မဲခေါင်၊ နိုဝင်ဘာ ၁၅
ရုရှား၏ ခြိမ်းခြောက်မှုကြောင့် တတိယကမ္ဘာစစ်ကြီးဖြစ်ပွားလာမည်ကို စိုးရိမ်ရေမြင့်မားနေချိန် ဂျာမနီ သည် ၁၈ နှစ်ပြည့်ပြီးသူအမျိုးသားတိုင်း စစ်ဘက်ဆိုင်ရာ ဆေးစစ်မှုခံယူပြီး အရေးပေါ် စစ်မှုထမ်းခြင်း အစီအမံ ပြဌာန်းကြောင်း အတည်ပြုထုတ်ပြန်သွားခဲ့သည်။
ဥရောပ မဟာမိတ်နေတိုးအဖွဲ့အား ရုရှားဘက်မှ ရန်ပြုနေသဖြင့် ဂျာမနီသည် နှစ်စဉ် လူငယ်အမျိုးသား သောင်းချီကို စစ်သင်တန်းပေးပြီး အရန်တပ်အင်အား ပိုတောင့်တင်းလာစေရေး စီမံကိန်းချမှတ်လုပ် ဆောင်နေခြင်းဖြစ်သည်။
ဂျာမန်လက်နက်ကိုင်တပ်ရင်း Bundeswehr သည် နေတိုးအဖွဲ့၏ ပရော်ဖက် ရှင်နယ်စစ်သည် ၂၆၀၀၀၀ ရရှိရေး ပစ်မှတ်အတွက် နောက်ထပ် စစ်သည်သစ် ၈၀၀၀၀ ထပ်မံ မွေးထုတ်ပေးရဦးမည်ဖြစ်သည်။
လက်ရှိတွင် ဂျာမနီ၌ လက်ရှိတာဝန်ထမ်းဆောင်နေသူ ၃၄၀၀၀ သာရှိပြီး မဖြစ်မနေ စစ်မှုထမ်းရမည့် အဆိုကို အသုံးမပြုသော်လည်း ရုရှား၏ ခြိမ်းခြောက်လာမှုကြောင့် အရန်တပ်အင်အား ၂၀၀၀၀၀ အထိ တိုးမြှင့်ထားရှိရန် စီမံကိန်းချမှတ်လုပ်ဆောင်နေခြင်းဖြစ်သည်။
နေတိုး၏ အဓိက အင်အားကြီးဦး ဆောင်နိုင်ငံဖြစ်သော ဂျာမနီသည် အချိန်မရွေး စစ်မှုထမ်းနိုင်မည့်သူများ အသင့်ရှိနေရေးအတွက် ယခုလို ၁၈ နှစ်ပြည့်သည့် အမျိုးသားတိုင်း စစ်ရေးဆေးစစ်မှုနှင့် စစ်နှင့်ကျွမ်းဝင်သူများဖြစ်နေစေရေး လိုအပ်လျှင် ခေါ်သုံးနိုင်မည့် တပ်သားများအဖြစ် စစ်သင်တန်းများလည်း အလျှင်သင့်သလို ပေးသွား မည်ဖြစ်ကြောင်း သိရသည်။
မနှစ်က ဂျာမနီစစ်တပ်အတွင်းမှ ပေါက်ကြားခဲ့သော စာရွက်စာတမ်းများအရ ၁၈ နှစ်ပြည့်သူ အမျိုးသား၊ အမျိုးသမီးအားလုံး စစ်မှုထမ်းခိုင်းရန် အစီအစဉ်ရှိသည်ဟု သိရှိခဲ့ရသေးသည်။
ဂျာမနီ ကာကွယ်ရေးဝန်ကြီး ဘောရစ်ပစ္စတိုးရီးယက်စ်ကလည်း ၂၀၁၁ ခုနှစ်မှ စတင်ကာ မဖြစ်မနေ စစ်မှုထမ်း ရမည်ဆိုသော ဥပဒေကို ပယ်ဖျက်လိုက်မိသည်မှာ ကြီးမားသည့် အမှားဟု ထုတ်ပြန်ပြောဆိုခဲ့ဖူးသည်။
ယနေ့ကမ္ဘာတွင် ရုရှား၏ ခြိမ်းခြောက်နေမှုကြောင့် ဥရောပနိုင်ငံများစွာသည်လည်း စစ်ဘက်ဆိုင်ရာ ဥပဒေသစ်များ ပြဌာန်းခြင်း၊ စစ်မှုထမ်းများ တိုးမြှင့်ရရှိရန် စီစဉ်ခြင်းများ လုပ်ဆောင်နေကြပြီဖြစ်သည်။
ကိုကလင်း
Ref: Thesun
#MeKongNews
#ဂျာမနီ
#စစ်မှုထမ်း
#ဥရောပ
#နေတိုး
#တတိယကမ္ဘာစစ်
