မဲခေါင်၊ အောက်တိုဘာ ၁၂
အောက်တိုဘာ ၁၀ ရက် ညနေပိုင်းတွင် ထိုင်း လူဝင်မှုကြီးကြပ်ရေးရဲတပ်ဖွဲ့က ထိုင်းနိုင်ငံအတွင်း စာရွက်စာတမ်းအတုများဖြင့် ခိုးဝင်ပြီး မြန်မာဘက်သို့ကူးကာ ကျားဖြန့်လုပ်ငန်းများသို့ သွားရောက်မည့် အာဖရိကသား ၁၃ ယောက်အား ဖမ်းဆီးရမိသလို ၎င်းတို့အား လူမှောင်ခိုသွင်းသည့် ထိုင်းလူမျိုး လူမှောင်ခိုသမားကိုပါ ဖမ်းမိနိုင်ခဲ့သည်။
ယင်းသတင်းကို အောက်တိုဘာ ၁၁ ရက်တွင် ထိုင်းလူဝင်မှုကြီးကြပ်ရေးရဲတပ်ဖွဲ့က ထုတ်ပြန်ပြီး ရှေ့ တစ်ရက်က ဗန်ကားတစ်စီးဖြင့် အာဖရိကရွှေ့ပြောင်းလုပ်သား ၉ ယောက်၊ ခရီးသွားဘတ်စ်ကားဖြင့် အာဖရိကသား ၄ ယောက်တို့ကို ဟတ်ရိုင်ခရိုင် အမှတ် (၂) အာရှလမ်းမကြီးပေါ်မှ ခေါ်ဆောင်လာစဉ် ဖမ်းဆီးခဲ့ခြင်းဖြစ်သည်ဟု ဆိုသည်။
ဗန်ကားနှင့်ပါလာသည့် အာဖရိကသား ၉ ယောက်တွင် ကင်ညာမှ ၅ ယောက်၊ ယုဂန္ဓာမှ ၂ ယောက်၊ နိုင်ဂျီးရီးယားမှ ၂ ယောက်ဖြစ်ကာ ၎င်းတို့အားလုံးသည် မလေးရှားဘက်မှ ထိုင်းနယ်စပ် နာရာသီဝပ်ခရိုင် တာ့ခ်ဘိုင်မြို့ကို တရားမဝင် ကျော်ဖြတ်ဝင်ရောက်လာခြင်းဖြစ်ကာ ပြည်ပခရီးသွား များအဖြစ် အလည်အပတ်လာသည့်ဟန်ဆောင်ကာ တံဆိပ်တုံးနှင့်စာရွက်စာတမ်းအတုများဖြင့် မြန်မာ နယ်စပ်သို့ ရောက်လာခြင်းဖြစ်သည်။
၎င်းတို့အား အဓိက လူမှောင်ခိုကူးပေးသည့် ၅၂ နှစ်အရွယ် ထိုင်းအမျိုးသား နာဆာကန်ဆိုသူက လူမှောင်ခိုမှုအတွက် ဝန်ခံကာ မိမိအား မလေးရှားဘက်မှ ပွဲစားတစ်ဦးက အမေရိကန်ဒေါ်လာ ၄၉၂၀ နှင့်ညီမျှသည့်ငွေကြေးအား ခရစ်ပတိုငွေကြေးဖြင့်ပေးကာ မြန်မာကျားဖြန့်လုပ်ငန်းများဘက်သို့ ပို့ဆောင်ရန် စေခိုင်းခြင်းဖြစ်သည်ဟု ဝန်ခံထွက်ဆိုကြောင်း၊ ယခုမှ ပထမဆုံးအကြိမ်မဟုတ်ဘဲ အာဖရိကရွှေ့ပြောင်းလုပ်သားများကို မြန်မာကျားဖြန့်လုပ်ငန်းများဆီသို့ အကြိမ်များစွာ ပို့ဆောင်ပေး ခဲ့ပြီးဖြစ်သည်ဟုပါ ဝန်ခဲ့ကြောင်း ထိုင်းရဲတပ်ဖွဲ့က ထုတ်ပြန်ခဲ့သည်။
ယင်းအာဖရိကသားများသည် ထိုင်းနိုင်ငံအတွင်း ၃ ရက်တာ အလည်အပတ်ခရီး လာရောက်ခြင်း သာဖြစ်သည်ဟု ယခုအထိ ထွက်ဆိုနေကြရာ မိမိသဘောဆန္ဒဖြင့် မြန်မာဘက် ကျားဖြန့်အလုပ်သွား လုပ်လိုခြင်းထက် အခြေအနေမသိရဘဲ လူမှောင်ခိုကူးခံရသူများ ပိုဖြစ်နိုင်ပြီး အာဖရိကသားများအား မြန်မာကျားဖြန့်သို့ ပို့ဆောင်နေသည့် ကွင်းဆက် လူမှောင်ခိုဂိုဏ်းအား ဖော်ထုတ်နိုင်ရေး ဆက်လက် စုံစမ်းသွားမည်ဟု ထိုင်းရဲတပ်ဖွဲ့က ထုတ်ပြန်သွားသည်။
ကိုကလင်း
Ref:Khaosod
#MeKongNews
#ကျားဖြန့်
#အာဖရိကန်
#ထိုင်းနိုင်ငံ
#လူမှောင်ခို
