မဲခေါင်၊ နိုဝင်ဘာ ၁၈
လူမှုကွန်ရက်များပေါ်တွင် ယူကရိန်းစစ်သားတစ်ဦး ရုရှား၏ အသေခံ ကာမီကာဇီဒရုန်းတစ်စီး လိုက်လံတိုက်ခိုက်ခံရမှုတွင် ထွက်ပြေးရင်း ပြန်လှည့်ပစ်ရာမှ ကံကောင်းပြီး ထိမှန်ပေါက်ကွဲကာ အသက်ဘေးက လွတ်မြောက်ခဲ့သည့် ဗီဒီယိုတစ်ခု ပျံ့နှံ့နေခဲ့သည်။
ယင်းဗီဒီယိုတွင် နောက်မှလိုက်လာသည့် ကာမီကာဇီဒရုန်းကြောင့် ယူကရိန်းစစ်သားသည် ကားထဲမှ အပြင်ထွက်ကာ ပြေးစဉ် ဒရုန်းသည် ထပ်ချပ်မခွာ နောက်မှ ကပ်လိုက်နေရာ မထူးတော့သည့်အဆုံး နောက်ဆုံး အသက်ရှင်ရန်ကြိုးစားမှုအဖြစ် သေနတ်ဖြင့် လှည့်ကာ ပစ်ခတ်ရာမှ ကားအနီး တစ်စစီ ပေါက်ကွဲသွားသည်ကို ရုပ်ရှင်ဆန်ဆန် သည်းထိတ်ရင်ဖို မြင်တွေ့ခဲ့ရသည်။
ဗီဒီယိုမှတ်တမ်းကို မည်သူက ရိုက်ပြီး မည်သည့်အရပ်တွင်ဖြစ်ပွားသည်ကို မသိရသေးပေ။
ဒုတိယ ကမ္ဘာစစ်အတွင်းက ဂျပန်လေယာဉ်မောင်များ အသေခံတိုက်ခိုက်သည့်ဖြစ်စဉ်ကို နမူနာယူကာ ကာမီကာဇီ ဒရုန်းဟု ရည်ရွယ်ပြီး တစ်ခါသုံးဒရုန်းအဖြစ် အီရန်မှ ဒီဇိုင်းရေးဆွဲ ထုတ်လုပ်ထားသော ရုရှား အသုံးပြုနေသည့် ဒရုန်းများကို သေနတ်ဖြင့်ပစ်ချရန်ဆိုသည်မှာ အလွန် မလွယ်ကူသော၊ မဖြစ်နိုင်လောက်သော အခြေအနေဖြစ်သောကြောင့် ယခုဗီဒီယိုအတွက် အံ့ဩချီးကျူးသူများစွာလည်း ရှိလာနေသည်။
နိုဝင်ဘာလဆန်းပိုင်းက အလံဖြူထမ်းလာပြီး လက်နက်မပါသော အရပ်သားအဖြစ် သက်သေခံသည့် ယူကရိန်းပြည်သူ ၂ ဦးကို ရုရှား FPV ဒရုန်းက စစ်ရာဇဝတ်မှုကျူးလွန်ကာ ပစ်ခတ်ဖောက်ခွဲခဲ့သေးရာ ၂ ဦးစလုံးနှင့်အတူ လိုက်ပါလာသော ခွေးလေးပါ သေဆုံးခဲ့သည့် မှတ်တမ်းများ ထွက်ပေါ်ခဲ့သေးသည်။
ကိုကလင်း
Ref: Thesun
#MeKongNews
#ရုရှား
#ကာမီကာဇီဒရုန်း
#ယူကရိန်း
#အလံဖြူ
