မဲခေါင်၊ အောက်တိုဘာ ၂၁
ရုရှားကို တွန်းလှန်တိုက်ိခုက်နေသည့် ယူကရိန်းအတွက် ရည်ရွယ်ကာ ဒီဇိုင်းထုတ်လုပ်တီထွင်ပေးအပ် ခဲ့သော ဗြိတိန်၏ Raven လေကြောင်းရန် ကာကွယ်ရေးစနစ်သည် ကုန်ကားနောက်တွဲ၊ ဂျက်လေယာဉ် ပျက်များမှ ယူကာ တည်ဆောက်တီထွင်ခဲ့သော်လည်း တိကျမှုနှုန်း ၉၀ ရာခိုင်နှုန်းရှိကာ ရုရှား ဒုံးကျည်နှင့် ဒရုန်းရာချီကို ဖျက်ဆီးနိုင်ခဲ့သည်ဟု သိရသည်။
၆ ဘီး Supacat trucks ကားပေါ်တင်ဆောင်ကာ ရွှေ့လျားနိုင်ပြီး ယူကရိန်းရှေ့တန်းစစ်မျက်မှာပြင်တွင် ယင်း Raven ဒုံးခွင်းစနစ်အား အသုံးပြုနေသော စစ်သည်များထံမှ ရရှိသည့် သတင်းအချက်အလက် အရ အပူအာရုံခံစနစ်သုံး ဝေဟင်မှ ဝေဟင်ပစ်ဒုံးကျည်ဒီဇိုင်းရေးဆွဲထုတ်လုပ်ခဲ့သည့် Raven လေကြောင်းရန်ကာကွယ်ရေးစနစ်မှ ဒုံးကျည် ASRAAM များသည် တိကျမှုနှုန်း မြင့်မားသလို ထိုဒုံးကျည်များ ထုတ်လုပ်မှုကုန်ကျစားရိတ် တစ်ဝက်ကျော်သည်လည်း ရုရှားပိုင်ဆိုင်မှုများအား သိမ်းပိုက်ထားသည့်အထဲမှ ထုတ်ယူသုံးစွဲသဖြင့် ရုရှားအတွက် ၂ ခါနာစေရသည်ဟု The Sun က ဖော်ပြသွား ခဲ့သည်။
ဗြိတိန်သည် တစ်လုံး ပေါင် ၂ သိန်းတန်သည့် လောင်ချာ ၁၃ လုံးနှင့် ဒုံး ၇၅၀ အား ယူကရိန်းတပ်များသို့ ပေးလှူထားခဲ့ရာ ယင်း Raven အသုံးပြု ရှေ့တန်းယူကရိန်းတပ် တပ်မှူး နစ်ခ် (၂၄ နှစ်) က ဇူလိုင်လ နောက်ပိုင်း ရုရှား၏ အရှိန်မြှင့်တင်တိုက်ခိုက်လာမှုနောက်ပိုင်း Shahed ဒရုန်း ၄၁ လုံး၊ Orlan ဒရုန်းလေယာဉ် ၇၄ စီးကို ပစ်ချနိုင်ခဲ့သည်ဟု အတည်ပြုခဲ့သည်။
၂၀၂၃ ခုနှစ်က ယူကရိန်း တပ်လက်ထဲသို့ Raven လေကြောင်းရန်ကာကွယ်ရေးစနစ်ရောက်ရှိပြီးနောက် ဝေဟင်ပစ်မှတ် ၄၀၀ ကျော်ကိုလည်း ဒုံးကျည်များဖြင့်ပစ်ချနိုင်ခဲ့ပြီးဖြစ်ကာ ယင်းဒုံးများသည် အသံထက် ၃ ဆပိုမြန်သလို ၁၆ မိုင်အကွာမှ ပစ်မှတ်အား Lock ချ ပစ်ခတ်နိုင်စွမ်းရှိသည်ဟု သိရသည်။
ထုတ်လုပ်စားရိတ်ပေါင် ၂၀၀၀၀၀ ကုန်ကျခဲ့မှုသည် Shaheds ဒရုန်းတစ်ခုတန်ကြေးထက် ၁၀ ဆကျော်ပိုများသော်လည်း အဆောက်အအုံများကို ပြိုကျကာ လူများစွာသေစေနိုင်သော ဒရုန်းများအား ဖျက်ချနိုင်ခြင်းက ထိုက် တန်သည့် ကုန်ကျမှုဟု သတ်မှတ်ရမည်ဖြစ်ကြောင်းလည်း နစ်ခ်က ပြောသွားခဲ့သည်။
ကိုကလင်း
Ref: Thesun
#MeKongNews
#ဗြိတိန်
#လေကြောင်းရန်ကာကွယ်ရေးစနစ်
#ယူကရိန်း
#ရုရှား
