မဲခေါင်၊ ဩဂုတ် ၉
ထိုင်းနှင့်ကမ္ဘောဒီးယားနယ်စပ် ပဋိပက္ခစစ်ပွဲကာလအတွင်း ကမ္ဘာကပင် သိရှိလာသော ကမ္ဘောဒီးယား စစ်တပ်၏ ပြောရေးဆိုခွင့်ရှိသူ ဒုဗိုလ်ချုပ်အမျိုးသမီး မာလီဆိုချီယာတာကို တန်ပြန်တုံ့ပြန်နိုင်ရေး ထိုင်းစစ်တပ်က ၎င်းတို့၏ နယ်စပ်ပဋိပက္ခယာယီ သတင်းပြန်ကြားရေး ပြောရေးဆိုခွင့်ရှိသူအဖြစ် ထိုင်းမင်းသမီးကို တာဝန်ပေးလိုက်ပြီး အနည်းဆုံး ၎င်းတို့မင်းသမီးက ဆိုချီယာထက် ပိုချောသည်ဟုပင် ဒုတိယကာကွယ်ရေးဝန်ကြီး နာတာပေါင်က ဩဂုတ် ၈ ရက်၌ ပြောသွားသည်။
ကမ္ဘောဒီးယား စစ်တပ်ပြောရေးဆိုခွင့်ရှိသူ မာလီဆိုချီယာတာသည် ယခုနယ်စပ်စစ်ပွဲကာလတွင် သတင်းမှားများကိုသာ လုပ်ကြံထုတ်ပြန်နေခဲ့ကာ နိုင်ငံတကာအသိုင်းအဝိုင်းမှ ထိုင်းဘက်ကို အပြစ်ဖို့ နိုင်ရေးကိုသာ ရည်ရွယ်ပြီး လီဆယ်နေသူဟု ထိုင်းနိုင်ငံသားများက စွပ်စွဲမုန်းတီးနေကြသည်။
ထို့ကြောင့် အစိုးရရုံးတွင် ထိုင်းကာကွယ်ရေးဒုဝန်ကြီး နာတာပေါင်က “ဒုဗိုလ်ချုပ် မာလေကို တန်ပြန်ဖို့ ကိုယ်တွေဘက်ကလည်း ထိပ်တိုက်ပြန်ရင်ဆိုင်သွားဖို့ မစ္စပါနက်ဒါကို ပြောရေးဆိုခွင့်ရှိသူအဖြစ် ခန့်အပ်လိုက်ပါတယ်။ လိုအပ်တဲ့ သတင်းမှန်အချက်အလက်တွေအားလုံးကို သူ့ဆီ ပို့ဆောင်ပေးပြီး သူ့ လူမှုကွန်ရက်ကနေ အမှန်တရားတွေကို ထုတ်ပြန်သွားပါလိမ့်မယ်။ အနည်းဆုံးတော့ ကမ္ဘောဒီးယားထက် ကျွန်တော်တို့က ပိုအားသာချက်ရှိသွားပါပြီ။ ကျွန်တော်တို့ဘက်က မာလေထက် ပိုချောတယ်လေ။ ၂၀၀၀ ပြည့်နှစ်က ထိုင်းနိုင်ငံရဲ့ အလှမယ်သရဖူလည်းဆောင်းခဲ့သူပေါ့။ ဟိုဘက် ပြောရေးဆိုခွင့်ရှိသူမှာ ဒီအလှအပတွေ မရှိဘူး” ဟု လှောင်ပြောင်ပြောကြားသွားခဲ့သည်။
၂၀၀၀ ပြည့်နှစ် ထိုင်းအလှမယ်ဖြစ်ပြီးနောက် ရုပ်ရှင်လောကသို့ဝင်ရောက်ကာ အောင်မြင်သော မင်းသမီးဖြစ်လာသလို ဩဇာလွှမ်းမိုးသူအဖြစ် လူမှုကွန်ရက်ပေါ် ထင်ရှားခဲ့သူ ၄၉ နှစ်အရွယ် မစ္စပန်နက်ဒါကလည်း စစ်တပ်အကြီးအကဲများနှင့်တွေ့ဆုံဆွေးနွေးပြီးနောက် သတင်းမှားများဖြန့်နေသည့် ကမ္ဘောဒီးယား စစ်တပ်၏ စပီကာဖြစ်သော မာလေကို တန်ပြန်ရန် မိမိသည်သာ အသင့်တော်ဆုံးဟု သတ်မှတ်ကြ သဖြင့် နိုင်ငံအတွက် အဆိုပါတာဝန်ထမ်းဆောင်ရန် လက်ခံခဲ့သည်ဟု ရှင်းလင်းပြောကြားခဲ့သည်။
ကိုကလင်း
Ref: Bangkokpost
#MeKongNews
#ထိုင်းနိုင်ငံ
#သတင်းပြန်ကြားရေး
#မစ္စပါနက်ဒါ
#ထိုင်းအလှမယ်
