မဲခေါင်၊ ဩဂုတ် ၂၀
ဆွီဒင်နိုင်ငံ မြောက်ဘက်စွန်း ကီယူနာမြို့ရှိ သက်တမ်း ၁၁၃ နှစ်ရှိ သမိုင်းဝင် ခရစ်ယာန်ဘုရားကျောင်း ကြီးအား အလုံးလိုက် မြို့သစ်သို့ ရွှေ့ပြောင်းမှုကို ဩဂုတ် ၁၉ ရက်တွင် စတင်ခဲ့ကြသည်။
အာတိတ်စက်ဝိုင်းနှင့် မိုင် ၉၀ အကွာတွင်တည်ရှိသော ကီယူနာမြို့သည် လူဦးရေ ၂၃၀၀၀ သာ နေထိုင်ကာ ဆာမီမျိုးနွယ်ဝင်များအစဉ်အဆက် နေထိုင်ခဲ့ရာမြို့ဖြစ်သလို အမြင့် ၁၁၅ ပေ၊ အလေးချိန် ၆၇၂ တန်ရှိသော ဆာမီမျိုးနွယ်များလက်ရာ ကီယူနာဘုရားကျောင်းကြီးကို ၁၉၅၀ ပြည့်နှစ်မတိုင်မီကတည်းက တည်ဆောက်ခဲ့ခြင်းဖြစ်သည်။
သို့သော် ဆွီဒင်နိုင်ငံတွင် လူနေထိုင်ရာအဆောက်အအုံများအောက်၌ မိုင်းတွင်းလုပ်ကွက်များ လုပ်ဆောင်ခွင့်မပြုသလို လက်ရှိ သံသတ္တုမိုင်းတွင်းများသည်လည်း မြေပြင်အောက် လွန်စွာနက်သည့် နေရာများအထိ တူးဖော်ထုတ်လုပ်နေရာ မြို့ဟောင်းမှ နေအိမ်တိုက်တာများသည် မြေစာပြတ်ရွေ့များကြောင့် အက်ကြောင်းများလိုက်လာပြီး ပြိုကျမည်ဖြစ်သောကြောင့် တစ်မြို့လုံးကို မြို့ဟောင်း၏ အခြားတစ်ဖက်စွန်း မြို့သစ်နေရာသို့ ပြောင်းရွှေ့ကြတော့မည်ဖြစ်သည်။
ဦးဆုံးအနေဖြင့် မြို့တစ်ဖက်စွန်းရှိ မြို့သစ်သို့ ကီယူနာဘုရားကျောင်းပြီးအား အလုံးလိုက် ထရော်လီ များဖြင့် ရွှေ့ပြောင်းမှုအား ဩဂုတ် ၁၉ ရက်တွင် စတင်လုပ်ဆောင်ရာ တစ်နာရီ မီတာ ၅၀၀ နှုန်းဖြင့် ၂ ရက်အတွင်း အပြီးပြောင်းရွှေ့ နေရာချနိုင်ရန် ရည်မှန်းလုပ်ဆောင်နေခြင်းဖြစ်သည်။
ယင်းရွှေ့ပြောင်းမှုတွင် အဓိက မိုင်းကုမ္ပဏီကြီး LKAB က ဦးဆောင်လုပ်ကိုင်ပေးရာတွင် ရွှေပြောင်းခ ပင်လျှင် ဒေါ်လာ ၁ ဘီလီယံ၊ ဆွီဒင် ခရိုနာ ၁၀ ဘီလီယံ (ပေါင် ၇၃၇ သန်း) ကုန်ကျခံရမည်ဖြစ်သည်။
ပထမဆုံးစတင်ရွေ့ပြောင်းမှုတွင် တစ်နာရီအတွင်း ဘုရားကျောင်းကြီးသည် မီတာ ၃၀ အကွာအဝေးသို့ ရောက်ရှိသည်ဟု ဘီဘီစီကဖော်ပြခဲ့သလို သမိုင်းဝင်ဘုရားကျောင်းကြီးအား အလုံးလိုက် မြို့သစ်သို့ ရွှေ့မှုအား ဒေသခံများမဟုတ်သည့် အဝေးမှလူများစွာ လာရောက်လေ့လာကြည့်ရှုနေကြသည်ဟု ဆိုသည်။
နောက်နှစ်ကုန်ပိုင်းတွင် ကီယူနာဘုရားကျောင်းကြီး မြို့သစ်၌ အလုံးစုံ ပြန်လည်ဖွင့်လှစ်နိုင်ရန် ရည်မှန်း ထားသော်လည်း ၂၀၃၅ ခုနှစ်ရောက်မှသာ မြို့ဟောင်းတစ်ခုလုံး မြို့သစ်သို့ ပြောင်းရွှေ့အခြေချမှု ပြီးပြတ်မည်ဟုလည်း သိရှိရသည်။
ကိုကလင်း
Ref: Thesun
#MeKongNews
#ဆွီဒင်
#ခရစ်ယာန်ဘုရားကျောင်း
#သံသတ္တုမိုင်းတွင်း
#ကီယူနာမြို့
