မဲခေါင်၊ နိုဝင်ဘာ ၁၂
နိုဝင်ဘာ ၁၂ ရက် ဒေသစံတော်ချိန် ညနေ ၄ နာရီ မိနစ် ၂၀ အတွင်း မြန်မာနိုင်ငံ ကျားဖြန့်မြို့တော်ဟု နာမည်ကြီးသည့် ရွှေကုက္ကိုလ်မြို့သစ်အား ထူထောင်ခဲ့သူ ရှာဇီးကျန်ကို ထိုင်းအစိုးရက တရုတ်ထံ ပြန်လည်လွှဲအပ်ပေးပို့တော့မည်ဖြစ်ကြောင်း မွန်းလွဲပိုင်းမှ သတင်းစာရှင်းလင်းပွဲပြုလုပ်ကာ ရုတ်တရက် အသိပေးလာခဲ့သည်။
ထိုင်းရဲမှူးချုပ်လည်းဖြစ် တော်ဝင်ရဲတပ်ဖွဲ့ ဒုရဲမင်းကြီးလည်ဖြစ်သော ဂျီရာပေါင်ဖူရီဒက်၊ ထိုင်း အထူးစုံစမ်းထောက်လှမ်းရေးဗျူရို (CIB) မှ ဟာနုမာန်အထူးတပ်ဖွဲ့၊ တရုတ်နိုင်ငံ လုံခြုံရေးအာဏာပိုင် များ ထိုသတင်းစာရှင်းလင်းပွဲသို့ တက်ရောက်ခဲ့ကြပြီး ရဲချုပ် ဂျီရာပေါင်က ဥပဒေစံနှုန်းများနှင့်အညီ စိစစ်ပြီး တရုတ်၏ တောင်းဆိုချက်ကြောင့် နှစ်နိုင်ငံ ပူးပေါင်းဆောင်ရွက်ကာ ရှာဇီးကျန်ကို တရုတ်ထံ ပြန်လည်လွှဲပေးရခြင်းဖြစ်သည်ဟု ရှင်းလင်းပြောကြားသွားခဲ့သည်။
ရှာဇီးကျန်ကို ၂၀၂၂ ခုနှစ် ဩဂုတ်လတွင် ဘန်ကောက်၌ ထိုင်းရဲတပ်ဖွဲ့က ဖမ်းဆီးခဲ့ပြီး ဘန်ကောက် ကလောင်ပရန်ဗဟိုအကျဉ်းထောင်တွင် ချုပ်နှောင်ထားရှိခဲ့ရာ တရုတ်နိုင်ငံသားများစွာထံမှ ဘီလီယံ ပေါင်းများစွာရှိသော ငွေများအား ကျားဖြန့်လုပ်လိမ်လည်ခဲ့သည့် ခေါင်းဆောင်ဟူသော တရုတ်အစိုးရ ၏ စွဲချက်ဖြင့် ဖမ်းဆီးခဲ့ခြင်းဖြစ်ကြောင်း၊ ရှာဇီးကျန်သည် ထောင်ကျနေစဉ်အတွင်း ရှေ့နေမှတစ်ဆင့် မိမိသည် ရွှေကုက္ကိုလ်မြို့သစ် တည်ဆောက်ခဲ့သော အိမ်ခြံမြေတည်ဆောက်ရေးသမားသာဖြစ်ပြီး မည်သည့် ကျားဖြန့်ကိစ္စနှင့်မျှ မသက်ဆိုင်ကြောင်း၊ တရုတ်အစိုးရ၏ နိုင်ငံရေးလုပ်ကြံမှုဖြင့် စွဲချက် တင်ခြင်းဖြစ်ကြောင်း၊ တရုတ် ထောက်လှမ်းရေးနယ်ပယ်တွင် လုပ်ကိုင်ခဲ့ဖူးသဖြင့် ပစ်မှတ်ထားခံရ ခြင်းဖြစ်သည်ဟု ထိုင်းတရားရုံးအဆင့်ဆင့်ထံ အယူခံဝင်ခဲ့ပြီး ပြီးခဲ့သည့်ရက်ပိုင်းကမှ အယူခံတရား ရုံးတော်က တရုတ်တောင်းဆိုသည့် အတိုင်း ပြန်လွှဲပေးရမည်ဟု ဆုံးဖြတ်ခဲ့ကာ ဥပဒေအရ ရက် ၉၀ အတွင်းလွှဲရမည်ဆိုသော်လည်း ရုတ်ချည်း ပြန်လွှဲပို့ရန် ကြေညာလိုက်ခြင်းဖြစ်သည်။
