မဲခေါင်၊ စက်တင်ဘာ ၂၀
ဘီဘီစီသတင်းဌာနအတွက် ၂၈ နှစ်အရွယ်အစီအစဉ်တင်ဆက်သူ ဇာရာမက်ဒါးမော့က သုခဘုံ၏ အမှောင်ဘက်ခြမ်း (The Dark Side of Paradise) အမည်ဖြင့် ၄၄ မိနစ်စာ ရုပ်သံမှတ်တမ်းအား ထိုင်းနိုင်ငံတွင် လာရောက်ရိုက်ကူးရာ ထိုင်းရဲများ၏ ဖမ်းဆီးခြင်းခံရလုနီးပါးအခြေအနေရောက်ခဲ့သည် ဟုဇာရာက နိုင်ငံတကာမီဒီယာတွင် ဖွင့်ချပြခဲ့မှုကို ထိုင်းအာဏာပိုင်များက နိုင်ငံခြားခရီးသွား အဓိက အားကိုးသည့် မိမိတို့နိုင်ငံပုံရိပ်အား ထိခိုက်စေသည်လုပ်ရပ်ဟုဆိုကာ တန်ပြန် ဖြေရှင်းသွားခဲ့သည်။
ယင်းရုပ်သံမှတ်တမ်းသည် ထိုင်းနိုင်ငံအတွင်း ပြည်ပခရီးသွားများအတွက် ပျော်စရာများစွာ ရှိသော် လည်း အမှောင်ဘက်ခြမ်း၌ အန္တရာယ်အလွန်ကြီးသည် ဒုစရိုက်မှုများရှိနေခြင်းအကြောင်း စုံစမ်းဖော် ထုတ်ရိုက်ကူးခဲ့ခြင်းဖြစ်သည်။
တစ်နှစ်လျှင် ဘန်ကောက်ရှိ ဗြိတိန်ကောင်စစ်ဝန်ရုံးသည် ထိုင်းသို့လာလည်ပတ်ပြီး အခက်ကြုံရသည့် နိုင်ငံသားပေါင်း ပျမ်းမျှ ၂၀၀၀ ဝန်းကျင်ကို အကူအညီ ပေးနေရပြီး လိင်ဖျော်ဖြေရေးစီးပွားရေးလုပ်ငန်းများအတွင်း မျက်ကန်းအနေအထားဖြင့် ပါဝင်မိပါက အန္တရာယ်ကြီးကြောင်း၊ ၂ မိနစ်ခန့်ပင် ဗီဇာသက်တမ်းလွန်ပါက ဒဏ်ကြေးဖြင့်မပြီးဘဲ ထောင်ဒဏ်ကျခံ ရကြောင်း ဇာရာက နှိုက်နှိုက်ချွတ်ချွတ်ရိုက်ကူးတင်ပြခဲ့ခြင်းဖြစ်သည်။
ဗြိတိန်နာမည်ကျော် ရုပ်သံစီးရီး Love Island ပြိုင်ပွဲဝင်ဟောင်းလည်းဖြစ်သူ ၂၈ နှစ်အရွယ် ဇာရာက ရိုက်ကူးရေးအဖွဲ့ ဘန်ကောက်ရှိ မလုံ့တလုံအဝတ်အစားများ အများစုဝတ်ဆင်သွားလာရာအရပ်ဖြစ် သည့် Cowboy Soi နေရာတွင် ရိုက်ကူးရေးစတင်ချိန်ကတည်းက ရဲအရာရှိများက ရိုက်ကူးထားသော မှတ်တမ်းများကိုဖျက်ပစ်ရန်နှင့် ရိုက်ကူးရေးပစ္စည်းများကို သိမ်းဆည်းခဲ့ကာ ကံကောင်းသဖြင့်သာ ဖမ်းခံရမည့်အရေးမှ လွတ်ခဲ့ရသည်ဟု ထုတ်ပြန်ခဲ့ခြင်းဖြစ်သည်။
ထိုသတင်းဟိုးလေးတကျော်ဖြစ်နေကာ ထိုင်းသို့ အန္တရာယ်မကင်းသည့်အတွက် ပြည်ပခရီးသွားများ လွန်စွာနည်းပါးစွာလာရောက်သည့်အနေအထားတွင် ထိုင် ခရီးသွားလာရေးနှင့်အားကစားဝန်ကြီးဌာန ဝန်ကြီး နတ်ထရီယာသာဝီဝေါင်က စက်တင်ဘာ ၁၅ ရက်ဖြစ်စဉ်အတွက် အားချင်း စုံစမ်းစစ်ဆေးမှု လုပ်ဆောင်ရာတွင် စျေးဆိုင်ပိုင်ရှင်များက ဘီဘီစီရိုက်ကူးရေးအဖွဲ့ မှတ်တမ်းယူရိုက်ကူးမှုကို စောဒက တက်ကာ ရဲတပ်ဖွဲ့သို့ တိုင်ကြားခဲ့ခြင်းဖြစ်ကြောင်း၊ သောင်ဂလိုရဲစခန်းမှ အရာရှိများသွားရောက်ပြီး ညှိနှိုင်းပေးခဲ့ရာတွင် ပြေလည်သွားကြောင်း သိရသည်။
ရိုက်ကူးရေးအဖွဲ့ထံမှမည်သည့် ပစ္စည်းမှ မသိမ်းသလို ရိုက်ကူးထားသော မှတ်တမ်းများလည်း ဖျက်ပစ်ခြင်းမရှိခဲ့ကြောင်း၊ ရိုက်ကူးရာတွင် နိုင်ငံတစ်နိုင်ငံ၏ ဥပဒေနှင့်အညီ သတ်မှတ်ခွင့်ပြုမူဘောင်အတွင်းမှ ရိုက်ကူးရမည်ကို ဘီဘီစီရိုက်ကူးရေးအဖွဲ့မှ ဘောင်ကျော်ကာ ရိုက်ကူးခြင်းကြောင့်သာ ယခုလို ထိန်းသိမ်းပေးခဲ့ရသည်ဖြစ်ကာ ထိုင်းနိုင်ငံသည် ပြည်ပမှ ရုပ်ရှင်၊ မှတ်တမ်းရိုက်ကူးမှုများက ခရီးသွားများလာရောက်စေသည့် စီးပွားရေးကို အကျိုး ဖြစ်ထွန်းစေသည့်အတွက် မည်သည့်အခါကမှ လွတ်လပ်စွာရိုက်ကူးခွင့်အား မတားမြစ်ခဲ့ကြောင်း ရှင်းလင်းထုတ်ပြန်သွားခဲ့သည်။
ကိုကလင်း
Ref: Khaosod
#MeKongNews
#ထိုင်းနိုင်ငံ
#ရုပ်သံမှတ်တမ်း
#ဗြိတိန်
#BBC
