မဲခေါင်၊ ဩဂုတ် ၁
ဩဂုတ် ၁ ရက်နေ့ နံနက်ပိုင်းတွင် ထိုင်းနိုင်ငံခြားရေးဝန်ကြီးဌာနမှ ဦးဆောင်ကာ နိုင်ငံပေါင်း ၁၁ နိုင်ငံမှ သံတမန်များ၊ နိုင်ငံပေါင်း ၂၃ နိုင်ငံမှ စစ်ဘက်မဟာမိတ်အဖွဲ့ပေါင်း ၂၈ ဖွဲ့အား ဖိတ်ခေါ်ပြီး ကမ္ဘောဒီးယားနှင့် ၅ ရက်ကြာဖြစ်ပွားခဲ့သော နယ်စပ်စစ်ပွဲအတွင်း ကမ္ဘောဒီးယားဘက်မှ စတင်ပစ်ခတ်သလို အရပ်သားပစ်မှတ်များကို ပစ်ခတ်ခဲ့သည့် သက်သေများအား ပြသခဲ့သည်။
ဇူလိုင် ၂၄ ရက်နေ့တွင် ကမ္ဘောဒီးယားဘက်မှ စတင်ပြီး ဆီဆာခက်ခရိုင် ကန်သာရာလက်ခ်ရှိ PTT ဆီဆိုင်နှင့် 7 Store ဆိုင်များတည့်တည့်သို့ BM-21 ရော့ကတ်လောင်ချာများ အတွဲလိုက် ပစ်ခတ် ထိမှန်သလို အနီးအနားရှိ အရပ်သားနေအိမ်များပေါ်ပါ ကျရောက်သဖြင့် ၈ ဦးသေဆုံးကာ ၁၁ ယောက် ဒဏ်ရာရရှိခဲ့မှုကိုလည်း သေဆုံးသူများ၏ မိသားစုဝင်များကိုပါ ခေါ်ယူပြီး သက်သေအဖြစ် ပြသခဲ့သလို ကမ္ဘောဒီးယားဘက်မှ မဟုတ်မမှန်စွပ်စွဲချက်များကို ဗြောင်ပြုလုပ်နေခြင်းသာဖြစ်သည်ဟု ရှင်းလင်းသွားခဲ့သည်။
သံတမန်များဖိတ်ခေါ် ပြသရာတွင် ထိုင်း ဒုတိယဗိုလ်ချုပ်ကြီး အနူဖက်ဆီရီမွန်ဒိုး၊ ဒုတိယ စစ်ဦးစီးချုပ်၊ လေတပ် တပ်ချုပ်၊ တော်ဝင်ထိုင်းလေတပ် အရပ်ဘက်ဆိုင်ရာ ဌာနအကြီးအကဲနှင့် နိုင်ငံခြားရေးဝန်ကြီးဌာန ဒုဝန်ကြီးတို့ကိုယ်တိုင် လိုက်ပါပြသခဲ့ခြင်း ဖြစ်သည်။
နှစ်ပေါင်းများစွာ အငြင်းပွားခဲ့သော နယ်စပ်ပိုင်နက်ပြဿနာကြောင့် ဖြစ်ပွားခဲ့သည့် စစ်ပွဲတွင် ကမ္ဘောဒီးယားဘက်မှ နိုင်ငံတကာသံတမန်များကို ဇူလိုင် ၃၀ ရက်ကတည်းက နယ်စပ် စစ်တလင်း နေရာများသို့ ခေါ်ဆောင်ကာ ထိုင်းဘက်မှ အကြမ်းဖက်ပြီး အရပ်သားပစ်မှတ်များကို လေကြောင်းတိုက်ခိုက်မှု လုပ်ခဲ့သည်များအား သက်သေအဖြစ် ပြသခဲ့သောကြောင့် ထိုင်းမီဒီယာများနှင့် မျိုးချစ်များက နိုင်ငံတကာ မျက်နှာသာပေးမှုရရေး ထိုင်းသည် အမြဲ ကမ္ဘောဒီးယားနောက် ခြေတစ်လှမ်း နောက်ကျနေသည်ဟု ဝေဖန်မှုများလည်း ရှိနေသည်။
ကိုကလင်း
Ref: Khaosod
#MeKongNews
#ထိုင်းနိုင်ငံ
#ကမ္ဘောဒီးယား
#နယ်စပ်စစ်ပွဲ
#သံတမန်
#ဖိတ်ခေါ်ပြသ
