မဲခေါင်၊ နိုဝင်ဘာ ၁၃
ပြည်သူများက လစဥ်ငွေထည့်နေရသည့်ကြားမှ ရှမ်းပြည်တောင်ပိုင်း၊ မိုးနဲမြို့တွင် စစ်မှုထမ်းလူသစ်များကို အိမ်ပေါ်အထိဝင်ရောက်ဆွဲနေပြီး ယင်းတွင် ကျန်းမာရေးမကောင်းသူနှင့် တီဘီရောဂါသည်များကိုပင် အလွတ်မပေးကြောင်း ဒေသခံများက ပြောသည်။
မိုးနဲတွင် ပြည်သူ့စစ်မှုထမ်းကြေးအတွက် တစ်အိမ်လျှင် တစ်လအနည်းဆုံးကျပ်တစ်သောင်း ကောက်ခံနေရာမှ စစ်မှုထမ်းလူသစ်သင်တန်းအတွက် ဟုဆိုကာ အိမ်ပေါ်အထိဝင်ရောက် ဖမ်းဆီးမှုများရှိနေကြောင်း နောင်ကျော့ရပ်နေသူတစ်ဦးက မဲခေါင်သို့ ပြောသည်။
“ ဒီနေ့ လွိုင်မြေရပ်ကွက်ထဲမှာ မိသားစုထမင်းစားနေတုန်း ဝင်ဖမ်းတာ၊ နေ့ဆက်ပဲဖမ်းနေတာ။ ဒီထဲမှာ ကျော်အောင်လား၊ ချစ်ထူးလားမသိဘူး။ တီဘီဖြစ်နေတာ ကျန်းမာရေးမကောင်းဘူး” ဟု ၎င်းကပြောသည်။
ယခု ဖမ်းဆီးခံရသူများထဲတွင် အင်အားချည့်နဲ့နေသည့် တီဘီအဆုတ်ရောဂါသည်ပါ မချန်ရုံသာမက မကြာခင်ပြုလုပ်မည့် ရှမ်းနှစ်သစ်ကူးပွဲတော်မှ ရှမ်းလူငယ်အချို့လည်း အဖမ်းခံနေရသည်ဟု ဒေသခံကဆိုသည်။
ယင်းကဲ့သို့ လူသစ်ဖမ်းဆီးမှုကို ဦးဆောင်သူမှာ ထွေအုပ်မှ ဒုဦးစီးစိုးမိုးအောင်ဖြစ်ပြီး စစ်မှုထမ်း အကျုံးဝင်သူများ အိမ်များတွင်ရှိ၊မရှိ ထောက်လှမ်းသလို ဖမ်းဆီးရာတွင် အဓိကပါဝင်သူနှစ်ဦးမှာ ပြည်သူ့ကာကွယ်ရေးအဖွဲ့မှ မောင်အေးနှင့် မာလာရွှေဆိုသူ အမျိုးသမီးတို့ဖြစ်သည်ဟု ဆိုသည်။
ထို့ပြင် ဖမ်းဆီးရာတွင် စစ်တပ်နှင့်အတူ ကာကွယ်ရေးအဖွဲ့အပြာဝတ်များ ပါဝင်ကာ ဖမ်းမိသူများကို ရဲစခန်းနှင့် ထွေအုပ်ရုံးတွင် ပိတ်လှောင်ထားပြီး မိသားစုအပါအဝင် မည်သူနှင့်မျှ တွေ့ခွင့်မရကြောင်း မြို့ခံများထံမှ သိရသည်။
“ ဟိုနေ့က နောင်ကျော့၊ ကင်တုံ ပြောင်းဖူးစက်ရုံမှာလုပ်တဲ့ ဖိုးလုံးကတော့ သိန်း ၇၀ နဲ့ထွေအုပ် စိုးမိုးအောင်ဆီမှာရွေးရတယ်။ အခုဖမ်းခံရသူတွေတော့မသိသေးဘူး” ဟု ဥယျာဥ်ရပ်နေသူတစ်ဦးက ပြောသည်။
ယခင် အပတ်စဥ်များက ငွေသာထည့်ဝင်ရသော်လည်း ယခုအပတ်စဥ်(၁၉)အတွက် ယင်းကဲ့သို့ အိမ်ထဲအထိ ဖမ်းဆီးနေခြင်းဖြစ်ကြောင်း သိရသည်။
လွိုင်မြေရပ်မှ လက်ရှိအဖမ်းခံရသူများမှာ နိုဝင်ဘာ ၁၀ ရက်တွင် ၂ ဦးနှင့် နိုဝင်ဘာ ၁၁၊ ၁၂ ရက်များတွင် တစ်ဦးစီဖြစ်ကြောင်း သိရသည်။
မိုးနဲမြို့တွင် နောင်ကျော့၊ လွိုင်မြေ၊ ဥယျာဥ်၊ ပေါ့မိုင်း၊ နောင်မြိုင်းနှင့် ကပ်နောင့်ဆည်မြောင်း စသည့် မြို့ပေါ်ရပ်ကွက် ၆ ခုရှိပြီး တစ်ရပ်ကွက်မှာ အိမ်ခြေ ၅၀၀ ကျော် အနည်းဆုံးရှိရာ စစ်မှုထမ်း တစ်ခါခေါ်လျှင် တစ်ရပ်ကွက် ၂ ယောက်နှုန်း ထည့်ပေးရကြောင်း သိရသည်။
#MeKongNews
#မိုးနဲ
#ရှမ်းတောင်
#တီဘီရောဂါသည်
#စစ်မှုထမ်း
