ်ရာ အဆိုပါ ၄ နိုင်ငံကို အီးယူမှ နုတ်ထွက်ကာ အမေရိကန်ကို ထောက်ခံသော နိုင်ငံများအဖြစ် ရှိနေစေရေး စီစဉ်ထားသည့် စာမျက်နှာ ၃၃ မျက်နှာပါ စာရွက်စာတမ်း များကို အမေရိကန် Defense One မီဒီယာက ရရှိသွားပြီး ဖော်ထုတ်တင်ပြလိုက်ခြင်းဖြစ်သည်။
ဒေါ်နယ်ထရမ့်သည် ယူကရိန်းအရေးနှင့်ပတ်သက်ပြီးလည်း အီးယူခေါင်းဆောင်များနှင့် ဆက်ဆံရေး အဆင်မပြေဖြစ်ကာ နေတိုးအဖွဲ့သည် ရုရှားရန်ကို ကာကွယ်ရာတွင်လည်း စစ်ရေးဘတ်ဂျက်များ နည်းပါးစွာ ထည့်ဝင်ခြင်းအပေါ် ပြင်းပြင်းထန်ထန်ဝေဖန်ခဲ့သည်။
ယခုရက်ပိုင်းအတွင်း၌လည်း အီးယူ သည် အလယ်ခေတ်က တိုက်ကြီးတစ်တိုက်ကဲ့သလို့ နိုင်ငံအတွင်း ရွှေပြောင်းနေထိုင်လာသူများ အလွန်များပြားနေခြင်းအပေါ် မထိန်းချုပ်နိုင်ကြောင်း၊ နိုင်ငံများသည်လည်း ပြိုလဲနေပြီဖြစ်ကြောင်း ပြင်းပြင်း ထန်ထန် ဝေဖန်ခဲ့သည်။
ထရမ့်သည် ယခုထပ်မံပြီး ၎င်းနှင့် ပိုမိုရင်းနှီးသော ခေါင်းဆောင်များအုပ်ချုပ်သည့် နိုင်ငံ ၄ နိုင်ငံကို အီးယူမှ နုတ်ထွက်ခိုင်းပြီး အမေရိကပတ်လမ်းအတွင်း သွပ်သွင်းရန် စီမံကိန်းချထားမှု ပေါက်ကြား ပြီးနောက် ဥရောပ ထိပ်တန်းခေါင်းဆောင်များဘက်ကလည်း ထရမ့်အပေါ် ဒေါသထွက်ပေါက်ကွဲ စကားများဆိုခဲ့ကြသည်။
ဂျာမန်အဓိပတိ ဖရိုင်းဒရစ်မာ့ဇ်က ဥရောပနိုင်ငံများအနေဖြင့် စစ်ရေးတွင် အမေရိကန်ကို မှီခိုနေမှု များ လျှော့ချမှ ဖြစ်တော့မည်ဟု ဆိုသလို ဥရောပကောင်စီဥက္ကဌ အန်တိုနီယိုကော်စတာကလည်း ဥရောပ အသိုင်းအဝိုင်း နိုင်ငံရေးနယ်ပယ်သည် အမေရိကန်ဝင်ပါစရာအကြောင်းမရှိဟု ဝေဖန်သွားခဲ့သည်။
အမေရိကန်၏ NSS မူကြမ်းအတွင်း ဥရောပအရေးသာမက အမေရိကန်၊ တရုတ်၊ ရုရှား၊ အိန္ဒိယနှင့် ဂျပန်တို့ ပူးပေါင်းမည့် Core 5 အုပ်စု ထူထောင်ရန်ပါ ပါဝင်သည်ဟုလည်း သိရသည်။
အိမ်ဖြူတော်ပြောရေးဆိုခွင့်ရှိသူ ကယ်လီကမူ Defense One မှ ထုတ်ဖော်လိုက်သည့် စာရွက် စာတမ်းများသည် သမ္မတနှင့် အလှမ်းဝေးလွန်းသော လူများဆီမှ အမြင်များသာဖြစ်ကာ ဒေါ်နယ် ထရမ့်တွင် ထိုအတွေးအခေါ် လုံး၀ရှိမနေဟု ငြင်းဆိုသွားသည်။
ကိုကလင်း
Ref: Thesun
#MeKongNews
#အမေရိကန်
#အီးယူ
#ဒေါ်နယ်ထရမ့်
#အီတလီ
#ရွှေ့ပြောင်းအခြေချသူ
