မဲခေါင်၊ စက်တင်ဘာ ၁၁
ဖခင် သက်ဆင်ကို ထိုင်းတရားရုံးချုပ်က ထောင်အတွင်း ၁ နှစ်ကျခံရန် စီရင်ချက်ချပြီးနောက် စက်တင်ဘာ ၉ ရက်တွင် ဖွေထိုင်းပါတီ အမှုဆောင်ကော်မတီနှင့် လွှတ်တော်တွင်းမှ ပါတီအမတ်များကို ပါတီခေါင်းဆောင် ပေထောင်တန်က အစည်းအဝေးခေါ်ယူကာ နောက်လာမည့်ရွေးကောက်ပွဲအတွက် စတင်ပြင်ဆင်ပြီဟု ထုတ်ပြန်ခဲ့သည်။
လက်ရှိ ဝန်ကြီးချုပ်သစ် အနုထင်သည် ၄ လအတွင်း လွှတ်တော်ဖျက်သိမ်းကာ ရွေးကောက်ပွဲသစ် ကျင်းပပေးရမည်ဖြစ်ရာ နောက်လအတွင်းမှာပင် မိမိတို့ပါတီက မဲဆန္ဒနယ် ၄၀၀ စလုံး၌ ပါဝင်ယှဉ်ပြိုင် မည့် ကိုယ်စားလှယ်လောင်းများအား ရွေးချယ်ပြီးစီးစေမည်ဖြစ်ကြောင်း၊ ပါတီအင်အားအခြေခံ ပိုမို တောင့်တင်းစေရန် မူဝါဒများလည်း စတင်ရွေးဆွဲနေပြီဖြစ်ကာ စွပ်စွဲချက်အမျိုးမျိုး အဆုံးသတ်သွား စေရန်ရည်ရွယ်ပြီး ပေထောင်တန်နှင့် ဖခင် သက်ဆင်တို့ တိုင်ပင်ကာ တရားရုံးချုပ်ချမှတ်သည့် အမိန့် အတိုင်းလိုက်နာရန် ဆုံးဖြတ်ခဲ့ခြင်းဖြစ်သည်ဟု ပါတီပြောရေးဆိုခွင့်ရှိသူ ဒါနူပေါင်ပန်နာကန့်က စက်တင်ဘာ ၉ ရက်နှောင်းပိုင်း ထုတ်ပြန်သွားခဲ့သည်။
နောက်လာမည့်ရွေးကောက်ပွဲအောင်နိုင်ရေး ပထမဆုံးလုပ်ရမည်မှာ အမှုဆောင်ကော်မတီအစည်း အဝေးဖြစ်ပြီး ထိုမှ ရွေးကောက်ပွဲအခြေအနေချင့်တွက်မှုလုပ်ပြီးနောက် သတ်မှတ်အချိန်အတွင်း လုပ်ငန်းဆောင်တာများပြီးစီးရန်၊ ကိုယ်စားလှယ်လောင်းရွေးချယ်ရေးကော်မတီ ကဲ့သို့သော ကော်မတီများထူထောင်ရန် စီစဉ်မည်ဖြစ်ကာ ထိုကော်မတီများတွင် ပါတီအတွေ့အကြုံရင့် ခေါင်းဆောင်များပါဝင်ပြီး နောက်လအတွင်း မဲဆန္ဒနယ် ၄၀၀ စလုံးအတွက် ကိုယ်စားလှယ်လောင်း များ ရွေးချယ်ပြီးမြောက်လောက်မည်ဟု ခန့်မှန်းကြောင်း ဒါနူပေါင်က ရှင်းလင်းထုတ်ပြန်သွားသည်။
ကိုကလင်း
Ref: Khaosod
#MeKongNews
#ထိုင်းရွေးကောက်ပွဲ
#သက်ဆင်
#လွတ်တော်
