မဲခေါင်၊ စက်တင်ဘာ ၂၄
တောင်ကိုရီးယားရဲတပ်ဖွဲ့က စက်တင်ဘာ ၂၂ ရက်တွင် ထိုင်းရဲတပ်ဖွဲ့နှင့်ပူးပေါင်းပြီး တောင်ကိုရီးယားပြည်သူများအား ငွေလိမ်ဒုက္ခပေးနေသော နဂါးကျားဖြန့်ဂိုဏ်းကို ပတ္တရားအထိ သွားရောက်ဖြိုခွင်းခဲ့ပြီးဖြစ်ကြောင်း ထုတ်ပြန်သွားခဲ့သည်။
ယင်းကျားဖြန့်ဂိုဏ်းအုပ်စုသည် Longge Company ဟု ထူထောင်ထားသောအုပ်စုဖြစ်ကာ လူပေါင်း ၉၀၀ နီးပါးထံမှ ကိုရီးယားဝမ် ၂၁ ဘီလီယံ (ဒေါ်လာ ၁၅ သန်း သို့မဟုတ် ဘတ် ၄၇၈ သန်း) အား ရင်းနှီးမြှုပ်နှံမှု၊ ချစ်ခင်ဟန်ဆောင်မှု စသည့် လိမ်လည်နည်းအမျိုးမျိုးဖြင့် ရယူခဲ့ကြောင်း တောင်ကိုရီးယားရဲတပ်ဖွဲ့က ဆိုသည်။
ထို့ကြောင့် တောင်ကိုရီးယားအထူးရဲတပ်ဖွဲ့ဝင်များသည် ပတ္တရားသို့ သုံးကြိမ်တိုင် ကြိုတင်လာရောက်ကာ သက်သေများစုစည်းပြီး ထိုင်းရဲတပ်ဖွဲ့၊ နိုင်ငံတကာနှင့်ပူးပေါင်းပြီး ဇွန်လက ကနဦးစစ်ဆင်ရေးအဖြစ် သံသယတရားခံ အယောက် ၂၀ ဖမ်းဆီးနိုင်ခဲ့ကြောင်း၊ ယခု စက်တင်ဘာ ၂၂ ရက်တွင် တစ်ဖန် စုံစမ်းဖော်ထုတ်နိုင်သမျှ နဂါးကျားဖြန့်ဂိုဏ်းဝင် ၂၅ ယောက်ကို ထပ်မံဖမ်းဆီးကာ ဖြိုခွင်းခဲ့ပြီး ခေါင်းဆောင် Jaryong လည်းမိကာ ထိုင်းက ထိန်းသိမ်းထားပြီး ပြန်အလွှတ်ကိုစောင့်နေသည်ဟု တောင်ကိုရီးယား ရဲတပ်ဖွဲ့က ကြေညာခဲ့သည်။
လက်ရှိတွင် ဖမ်းဆီးရမိသူများထဲမှ ၂၁ ယောက်ကို တောင်ကိုရီးယားသို့ ခေါ်ဆောင်ကာ စစ်ဆေး အရေးယူမှု လုပ်ငန်းစဉ်များလုပ်နေကြောင်း၊ ထိုင်းဒုစရိုက်သမားများနှင့် တောင်ကိုရီးယားသားများ ပူးပေါင်းလုပ်ဆောင်သည့် ကျားဖြန့်ဖြစ်ကြောင်း၊ တောင်ကိုရီးယားပြည်သူများ ပိုမိုအားကောင်းလာသည့် ကျားဖြန့်ရန်စွယ်ကို သတိကြီးစွာထားရှိပြီး အလိမ်မခံရစေရန် ဆင်ခြင်ရမည်ဖြစ်ကာ အဆိုပါ ဂိုဏ်းများကို မည်သည့်ညှိနှိုင်းမှုမှမလုပ်ဘဲ အမြစ်ဖြတ်ချေမှုန်းမည်ဟု တောင်ကိုရီးယားရဲတပ်ဖွဲ့ ပြောရေးဆိုခွင့်ရှိသူက ထုတ်ပြန်ခဲ့သည်။
ယင်းကျားဖြန့်ကုမ္ပဏီနာမည် Longge သည် တရုတ်စကားလုံး နဂါး နှင့် အစ်ကိုကြီး ဆိုသည်မှ ဆင်းသက်လာကာ ကိုရီးယားဘာသာစကားအရလည်း ဂိုဏ်းခေါင်းဆောင် Jaryong ကို အသံထွက် အရပေါင်းလျှင် နဂါးဟု အဓိပ္ပါယ်ရသည့် Ryong ဟုသာ ထွက်ဆိုသည်ဟု သိရသည်။
ကိုကလင်း
Ref: Thethaiger
#MeKongNews
#ထိုင်းနိုင်ငံ
#တောင်ကိုရီးယား
#ကျားဖြန့်
#နဂါး
