မဲခေါင်၊ နိုဝင်ဘာ ၂၄
နိုင်ဂျီးရီးယားနိုင်ငံတွင် လက်နက်ကိုင်အကြမ်းဖက်များ ဆိုးသွမ်းမှု၌ ခရစ်ယာန်အသိုင်းအဝိုင်းများအား အဓိကပစ်မှတ်ထားနေမှုကို အစိုးရမှ မျက်ကွယ်ပြု အကာအကွယ်မပေးနိုင်သဖြင့် မိမိစစ်တပ်စေလွှတ် ရလိမ့်မည်ဟု မကြာသေးမီက အမေရိကန်သမ္မတ ဒေါ်နယ်ထရမ့်က သတိပေးပြောဆိုခဲ့ကာမှ ပိုဆိုးသွားခဲ့ပြီး အဆိုးရွားဆုံး ပြန်ပေးဆွဲမှုအဖြစ် ကက်သလစ်ခရစ်ယာန် မူလတန်းနှင့်အလယ်တန်း ကျောင်းမှ ကျောင်းသားကျောင်းသူပေါင်း ၃၀၀ ကျော်ကို နိုဝင်ဘာ ၂၁ ရက်က ပြန်ပေးဆွဲ ခေါ်ဆောင် ခံခဲ့ရသည်။
ယခုဖြစ်စဉ်သည် ၂၀၁၄ ခုနှစ်က နိုင်ဂျီးရီးယားတွင် ဘိုကိုဟာရမ် လက်နက်ကိုင်အကြမ်းဖက်အဖွဲ့ ကျောင်းသူ ၂၇၆ ယောက်ကို ပြန်ပေးဆွဲခဲ့သည့်ဖြစ်စဉ်နောက်ပိုင်း အဆိုးရွားဆုံး ပြန်ပေးဆွဲမှုအဖြစ် ကျောင်းသားကျောင်းသူ ၃၀၃ ယောက်နှင့် ဆရာ၊ ဆရာမ ၁၂ ယောက်ကို ကျောင်းအတွင်း အကြမ်းဖက်ဝင်ရောက်လာပြီး အနီး အနား တောထဲသို့ ခေါ်ဆောင်ပြန်ပေးဆွဲသွားခဲ့ခြင်းဖြစ်သည်။
နိုဝင်ဘာ ၂၁ ရက်နှင့် ၂၂ ရက်နေ့များတွင် တောတွင်းမှ ထွက်ပြေးလွတ်မြောက်လာနိုင်သည့် ကျောင်းသား၊ ကျောင်းသူပေါင်း အယောက် ၅၀ ရှိသော်လည်း ကျောင်းသားကျောင်းသူ ၂၅၃ ယောက် နှင့် ဆရာ၊ ဆရာမ ၁၂ ယောက်ကို ပြန်ပေးဆွဲထားသေးသဖြင့် အသက်အန္တရာယ်စိုးရိမ်နေရကာ ဒေသခံ မုဆိုးများနှင့် အစိုးရတပ်များက တောနင်းရှာဖွေနေသော်လည်း မတွေ့ရသေးဟု သိရသည်။
ယခု တိုက်ခိုက်ပြန်ပေးဆွဲခံရခြင်းသည် နိုင်ဂျီးရီးယားတွင် တစ်ပတ်အတွင်း ၃ ကြိမ်မြောက်ဖြစ်ကာ ပြီးခဲ့သည့် နိုဝင်ဘာ ၁၄ ရက်က ခက်ဘီရှိ မွတ်ဆလင်ကျောင်းသူမိန်းကလေး ၂၀ ကျော်ကို ပြန်ပေး ဆွဲသွားသေးသလို ကွာရာမြို့ရှိ ခရစ်ယာန်ဘုရားကျောင်းတိုက်ခိုက်ခံရမှုတွင်လည်း ၂ ဦးသေဆုံးပြီး ၃၈ ယောက် ပြန်ပေးဆွဲခံခဲ့ရသည်။
အကြမ်းဖက်အဖွဲ့များက မွတ်ဆလင်၊ ခရစ်ယာန်မခွဲခြားဘဲ အားလုံးကို တိုက်ခိုက်နေခြင်းဖြစ်သည်ဟုလည်း ထုတ်ပြန်ထားရာ အမေရိကန်နိုင်ငံခြားရေးဝန်ကြီးဌာနက ပိုမို စိုးရိမ်စရာများဖြစ်လာနေသည်ဟု ထုတ်ပြန်သွားခဲ့သည်။
ယင်းအကြမ်းဖက်အဖွဲ့များသည် တောပုန်းဓားပြများအသွင်ဆောင်ကာ ဘာသာမရွေး ဖမ်းဆီးပြီး ပြန်ပေးဆွဲကာ ပြန်ပေးငွေတောင်းခံမှုများလုပ်ဆောင်နေခဲ့ရာ ၂၀၂၄ ဧပြီလတွင် ပြန်ပေးဆွဲခံမိသားစုများ ပေးခဲ့ရသည့် ပြန်ပေးငွေသည် ဒေါ်လာ ၂ ဘီလီယံကျော်ခဲ့ပြီဟု သိရှိရပြီး နိုင်ငံစီးပွားရေးသည်လည်း ဆိုးရွားလွန်းနေခဲ့ပြီဖြစ်သည်။
ကိုကလင်း
Ref: Thesun
#MeKongNews
#နိုင်ဂျီးရီးယား
#ခရစ်ယာန်ဘာသာဝင်
#ကက်သလစ်
#ဒေါ်နယ်ထရမ့်
