မဲခေါင်၊ နိုဝင်ဘာ ၂၇
ကမ္ဘာတစ်ဝန်းနည်းမျိုးစုံဖြင့် လူသားများထံမှ ငွေကြေးဘီလီယံချီကာ လိမ်လည်နေသည့် ကျားဖြန့် ဒဏ်ကြောင့် ဆွစ်ဇာလန်သူ ပင်စင်စားအမျိုးသမီးကြီးတစ်ဦးသည် ပင်ပန်းခက်ခဲစွာ စုဆောင်းခဲ့ရသော ပေါင် ၉၀၀၀၀ ဆုံးရှုံးခဲ့ရသည့် ဖြစ်ရပ်တစ်ခု ထပ်မံ ထွက်ပေါ်လာသည်။
ပက်ထရစ်ရှာဆိုသည့် အမျိုးသမီးသည် ၂၀၂၄ ခုနှစ်တွင် ဘရတ်ပစ်၏ အင်စတာဂရမ် အကောင့်တုအား အစစ်မှတ်ပြီး Follow လုပ်ခဲ့ရာမှ ပြဿနာစတင်ခဲ့ပြီး ထိုအကောင့်အား ထိန်းချုပ်သည်ဟုဆိုသော ဘရတ်ပစ်၏ မန်နေဂျာဆိုသူက ဘရတ်ပစ်ကိုယ်တိုင်နှင့် တိုက်ရိုက်ဆက်သွယ်ချင်သလားဟု ပထမဆုံး ကမ်းလှမ်းလာကြောင်း၊ ဘရတ်ပစ်ကို အသည်းစွဲကြိုက်သူဖြစ်သောကြောင့် အားချင်းသဘောတူလက်ခံခဲ့ကြောင်း သိရသည်။
ယင်းနောက် ဘရတ်ပစ်ကိုယ်တိုင်က မိမိအား အလွန် နူးညံ့သိမ်မွေ့စွာဖြင့် ပြောဆိုဖေးမကြင်နာမှုစကားများဖြင့် အသည်းကြွေစေခဲ့ကြောင်း၊ အချစ်ရေ . . . ငါ့အတွက် အရာရာဟာမင်းပါပဲ၊ ထာ၀ရပါဟု ဆိုသော စာသားများလည်း ပို့ခဲ့ကြောင်း၊ သို့သော် ကမ္ဘာကျော်မင်းသားဖြစ် သောကြောင့် အခြားလူများအား အသိမပေးဘဲ လျှို့ဝှက်ထားရန်လည်း မှာကြားကြောင်း၊ တစ်ရက်တွင် လော့စ်အိန်းဂျလိစ်၌ လူချင်းတွေ့ကြမည်ဟု ချိန်းဆိုခဲ့ရာ မည်သူ့ကိုမျှ မခွဲခြားသော စျေးနှုန်းဖြစ်သည့် ဒေါ်လာ ၅၀၀၀၀ ပေးမှသာ စီစဉ်ရမည်များကို စီစဉ်ကာ အချိန်ပေးနိုင်မည်ဟု ကျားဖြန့်သမား ဘရတ်ပစ်က တုံ့ပြန်လာကြောင်း သိရသည်။
ကနဦးစဉ်းစားသေးပြီး နောက်မှ တရားဝင်ချစ်သူဖြစ်ရမည်ဆိုသော မျှော်လင့်ချက်ဖြင့် ဒေါ်လာ ၅၀၀၀၀ လွှဲပေးကာ လော့စ်အိန်းဂျလိစ်သို့သွားပြီး ချိန်းထားသည့် ဟိုတယ်တစ်ခုတွင် ၃ ပတ်ကြာ စောင့်နေခဲ့ သော်လည်း ပေါ်မလာခဲ့သဖြင့် နောက်ထပ် ဒေါ်လာ ၃ သောင်းကုန်ခဲ့ရကြောင်း ပက်ထရစ်ရှာက Mise Au Point ရုပ်သံ အစီအစဉ်တွင် ဝန်ခံပြောကြားသွားခဲ့သည်။
ပက်ထရစ်ရှာသည် ဘရတ်ပစ်ဟု ကျားဖြန့်သမားများက လိမ်လည်ကာ ငွေများစွာ ရယူခံရသည့် ပထမဆုံးအမျိုးသမီးမဟုတ်ဘဲ ပြင်သစ်မီလျံနာတစ်ဦး၏ ဇနီးအဖြစ်မှကွာရှင်းရာတွင် နစ်နာကြေးများစွာ ရရှိခဲ့သည့် ပြင်သစ်သူ အန်နီ (၅၃ နှစ်) သည်လည်း ဆေးရုံတွင် ကင်ဆာဝေဒနာခံစားရပြီး ဇနီးဟောင်း အိန်ဂျလီနာဂျိုလီနှင့်ကွာရှင်းမှု စာရွက်စာတမ်းမပြီးပြတ်ခြင်းကြောင့် ငွေများ ထုတ်သုံးမရဟုဆိုကာ AI ဖြင့် ဆေးရုံကုတင်ပေါ်မှ ဘရတ်ပစ်ပုံနှင့် ဗီဒီယိုများဖန်တီးပြီး ချစ်ဟန်ဆောင် လိမ်လည်မှုလည်း ၂၀၂၄ ခုနှစ်က ရှိခဲ့သေးသည်။
ထိုစဉ်က အန်နီသည် ချစ်လွန်းသလို နေမကောင်းသဖြင့် ကရုဏာလည်း သက်ရပြီး ကျားဖြန့်ဘရတ်ပစ်အား ပေါင် ၇၀၀၀၀၀ အထိ ပေးခဲ့ကာ လိမ်လည်ခံခဲ့ရသေးသည်။
ကိုကလင်း
Ref: Thesun
#MeKongNews
#ကျားဖြန့်
#ဘရတ်ပစ်
#ဆွစ်ဇာလန်
#လိမ်လည်မှု
