မဲခေါင်၊ စက်တင်ဘာ ၁၃
နီပေါနိုင်ငံတွင် လူမှုကွန်ရက်များပိတ်ပင်ရာမှ စတင်သည် Gen Z များဦးဆောင်သော လူထုအုံကြွမှုအပြီး နိုင်ငံသမိုင်းတစ်လျှောက် ပထမဆုံးသော အမျိုးသမီးဝန်ကြီးချုပ်အဖြစ် ယခင် တရားရေးချုပ်ဟောင်း ဆူရှီလာကာကီကို စက်တင်ဘာ ၁၂ ရက်နှောင်းပိုင်း၌ ယာယီဝန်ကြီးချုပ်အဖြစ် တင်မြှောက်လိုက်သည်။
လူဦးရေ သန်း ၃၀ ရှိသော နီပေါနိုင်ငံသည် အင်အားကြီးတရုတ်နှင့် အိန္ဒိယတို့အကြား လူးလွန့်ရခက် သည့်အနေအထားဖြင့် နိုင်ငံဆင်းရဲဒုက္ခများစွာ ဖြစ်တည်နေချိန် အစိုးရက လူမှုကွန်ရက်ပိတ်ပင်ရန် ဆုံးဖြတ်ခဲ့သဖြင့် အကျင့်ပျက်ခြစားနေသော အစိုးရအဖွဲ့ဝင်အကြီးများကို လူငယ်ထုက ဦးဆောင်ကာ တောလှန်ဖြုတ်ချရာမှာ အဓိကရုဏ်များဖြစ်ပွားပြီး လူ ၅၀ ကျော် သေဆုံးခဲ့ရသည်။
နီပေါ သမ္မတ၊ စစ်တပ်အကြီးအကဲများနှင့် GenZ ခေါင်းဆောင်များ စည်းဝေးပြီးနောက် တရားရေးချုပ်နှင့် အကျင့်ပျက်ခြစားမှုတိုက်ဖျက်ရေးအဖွဲ့ခေါင်းဆောင်ဟောင်း မစ္စ ဆူရှိလာကာကီကို ယာယီဝန်ကြီးချုပ်အဖြစ် တင်မြှောက်ခဲ့ကာ အမတ်နေရာ ၂၇၅ နေရာရှိသော လွှတ်တော်ကိုလည်း ဖျက်သိမ်းလိုက်ကြောင်း စင်တက်ဘာ ၁၂ ရက်မှာပင် ထုတ်ပြန်ကြေညာခဲ့သည်။
ထိုကြေညာချက်နှင့် အတူ နိုင်ငံအစိုးရသစ်နှင့်လွှတ်တော်သစ် ထူထောင်ရေး ရွေးကောက်ပွဲကို မတ် ၅ ရက်၌ ကျင်းပသွား မည်ဟုလည်း သမ္မတရမ်ချန်ဒရာပူဒဲလ်က အတည်ပြုထုတ်ပြန်သွားခဲ့သည်။
စက်တင်ဘာ ၁၃ ရက်တွင် တာဝန်ရှိသူများသည် တစ်ပတ်အတွင်းပြန်လည် ငြိမ်သက်သွားသော တိုင်းပြည်အခြေအနေကြောင့် မြို့တော် ခတ္တမန္ဒူနှင့် တခြားသော ဒေသများ၌ ကာဖျူးထုတ်ထားမှု နှင့်အခြားသော တင်းကြပ်ထားသည့် စည်းမျဉ်းဥပဒေများကို ဖြေလျှော့ဖျက်သိမ်းပေးခဲ့ပြီဖြစ်သည်။
ပြီးခဲ့သည့် စက်တင်ဘာ ၈ ရက်မှစတင်ဖြစ်ပွားသော နီပေါအရေးအခင်းတွင် ဆန္ဒပြသူ ၂၁ ဦး၊ အကျဉ်းသား ၉ ဦး၊ ရဲအရာရှိ ၃ ဦး၊ အခြား ၁၈ ဦး၊ စုစုပေါင်း ၅၁ ဦး သေဆုံးခဲ့ရပြီး ထောင်များဖောက် ထွက်ပြေးသွားသည့်အထဲမှ ထောင်သား ၁၀၀၀ ပြန်လည်လာရောက်ဖမ်းဆီးခံပြီး ကျန်ရှိ ၁၂၅၀၀ ဦးမှာ ထွက်ပြေးလွတ်မြောက်နေဆဲဖြစ်သည်ဟု ရဲတပ်ဖွဲ့ကြေညာချက်အရ သိရှိရသည်။
နီပေါ ဝန်ကြီးချုပ်နှင့်အစိုးရ ပြုတ်ကျသွားသည်အထိ တော်လှန်ခဲ့သော ယခုအရေးအခင်းသည် နိုင်ငံ စီးပွားရေးသွက်ချာပါဒလိုက်ခြင်းတစ်ခုတည်းကြောင့်မဟုတ်ဘဲ နိုင်ငံရေးခေါင်းဆောင်များသည် အလွန် ချမ်းသာကြွယ်၀သည့် ဇိမ်ခံဘ၀များနှင့်နေထိုင်ကြချိန် လူငယ်များအတွက် အလုပ်အကိုင်အခွင့်အလမ်း မရှိခြင်း၊ အထူးသဖြင့် ကျေးလက်ဒေသများတွင် လုပ်စရာမရှိသဖြင့် သန်းနှင့်ချီသော လူငယ်များ အရှေ့အလယ်ပိုင်း၊ တောင်ကိုရီးယားနှင့် မလေးရှားတို့သို့ သွားရောက်ကာ အောက်ကျနောက်ကျ အလုပ်လုပ်နေရမှုအတွက် Gen Z လူငယ်များက ပေါက်ကွဲပြီး အစိုးရကို အပြီးတိုင် ဖြုတ်ချလိုက်နိုင်ခြင်းဖြစ်သည်။
အမျိုးသမီးဝန်ကြီးချုပ်အဖြစ် ကာကီကို ခန့်အပ်လိုက်ခြင်းအား အိန္ဒိယဝန်ကြီးချုပ် မိုဒီက ဂုဏ်ယူ ကြောင်းနှင့် ညီအစ်ကို၊ ညီအစ်မလို အိမ်နီးချင်းနီပေါနိုင်ငံ၏ ငြိမ်းချမ်းရေး၊ တိုးတက်ဖွံ့ဖြိုးရေးကို အလိုရှိကြောင်း လူမှုကွန်ရက် X တွင် ရေးတင်ခဲ့သည်။ တရုတ်ဘက်ကမူ ဝန်ကြီးချုပ်သစ် ကာကီ ဖြစ်လာခြင်းအတွက် မည်သည့် မှတ်ချက်မှ မပြုသေးပေ။
ကိုကလင်း
Ref: aljazeera
#MeKongNews
#နီပေါနိုင်ငံ
#အမျိုးသမီးဝန်ကြီးချုပ်
#ခတ္တမန္ဒူမြို့တော်
#လူမှုကွန်ယက်
