မဲခေါင်၊ အောက်တိုဘာ ၃၁
ရှမ်းပြည်တောင်ပိုင်း၊ ဓနုဒေသ၊ ရွာငံမြို့နယ်တွင် စစ်ကောင်စီ၏ ထောက်ထိုင် ၂ ဦး ရှင်းလင်းခံရကြောင်း ဒေသခံများထံမှ သိရသည်။
ပြီးခဲ့သည့် အောက်တိုဘာ ၂၈ ရက်၊ ည ၁၀ နာရီခွဲခန့်တွင် လက်နက်ကိုင်တစ်စုက ရွာငံမြို့နယ်၊ကျောက်ပိဇတ် ကျေးရွာလူကြီး ဦးတင့်ဝေနှင့် ပြည်သူ့စစ်အဖွဲ့ဝင် ညီထွဋ်တို့ ၂ ဦးကို ပစ်ခတ်ရှင်းလင်းခဲ့ခြင်း ဖြစ်ကြောင်း သိရသည်။
“ရွာလူထုကတော့ PDF လို့ ပြောတယ်။ ဘယ်အဖွဲ့ဆိုတာတော့ မသိရဘူး။ စစ်တပ်က အခု နယ်မြေရှင်း တောနင်းနေတယ်” ဟု ရွာငံ ဒေသခံတစ်ဦးက ပြောသည်။
ယင်းဖြစ်စဥ်နှင့်ပတ်သက်ပြီး မဲခေါင်မှ စုံစမ်းရာ လက်ရှိအခြေအနေတွင် စစ်ကောင်စီ၏ အတုအယောင်ရွေးကောက်ပွဲကို အားပေးကူညီနေသည့် ထောက်တိုင်များကို ရှင်းလင်းသည်များ ရှိနေကြောင်း ရှမ်းတောင်အခြေစိုက် တော်လှန်ရေးတပ်ဖွဲ့တစ်ခု၏ တာဝန်ရှိသူက ပြောသည်။
“နယ်မြေအကြပ်တည်းကြောင့် ဘယ်အဖွဲ့မှမထုတ်ပြန်ကြဘူးဗျ။ (ရှင်းလင်းခံရသူတွေက) အတုအယောင်ရွေးကောက်ပွဲကို ကူညီနေတဲ့သူတွေပါ” ဟု ၎င်းက ပြောသည်။
ယခုကာလအတွင် ထောက်တိုင်ဖြုတ်သည်များ၊ ပြောက်ကျားစစ်ဆင်မှုများကို မြင်တွေ့ရနိုင်ပြီး စစ်တပ်ကလည်း အရင်နှင့်မတူဘဲ အသေအချာ ပိတ်ဆို့ထားသော်လည်း တော်လှန်ရေးလှုပ်ရှားမှုများ စဥ်ဆက်မပြတ် လုပ်ဆောင်လျက်ရှိကြောင်း ယင်းတာဝန်ရှိသူက ပြောသည်။
ပြီးခဲ့သည့် အောက်တိုဘာ ၆ ရက်ကလည်း ရွာငံမြို့နယ်၊ ကျန်တောကျေးရွာအုပ်ချုပ်ရေးမှူး ဦးဘမွှေးနှင့် မြသိန်းတန်ကျေးရွာနေ ပြည်သူ့စစ် ဦးမျိုးကျော် (ခ) အမောင်တို့ အသတ်ခံခဲ့ရသေးသည်။
ပြီးခဲ့သည့် ၂၀၂၄ ခုနှစ်၊ အောက်တိုဘာ ၁၂ ရက်နေ့ ညပိုင်းကလည်း ရွာငံမြို့နယ်၊ သိမ်ကုန်းကျေးရွာမှာ ကျေးရွာ အုပ်ချုပ်ရေးမှူး ဦးဇော်လွင်နှင့် ဇနီးဖြစ်သူ ဒေါ်ဖြူတို့ကို လက်နက်ကိုင်လူတစ်စုက နေအိမ်အတွင်းထိ သေနတ်နှင့် ဝင်ရောက်ပစ်ခတ်မှု ဖြစ်ပွားခဲ့သည်။
#MeKongNews
#ရွာငံ
#စစ်ကောင်စီ
#ပြည်သူ့စစ်
#တော်လှန်ရေး
#ရှမ်းတောင်
