မဲခေါင်၊ အောက်တိုဘာ ၂၉
၁၉၈၆ ခုနှစ်က အမှတ် (၄) နျူကလီးယားဓာတ်ပေါင်းဖိုကြီး ပေါက်ကွဲခဲ့သဖြင့် နျူကလီးယားကပ်ဘေး သင့်ခဲ့ရာ ချာနိုဘိုင်း နျူကလီးယားစက်ရုံဟောင်းကြီးနားရှိ ခွေးတချို့သည် ထူးခြားဆန်းကျယ်စွာဖြင့် အပြာရောင်တောက်တောက် ပြောင်းလဲလာသည်ကို ယင်းဒေသရှိ ခွေးများနှင့် သဘာ၀ပတ်ဝန်းကျင်ကို လေ့လာနေသည့် Dogs of Chernobyl အဖွဲ့မှ ထုတ်ပြန်လာခဲ့သည်။
မှတ်တမ်းနှင့်တကွ အပြာရောင်တောက်တောက် ပြောင်းလာသည့် ခွေးမှာ ၃ ကောင်ရှိသည်ကို အတည်ပြုမှတ်တမ်းတင်နိုင်သလို ထိုခွေးများကို လိုက်ဖမ်းပြီး DNA စမ်းသပ်မှုများ လုပ်ဆောင်ကာ လူသားများ နျူကလီးယားဒဏ်နှင့် ရေဒီယိုသတ္တိကြွမှုအား မည်သည့်နည်းများဖြင့် ခံနိုင်ရည်ရှိစေရန် အဖြေရှာနိုင်ရေးမှာ အရေးအကြီးဆုံး လေ့လာမှုဖြစ်သည်ဟု ထိုအဖွဲ့အစည်းက ဆိုသည်။
ယင်းဒေသခံ NGO အဖွဲ့အစည်းဖြစ်သော Clean Futures Fund နှင့် Dogs of Chernobyl အဖွဲ့တို့ ပူးပေါင်းပြီး လေ့လာနေမှုအရ ခွေးများသည် ရေဒီယိုသတ္တိကြွမှုဒဏ် မခံရဘဲ ထိုဒေသမှ နျူကလီးယား ဒဏ်သင့် ခွေးမျိုးရိုးစဉ်ဆက်မှ ပေါက်ဖွာလာသည့် တိရစ္ဆာန်များသာဖြစ်ကာ အလွန်ကျန်းမာပြီး ဖြတ်လတ်မှုရှိနေသည်ကို တွေ့ရှိရကြောင်း၊ ထိုခွေးများကို လိုက်ရှာဖမ်းဆီးကာ ပိုးသတ်ခြင်း၊ DNA စစ်ဆေးခြင်းဖြင့် ပိုမိုအကျိုးရှိမည့် သုတေသနပြုမှုများကို လုပ်ဆောင်ရန် ကြိုးစားနေသည်ဟု ထုတ်ပြန်ခဲ့သည်။
ယင်းဒေသရှိ ခွေးများ၊ ဒရယ်များနှင့်အခြား တောရိုင်းတိရစ္ဆာန်များသည် အခြားဒေသမှ တိရစ္ဆာန်များနှင့်ပင် မတူဘဲ မျိုးရိုးဗီဇပြောင်းလဲတိုးတက်မှုများကြောင့် ရေဒီယိုသတ္တိကြွဒဏ်နှင့် နျူကလီးယားဒဏ်ကို ပိုခံနိုင်နေသည်က အနာဂတ်လူသားများ ထိုခံနိုင်ရည်ရှိစေရေးအတွက် သိပ္ပံနည်းကျ လေ့လာ အဖြေထုတ်ရမည်ဟု မြောက် ကယ်ရိုလိုင်းနားတက္ကသိုလ် သုတေသနပညာရှင် ဒေါက်တာမက်သရူးဘရင်းက ထုတ်ပြန်ပြောဆိုခဲ့သည်။
၂၀၂၃ ခုနှစ်က တောင်ကယ်ရိုလိုင်းနားတက္ကသိုလ်နှင့် National Human Genome သုတေသနအဖွဲ့တို့ ချာနိုဘိုင်း နျူကလီးယားအထူးဇုန်အတွင်းမှ ခွေး ၃၀၂ ကောင်ကို DNA စမ်းသပ်ခဲ့ရာ ထိုဇုန်နှင့် ၁၀ မိုင် အကွာမှ ခွေးများ DNA နှင့် ထူးခြားခြားနားနေသည်ကို တွေ့ရှိရကာ မည်သည့်အကြောင်းကြောင့် နျူကလီးယားဒဏ်သင့်ရာဒေသမှ ခွေးများသည် ပိုမိုကိုယ်ခံစွမ်းအားထုတ်လုပ်နိုင်၊ မျိုးပွားနိုင်၊ အသက် ရှင်နေထိုင်နိုင်သနည်းဆိုသည်အား အဖြေထပ်ရှာသွားရမည်ဟု ထုတ်ပြန်သွားခဲ့ဖူးသည်။
ချာနိုဘိုင်းနျူကလီးယားစက်ရုံကြီးပေါက်ကွဲမှုကြောင့် အနီးအနားရှိ ပရီပရတ်မြို့တစ်ခုလုံးကို လူအများ စွန့်ခွာခဲ့ရပြီး ရေဒီယိုသတ္တုကြွ ဓာတ်ရောင်ခြည်သည့်မှုများကြောင့် မျိုးရိုးစဉ်ဆက် နာတာရှည်ရောဂါ များ၊ သန္ဓေသား ဗီဇပြောင်းလဲပြီး ပုံမှန်မဟုတ်သော မွေးဖွားမှုများ၊ သေဆုံးမှုများစွာကို ဖြစ်တည်စေခဲ့သည်။
ကိုကလင်း
Ref: Thesun
#MeKongNews
#ချာနိုဘိုင်း
#နျူကလီးယား
#မျိုးရိုးဗီဇ
#ရေဒီယိုသတ္တိကြွ
