မဲခေါင်၊ နိုဝင်ဘာ ၈
ကမ္ဘာတွင် ကျားဖြန့်ဗဟိုချက်အဖြစ် နာမည်ပျက်နေမှုကြောင့် အမျိုးသားရေးကျားဖြန့်စစ်ပွဲ ကြေညာ ကြောင်းနှင့် နိုင်ငံအတွင်း ဝန်ကြီးဌာန ၆ ခု၊ အခြား အစိုးရနှင့်အရပ်ဘက် အေဂျင်စီအဖွဲ့အစည်း ၉ ခုတို့ နှင့်ပူးပေါင်းတိုက်ဖျက်သွားရန် MOU လက်မှတ်ရေးထိုးကြောင်း ထိုင်းဝန်ကြီးချုပ် အနုတင်က နိုဝင်ဘာ ၆ ရက်၌ ထုတ်ပြန်သွားခဲ့သည်။
အစိုးရ ရုံးတွင် အဆိုပါ စာချုပ်ပွဲအခမ်းအနားကို ကျင်းပခဲ့ရာ အနုတင်က ရှုံးမရသည့် စစ်ပွဲဟု ကြွေးကျော်ပြီး အထူးကြပ်မတ်ဆောင်ရွက်မည့် လမ်းစဉ် ၅ ရပ်ကိုလည်း ထုတ်ပြန်သွားခဲ့သည်။
ဥပဒေရေးရာတာဝန်ရှိသူများအပေါ် တင်းကြပ်သည့် စောင့်ကြည့်မှုလုပ်ဆောင်ကာ ပါဝင်ပတ်သက်သူ ရော လာဘ်ထိုးသူများကိုပါ ထိရောက်စွာဖော်ထုတ်အပြစ်ပေးရန်၊ ပူးပေါင်းဆောင်ရွက်မှုများကို ပိုမို ချောမွေ့စေရေး ထောက်လှမ်းရေးနှင့် စုံစမ်းစစ်ဆေးရေးအဖွဲ့များအကြား သတင်းအချက်အလက်များ ဖလှယ်ရန်၊ ထိုင်းနိုင်ငံကို ငွေကြေးခဝါချမှုဆိုင်ရာ ဒုစရိုက်မှုများအဖြစ် အသုံးချသူများ၏ ဘဏ္ဍာရေး လမ်းကြောင်းများပိတ်ဆို့ကာ ပိုင်ဆိုင်မှုများနှင့်တကွ သိမ်းဆည်းသွားရန်တို့ ပါဝင်သည်။
ယင်းအပြင် ဒုစရိုက်မှုခင်းများ မဖြစ်မီ ကတည်းက AI နည်းပညာသုံးပြီး ရာဇဝတ်ဆိုင်ရာ အမူအကျင့်များကို ရယူကာ ကြားဖြတ်တားဆီးရန် နှင့်ငွေကြေးစီးဆင်းမှုလမ်းကြောင်းများကို ခြေရာခံလိုက်ရန်၊ ပြည်သူများ ကျားဖြန့် အန္တရာယ် သတိရှိစေရေးနှင့် ဗဟုသုတများကြွယ်၀စေရေး Team Thailand အဖွဲ့ဖွဲ့စည်းကာ အသိပညာပေးမှု များလုပ်ဆောင်ရန် လမ်းစဉ် ၅ ရပ်ချမှတ်သည်ဟုလည်း အနုတင်က ပြောကြားသွားခဲ့သည်။
အနုတင်က ဆိုက်ဘာရာဇဝတ်မှုများနှင့် ကျားဖြန့်လိမ်လည်မှုများသည် မိသားစုတစ်ခုတွင် တစ်ယောက်ခံစားရပါက ကျန်မိသားစုအားလုံး ကျပ်တည်းခက်ခဲစွာ ခံစားရစေပြီး နေ့စဉ် နိုင်ငံပေါင်းစုံ မှ လူသားများခံစားနေရကြောင်း၊ ထိုင်းနိုင်ငံ၏ ပုံရိပ်ကို ကျဆင်းစေခြင်းဖြင့် ကုန်သွယ်ရေးနှင့် ရင်းနှီးမြှုပ်နှံမှုလုပ်ငန်းများတွင်ပါ အယုံအကြည် မဲ့လာစေကာ ထိပ်တန်း အမျိုးသားရေးရန်စွယ် ဖြစ်သည်ဟု အနုတင်က ဆက်လက်ပြောကြားသွားခဲ့သည်။
ကျားဖြန့်စစ်ပွဲ ပူးပေါင်းတိုက်ခိုက်သွားရေး MOU လက်မှတ်ရေးထိုးသည့် ၁၅ ဖွဲ့မှာ ဘဏ္ဍာရေးဝန်ကြီး ဌာန၊ နိုင်ငံခြားရေးဝန်ကြီးဌာန၊ ဒစ်ဂျစ်တယ်စီးပွားရေးနှင့်ပြည်သူ့ဌာန၊ စီးပွားကူးသန်းဌာန၊ ပြည်ထဲရေး ဝန်ကြီးဌာန၊ တရားရေးဝန်ကြီးဌာန၊ တော်ဝင်ထိုင်းရဲတပ်ဖွဲ့၊ ငွေကြေးခဝါချမှုတိုက်ဖျက်ရေးရုံး (AMLO)၊ အကျင့်ပျက်လာဘ်စားမှုကော်မရှင် အရပ်ဘက်ကဏ္ဍအဖွဲ့ (PACC)၊ အထူးစုံစမ်းစစ်ဆေးရေးဌာန (DSI)၊ ထိုင်းဗဟိုဘဏ်၊ ငွေချေးသက်သေခံလက်မှတ်နှင့် ငွေလဲလှယ်ရေးကော်မရှင် (SEC)၊ အမျိုးသား ရုပ်မြင်သံကြားနှင့် ဆက်သွယ်ရေးကော်မရှင် (NBTC)၊ ထိုင်းဘဏ်လုပ်ငန်းရှင်များအသင်းနှင့် နိုင်ငံတော်ဘဏ္ဍာရေးအဖွဲ့အစည်းများအသင်းတို့ဖြစ်သည်။
ကိုကလင်း
Ref: The Nation
#MeKongNews
#ကျားဖြန့်
#ထိုင်းနိုင်ငံ
#တိုက်ဖျက်
#နည်းပညာ
