မဲခေါင်၊ ဇူလိုင် ၂၁
ထိုင်းနိုင်ငံဘုန်းကြီးလောကတွင် ဒကာမ ဂေါ့ဖ်ဟု နာမည်ကြီးနေသော ၃၅ နှစ်အရွယ် အမျိုးသမီးနှင့် ဘုန်းကြီးများ လိင်ကိစ္စ၊ ငွေကိစ္စအရှုပ်အထွေးများ ဟိုးလေးတကျော်ဖြစ်နေချိန် ထိုအမှုနှင့်မဆိုင်သော်လည်း ဝါပိုမိုကြီးသည့် ဘုန်းကြီးများ ကျောင်းတည်ဆောက်ရေးစီမံကိန်းများမှ ဘတ်သန်းရာပေါင်းများစွာ အလွဲသုံးစားမှု လုပ်ထားမှု ထပ်မံ ပေါ်ပေါက်လာပြန်သည်။
ယခင်ကတည်းက ဘာသာရေးဆိုင်ရာ အဆောက်အအုံများတည်ဆောက်မှုတွင် ဝါကြီးထိုင်းဘုန်းကြီးများ ငွေကြေးအလွဲသုံးစားလုပ်နေကြောင်း သတင်းထွက်ခဲ့သော်လည်း အတိအလင်းမဖော်ပြခဲ့ကြဘဲ ယခု ဒကာမ ဂေါ့ဖ်ကိစ္စ ပေါ်ပေါက်လာပြီးနောက် ငွေကြေး လွှဲပြောင်းမှုများအား အသေးစိတ်ပြန်စစ်ဆေးရာ ဂေါ့ဖ်နှင့်ပတ်သက်ခဲ့သည့်ထဲမှ ဘုန်းကြီးတချို့အပြင် ထိုထက်ပိုဝါတော်မြင့်သည့် ထိပ်တန်း အဆင့်ဘုန်းကြီးများ ဘတ်သန်းရာချီသော အလွဲသုံးစားမှုများ ထပ်မံပေါ်ပေါက်လာသည်ဟု ဗဟို ထောက်လှမ်းရေးဗျူရို ဒု ကော်မရှင်နာ ရဲမှူးချုပ် ဂျာရွန်ကီယက် ပန်ကဝီးက ဇူလိုင် ၁၈ ရက်တွင် အတည်ပြုထုတ်ပြန်သွားသည်။
အမှုသွားအမှုလာ အနှောင့်အယှက်ဖြစ်စေနိုင်သောကြောင့် မည်သည့် ကိုယ်တော်များ ထို အမှုတွင် ပါဝင်ပတ်သက်နေသည်ဆိုခြင်းကို မထုတ်ပြန်သေးသော်လည်း သက်သေများ အခိုင်အမာရရှိထားပြီး ဖြစ်သောကြောင့် မကြာမီ သာသနာဖျက် ဘုန်းကြီးများ အမှုကို ထုတ်ပြန်နိုင်မည်ဟု ပန်ကဝီးက ထုတ်ပြန် ပြောဆိုခဲ့သည်။
ယခုအမှုမတိုင်မီ ထရိုင်သော့ဆာသပ်ဘုန်းကြီးကျောင်းမှ ကျောင်းထိုင်ဟောင်း ဝါချီရာပါမွန့်ခ် ဘွဲ့တော် ရခဲ့သော ကိုယ်တော်သည် ဘတ် ၃၈၅ သန်း အလွဲသုံးစား လုပ်ခဲ့မှုကြောင့် ဖမ်းဆီးခဲ့ရသေးပြီး ထိုအမှု တွင်လည်း အခြားဘုန်းကြီးများ ပါဝင်ပတ်သက်မှုရှိနေသည့်အတွက် စုံစမ်းစစ်ဆေးမှုများ ဆက်လက် လုပ်ဆောင်နေဆဲဖြစ်သည်။
ကိုကလင်း
Ref: Bangkokpost
#MeKongNews
#ထိုင်းနိုင်ငံ
#ဘုန်းကြီး
#အလွဲသုံးစားမှု
#ဘာသာရေး
