မဲခေါင်၊ အောက်တိုဘာ ၂၀

မိုနာလီဆာ မူရင်းပန်းချီကားထားရှိရာ ပြင်သစ်နိုင်ငံ ပဲရစ်မြို့ရှိ ကျော်ကြားလှသော သမိုင်းဝင် လုဗ်ရ် (Louvre) ပြတိုက်ကြီးမှ နပိုလီယံ၏ စိန်နှင့်မြလည်ဆွဲအပါ အဖိုးမဖြတ်နိုင်သော ရတနာ ၈ သွယ်ကို အောက်တိုဘာ ၁၉ ရက်က နေ့ခင်းကြောင်တောင် ၇ မိနစ်အတွင်း ဖောက်ထွင်းခိုးယူမှုဖြစ်ပွားခဲ့ကြောင်း သိရသည်။

ပြတိုက်သည် ဒေသစံတော်ချိန် နံနက် ၉ နာရီမှ စတင်ဖွင့်လှစ်ရာ ၉ နာရီ ၃၀ မိနစ်မှ ၉ နာရီ မိနစ် ၄၀ အကြား သူခိုးများရောက်ရှိလာပြီး အဆိုပါ ရတနာ ၈ သွယ်ကို ခိုးယူကာ စကူဒါများစီးနင်း ထွက်ပြေး သွားခဲ့ကြခြင်းဖြစ်သည်ဟု ဆိုသည်။

မျက်မြင်သက်သေနှင့် ရဲတပ်ဖွဲ့ရင်းမြစ်မှ ပြောဆိုမှုအရ အမျိုးသား ၂ ဦးသည် စကူဒါဆိုင်ကယ်ပေါ်တွင် ဖောက်ထွင်းပစ္စည်းများကိုင်ဆောင်လာကာ မှန်များကို ပရိဘောဂ များဖြင့် စက္ကန့်ပိုင်းအတွင်း ရိုက်ခွဲပြီး ရတနာပစ္စည်းများ ယူဆောင်သွားခြင်းဖြစ်ကာ ပဲရစ်ရဲဌာနချုပ်နှင့် မိုင်ဝက်သာဝေးသည့်နေရာမှ ပြတိုက်အား ရုပ်ရှင်ဆန်ဆန် ဖောက်ထွင်းသွားခြင်းဖြစ်သည်ဟု ဆိုသည်။

သူခိုးများသည် Apollo Gallery ပြခန်းမှ ပြင်သစ်သရဖူနှင့်ကျောက်မျက်ရတနာများအပါ ၈ မျိုး ခိုးယူ သွားခဲ့သည်ဟု ပြင်သစ်ယာဉ်ကျေးမှုဝန်ကြီးက ထုတ်ပြန်ခဲ့သည်။

ပါဝင်ခဲ့သည့် ရတနာ ၈ သွယ်ထဲတွင် နပိုလီယံက ဇနီးသည် ဧကရီ မယ်ရီလူးဝစ်အတွက် ပေးခဲ့သည့် စိန်နှင့်မြခြယ်လည်ဆွဲ၊ ၁၉ ရာစုက နပိုလီယံ (၃) ၏ ပြင်သစ်ဧကရီ ယူဂီနီ (Eugenie)၏ သရဖူ၊ ဘုရင်မ မယ်ရီအမ်မီလီ၊ ဘုရင်မ ဟော်တန်ဆီတို့၏ မြနားဆွဲများ (တချိန်က မယ်ရီလူးဝစ် ပိုင်ဆိုင်ခဲ့သော) လည်းပါသွားခဲ့သည်ဟု ဆိုသည်။

သို့သော် ကံကောင်းသည်မှာ သူခိုးများထွက်ပြေးစဉ် နပိုလီယံ ၃ ၏ ဧကရီယူဂီနီ၏ သရဖူသည် ထွက်ကျကျန်နေခဲ့သည့်ကို ပြန်လည်တွေ့ရှိရသည်ဟုဆိုသည်။

ယင်းသရဖူသည် ပြတိုက် ဝက်ဘ်ဆိုက်တွင်ဖော်ပြထားမှုအရ စိန် ၁၃၅၄ လုံးနှင့် မြ ၅၆ လုံးဖြင့် စီခြယ်ထားသည်ဟု ဆိုသည်။

လက်ယာစွန်း National Rally ပါတီခေါင်းဆောင် ဂျော်ဒန်ဘာဒဲလားက နိုင်ငံအတွက် သည်းခံနိုင်စရာမရှိ သော အရှက်တရားကိုဖြစ်စေသည်ဟု ဆိုသလို လက်ယာစွန်း ရီပါဘလစ်ကန်ခေါင်းဆောင် လောရန့် ဝူကွီဇ်ကလည်း ပြင်သစ်နိုင်ငံတော် အခိုးခံလိုက်ရမှုဟု လူမှုကွန်ရက်များပေါ်တွင် ပြင်းထန်စွာ ရှုတ်ချ ရေးသားခဲ့ကြသည်။

ပြင်သစ် သမ္မတ မက်ခရွန်ကမူ လုံခြုံရေးနှင့် စုံစမ်းထောက်လှမ်းရေးတာဝန်ရှိသူ အများအပြားကို ပျောက်ဆုံးပစ္စည်းများနှင့် တရားခံများပြန်လည်ဖမ်းဆီးရမိရေး ခိုင်းစေထားပြီဖြစ် ကြောင်း ထုတ်ပြန်ခဲ့သည်။

လုဗ်ရ်ပြတိုက်သည် ပြင်သစ်ဘုရင်အဆက်ဆက် ထီးနန်းစိုးစံရာအိမ်တော်ဖြစ်ကာ ၁၆၀၀ ပြည့်လွန် နှစ်နှောင်းပိုင်းရောက်မှ ပြင်သစ်ဘုရင် လူဝီ ၁၅ လက်ထက်မှ စွန့်ပစ်ခဲ့သည့် သမိုင်းဝင် အဆောက်အအုံ ကြီးဖြစ်သည်။

ကိုကလင်း
Ref: indiatoday
#MeKongNews
#ပြင်သစ်
#နပိုလီယံ
#ပဲရစ်မြို့
#ပြတိုက်
#ဖောက်ထွင်းခံရ
#မိုနာလီဆာ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)