မဲခေါင်၊ စက်တင်ဘာ ၂၅
ပြီးခဲ့သည့်ရက်ပိုင်းကမှ ရာဂါဆာတိုင်ဖွန်းမုန်တိုင်း နိုင်ငံမြောက်ဘက်စွန်းသို့ ဝင်ရောက်တိုက်ခိုက်ခဲ့သဖြင့် ၉ ဦးသေဆုံးခဲ့ကာ နာလန်ပြန်ထူရန် မကြိုးစားနိုင်သေးမီမှာပင် ဖိလစ်ပိုင်သို့ စက်တင်ဘာ ၂၆ ရက်၌ နောက်ထပ် အင်အားပြင်းအပူပိုင်းမုန်တိုင်း ဘွာလွိုင် ထပ်မံဝင်ရောက်မည်ဖြစ်သောကြောင့် စာသင်ကျောင်းများပိတ်၊ လေကြောင်းခရီးစဉ်မှား ဖျက်သိမ်းထားရသည်။
ရာဂါဆာမုန်တိုင်းကြောင့် နိုင်ငံမြောက်ပိုင်း ကာဂါယန်ခရိုင်ရှိ ငါးဖမ်းလုပ်သား ၇ ဦး လှေနစ်မြုပ်သေ ဆုံးပြီး သစ်ပင်ကျိုးကျသဖြင့် တစ်ဦးသေဆုံး၊ မြေပြိုမှုကြောင့် ၇၄ နှစ်အရွယ်အမျိုးသားတစ်ဦး အပါအဝင် ၉ ဦးသေဆုံးကာ ၇ဦး ဒဏ်ရာရခဲ့သည်။
စက်တင်ဘာ ၂၄ ရက်တွင် ရာဂါဆာမုန်တိုင်းဒဏ်သင့်ပြည်သူများကို စားနပ်ရိက္ခာနှင့် ရေဘေးကူညီမှု အထောက်အပံ့များပေးရန် ဖိလစ်ပိုင်သမ္မတ ဖာဒီနန်မားကို့စ်က ညွှန်ကြားထားပြီး တစ်ပြိုင်တည်းမှာ ပင် ဖိလစ်ပိုင် တောင်ဘက်စွန်းရှိ အကြီးဆုံးနှင့်လူနေအထူထပ်ဆုံး လူဇွန်ကျွန်းအား ဗဟိုပြုကာ စက်တင်ဘာ ၂၆ ရက်တွင် နောက်ထပ် အင်အားပြင်းအပူပိုင်းမုန်တိုင်း ဘွာလွိုင် ထပ်မံဝင်ရောက်မည် ဟု သတိပေးချက်ထုတ်ပြန်ကာ စာသင်ကျောင်းများဆက်ပိတ်ထားပြီး လေကြောင်းခရီးစဉ်များလည်း ဖျက်သိမ်းခဲ့ရပြန်သည်။
ဖိလစ်ပိုင် သဘာ၀ဘေးအန္တရာယ်တားဆီးကာကွယ်ရေး တာဝန်ရှိသူများက နောက်လာမည့် ဘွာလွိုင် မုန်တိုင်းသည်လည်း အသက်အန္တရာယ်ကို အလွန်ခြိမ်းခြောက်နိုင်သည့်အဆင့်ရှိသော မုန်းတိုင်းဖြစ် ကြောင်းနှင့် လူဦးရေ ၃ သန်းအထိ မုန်တိုင်းဒဏ်သင့်နိုင်ကာ အန္တရာယ်ဇုန်များမှ ရွှေ့ပြောင်းထားကြရန် သတိပေးတိုက်တွန်းထားသည်။
ဖိလစ်ပိုင်နိုင်ငံသည် လူများလုပ်သည့် သဘာ၀ပတ်ဝန်းကျင်ပျက်စီးမှုဒဏ်ကြောင့် ပင်လယ်ရေအပူချိန် မြင့်တက်လာခြင်းနှင့်အတူ တစ်နှစ်လျှင် အင်အားပြင်းမုန်တိုင်း အလုံး ၂၀ အထိ တိုက်ခတ်ခံနေရသဖြင့် မုန်တိုင်းသင့်နေကြဒေသများ၌ နာလန်မထူသော ဆင်းရဲမွဲတေမှုများ ဖြစ်ပွားစေကာ သဘာ၀ဘေးအန္တရာယ်ကာကွယ်ရေး ရန်ပုံငွေများကိုလည်း အလွဲသုံးစား လိမ်လည်အသုံးပြုနေသည့် အမှုများလည်း ဖြစ်ပွားလျှက်ရှိသည်။
ကိုကလင်း
Ref: straitstimes
#MeKongNews
#ဖိလစ်ပိုင်
#ရာဂါဆာမုန်တိုင်း
#ဘွာလွိုင်မုန်တိုင်း
#အပူပိုင်းမုန်တိုင်း