ထိုင်းရဲချုပ် ဂျီရာပေါင်က မိမိတို့ စုံစမ်းစစ်ဆေးမှုများတွင် ရှာဇီးကျန်သည် ရွှေကုက္ကိုလ်မြို့သစ်ကို ဆောက်လုပ်သူခေါင်းဆောင်ဖြစ်သည်ကိုသာ သိရပြီး အခြားကျားဖြန့်စွပ်စွဲချက်များ၊ သက်သေများ ကိုမူ မတွေ့ရဟုဆိုသော်လည်း တရုတ်ဘက်မှ စွဲချက်တင်ပြမှု၊ အင်တာပိုနှင့်အတူ အနီရောင်၀ရမ်း ထုတ်မှု၊ သံသယရှိစရာများစွာ ရှိနေမှုကြောင့် တရားရုံးအဆင့်ဆင့်မှ စိစစ်ပြီး ယခုနောက်ဆုံးနိုင်ငံ တကာ ဥပဒေနှင့်အညီ တရုတ်ထံ ပြန်လည် လွှဲပေးရခြင်းဖြစ်သည်ဟု အင်တာဗျူးတွင် ရှင်းလင်း ပြောဆိုသွားခဲ့သည်။
တရုတ်အစိုးရသည် ကျားဖြန့်ရာဇဝတ်မှုကျူးလွန်သူများကို မည်မျှ ပြစ်ဒဏ်ကြီးလေးစွာ ပေးနေသည် ကို ဥပဒေပြဌာန်းချက်များအရ မြင်တွေ့ရပြီး အမှန်တကယ် ကျားဖြန့်တိုက်ဖျက်မှုများလုပ်ဆောင်နေ သဖြင့် မိမိတို့ ပူးပေါင်းတိုက်ဖျက်ရေးတွင် ပါဝင်ကာ နောက်နေ့တွင်လည်း တရုတ်ကိုယ်စားလှယ်များ နှင့် ကျားဖြန့်တိုက်ဖျက်ရေးအစည်းအဝေး တက်ရောက်ဦးမည်ဟု ဂျီရာပေါင်က ထုတ်ပြန်ပြောဆိုခဲ့ သည်။
ရှာဇီးကျန်ကမူ မနှစ်က အယ်လ်ဂျာဇီးယားနှင့် အင်တာဗျူးခွင့်ရရှိရာတွင် မိမိသည် တရုတ် အမျိုးသားလုံခြုံရေး(ထောက်လှမ်းရေး) အေးဂျင့်အဖြစ် ခိုင်းစေခံခဲ့ရသူဖြစ်ကာ ခါးပတ်လမ်း စီမံကိန်း ဒေသတစ်လျှောက် ကိုလိုနီပြုနိုင်ရေး ဦးဆောင်စေရန် ခိုင်းစေခံရမှုကို လက်မခံဘဲ စီးပွားရေးသမား အဖြစ်သာ ရပ်တည်ခဲ့ရာမှ အငြိုးထားခြင်းခံရပြီး မိမိ နိုင်ငံသားအဖြစ် ခံယူထားသော ကမ္ဘောဒီးယားသို့ ပြန်မပို့ဘဲ တရုတ်သို့ ထိုင်းဘက်မှ ပြန်ပို့လျှင် သတ်ခံရမည်မှာ သေချာသည်ဟု ပြောဆိုခဲ့သည်။
Ref: The Reporters
#MeKongNews
#ကျားဖြန့်
#ရွှေကုက္ကိုလ်
#ထိုင်းနိုင်ငံ
#စောချစ်သူ
