မဲခေါင်၊ နိုဝင်ဘာ ၆
အီဂျစ်ဖာရိုးဘုရင်ကြီး ထရတ်၏ ရွှေမျက်နှာဖုံးနှင့်ကျိန်စာသင့်ခေါင်းတလား၊ သင်္ချိုင်းဂူအပါအဝင် အဖိုးမမြတ်နိုင်သော ရှေးဟောင်းပစ္စည်းပေါင်း ၁၀၀၀၀၀ ကျော်ရှိသည့် ကမ္ဘာ့အကြီးဆုံး ရှေးဟောင်း ပြတိုက်ကြီး The Grand Egyptian Museum ကို နိုဝင်ဘာ ၁ ရက်နေ့မှ စတင်ပြီး အများပြည်သူ ဝင်ရောက်ကြည့်ရှုခွင့်ပြုကာ ဖွင့်လှစ်နိုင်ခဲ့ပြီဖြစ်ကြောင်း သိရသည်။
ပြတိုက်အဝင် ကျက်သရေဆောင်အခန်းတွင် လွန်ခဲ့သည့် နှစ်ပေါင်း ၃၂၀၀၀ က အုပ်စိုးခဲ့သော ဘုရင် ရမ်ဆက်စ် (၂) ၏ ၈၂ တန်လေးသော ရုပ်တုကြီး ခမ်းနားစွာ ထားရှိကာ ရှေးဟောင်းအီဂျစ်ဖာရိုးဘုရင် တူတန့်ဟာမန်၏ ရွှေခေါင်းတလားကြီးလည်း ပြသထားသလို ယင်းပြတိုက်ကြီး ပြီးစီးရန် နှစ်ပေါင်း ၂၀ အချိန်ယူတည်ဆောက်ခဲ့ရသည်။
ဖွင့်လှစ်နိုင်ရန် အကြိမ်ကြိမ်ကြန့်ကြာမှုများ ရှိခဲ့ရသော်လည်း စတုရန်းပေ ၅၀၀၀၀၀ ကျယ်ဝန်းသော ပြတိုက်ကြီးကို နိုဝင်ဘာ ၁ ရက်တွင် ဖွင့်လှစ်နိုင်ခဲ့ပြီဖြစ်ကာ ပြတိုက်ထဲမှပင် တစ်မိုင်အကွာအဝေး၌ ရှိသည့် ပိရမစ်ကြီးများကို လည်ပတ်သူများ မြင်တွေ့နိုင်သည့် မြင်ကွင်းမျိုး ရရှိရန်လည်း ဖန်တီး တည်ဆောက်ထားသည်။
ပြတိုက်အတွင်း လွန်ခဲ့သည့် နှစ်ပေါင်း ၃၀၀၀ ကျော်က ရှိခဲ့သော ရှေးဟောင်းအမွေအနှစ်ပစ္စည်းများ အား ပြခန်း ၁၂ ခုဖွင့်လှစ်ကာ ကြည့်ရှုခွင့်ပြုထားသော်လည်း အီရန်နှင့် အစ္စရေးတို့ ပဋိပက္ခကြောင့် ဘုရင်ကြီး တတ်၏ ပြခန်းကိုမူ ယခုနှစ်နွေရာသီကာလအထိ ပိတ်ထားဦးမည်ဟု ပြတိုက်တာဝန်ရှိသူ များက ဆိုသည်။
ယင်းပြတိုက်ကြီးကို ၂၀၀၅ ခုနှစ်က စတင်တည်ဆောက်ခဲ့ပြီး ၂၀၁၁ ခုနှစ်အာရပ် နွေဦးတော်လှန်ရေးကြောင့် အချိန်အတော်ကြာ ဆောက်လုပ်ရေးလုပ်ငန်းစဉ်များ ရပ်ဆိုင်းခဲ့ရမှုမှ ယခု မှ စတင်ဖွင့်လှစ်နိုင်ခဲ့ခြင်းဖြစ်သည်။
ထိုပြတိုက်အတွင်း လူစိတ်ဝင်စားမှုအရှိဆုံးမှာ တွေ့ရှိသူများ ထူးဆန်းစွာသေဆုံးရသဖြင့် ကျိန်စာသင့် ခေါင်းတလားဟု ခေါ်ဆိုကြသော ဖာရိုးဘုရင်ကြီး တူတန့်ဟာမန်ရုပ်ကြွင်းထည့်ထားရာ ခေါင်းတလား ကြီးဖြစ်သည်။
တူတန့်ဟာမန်သည် Luxor ခေတ်က ဘုရင်ဖြစ်ကာ ၁၉၂၂ ခုနှစ်တွင် အင်္ဂလန်သား ရှေးဟောင်းသုတေသနပညာရှင် ဟိုးဝပ်ကာတာ ၇ နှစ်ကြာ ကြိုးပမ်းရှာဖွေမှုကြောင့် တွေ့ရှိခဲ့ရခြင်း ဖြစ်ကာ တူးဖော်သူ အဆက်ဆက် အကြောင်းအမျိုးမျိုးဖြင့် ထူးခြားစွာ သေဆုံးသဖြင့် ကျိန်စာသင့် ခေါင်းတလားအဖြစ် ဒဏ္ဍာရီသဖွယ် ကမ္ဘာကျော်နေခဲ့ခြင်းဖြစ်သည်။
ကိုကလင်း
Ref: Thesun
#MeKongNews
#အီဂျစ်
#ရှေးဟောင်းပြတိုက်
#ပိရမစ်
#ဖာရိုးဘုရင်
