မဲခေါင်၊ ဇူလိုင် ၂၅
ဇူလိုင် ၂၅ ရက် ဒေသစံတော်ချိန် နံနက် ၄ နာရီခွဲကတည်းက ထိုင်း-ကမ္ဘောဒီးယားနယ်စပ် နေရာများစွာတွင် နှစ်ဖက်စစ်တပ်များ စစ်ပွဲ ဒုတိယနေ့တိုက်ခိုက်မှုများ ပြင်းထန်ခဲ့ပြီး နယ်စပ်ဒေသ စစ်ဇုန် အတွင်းမှ ပြည်သူများ ရှောင်ရှားရန် ထိုင်းအစိုးရက သတိပေးထုတ်ပြန်ခဲ့သည်။
မနက်မိုးမသောက်မီ ပိုင်နက်အငြင်းပွား ပရာဝီဟီယာဘုရားကျောင်းနှင့် ချွန်ဘွတ်ခ်ဒေသတို့၌ ကမ္ဘောဒီးယားစစ်သားများ တင့်ကား ၆ စီးဖြင့် တက်လာပြီး ချောင်ဘလော့တန်အရပ်တွင် တပ်စွဲထားသည့် ထိုင်းစစ်သားများကို ပစ်ခတ်တိုက်ခိုက်မှုများ ပြုလုပ်ရာမှ အပြန်အလှန်ပစ်ခတ်ခဲ့ကြကြောင်း၊ ချွန်ဘွတ်ခ် ဒေသတွင် ထိုင်းအမြောက်တပ်မှ လက်နက်ကြီးပစ်ကူးများပေးပြီး ကာဆာအက်ဆူအက် အရပ်တွင် ကမ္ဘောဒီးယားဘက်မှ စစ်ကြောင်းထိုးတက်လာကြောင်း၊ ထို့ကြောင့် ထိုင်း အမှတ်(၂) ကြည်းတပ်ဒေသ အထူးခြေလျင်တပ်ဖွဲ့မှ ပြန်လည်ပစ်ခတ်တိုက်ခိုက်ခဲ့ကြောင်း ထိုင်းတော်ဝင်တပ်မတော်က ထုတ်ပြန်သည်။
နံနက် ၆ နာရီ ၂၉ မိနစ်တွင် ကမ္ဘောဒီးယားတပ်များသည် တောင်ကုန်းအမှတ် ၄၆၉ ကို တက်သိမ်းရန် စစ်ကြောင်းထိုးလာသလို ချွန်ဘွတ်ခ်နယ်တောင်ပိုင်း တောင်ကုန်းအမှတ် ၄၀၈ ကိုလည်း တက်သိမ်းရန် BM 21 ရော့ကတ် လောင်ချာများဖြင့် ပစ်ခတ်ကြောင်း၊ ချွန်ခါဆွန်နယ်စပ်ဒေသ၊ ဆမ်တေ့ခ်နယ်မြေတွင်လည်း နှစ်ဖက် တိုက်ခိုက်မှုများ နေရာအနှံ့ရှိခဲ့သဖြင့် ထိုင်းဘက်မှ လက်နက်ကြီးများဖြင့် ပစ်ခတ်တုံ့ပြန်ခဲ့သည်ဟု ထိုင်းတော်ဝင်တပ်မတော် Update ဖေ့စ်ဘုတ် Page ၌ ယနေ့မနက် ရေးတင်ခဲ့သည်။
ကိုကလင်း
Ref: The Nation
#MeKongNews
#ထိုင်းစစ်တပ်
#ကမ္ဘောဒီးယား
#နယ်စပ်စစ်ပွဲ
#ပရာဝီဟီယာဘုရားကျောင်း
