မဲခေါင်၊ ဇူလိုင် ၁၄
ဇူလိုင် ၁၃ ရက်တွင် ကမ္ဘောဒီးယားအာဏာရှင် ဝန်ကြီးချုပ်ဟောင်း ဟွမ်ဆန်က နှစ်ပေါင်းများစွာ မိသားစုလိုက် မိတ်ဆွေများအဖြစ် ရင်းနှီးခဲ့သည့် ထိုင်းဝန်ကြီးချုပ်ဟောင်း သက်ဆင်သည် လက်ရှိ ထိုင်းနိုင်ငံကို အမိန့်ပေးထိန်းချုပ်ထားသူဖြစ်ကာ ထိုင်းတွင် ၎င်းကြောင့် ကျားဖြန့်လုပ်ငန်းများ ပိုမို တိုးပွားပျံ့နှံ့လာနေသည်ကို ကမ္ဘာ့ခေါင်းဆောင်များ၊ အထူးသဖြင့် အာဆီယံခေါင်းဆောင်များ သိစေ သင့်သည်ဟု ဖနွမ်ပင်ပို့စ်မီဒီယာမှတစ်ဆင့် ပြောဆိုသွားသည်။
ထိုင်းနှင့်နယ်စပ်ချင်းထိစပ်နေသည့် ကျားဖြန့်မြို့ဟု နာမည်ကျော်နေသော ပရီယာဗီဟီယာသို့ ဇွန်၂၇ က ရောက်ရှိစဉ်တွင် ဟွမ်ဆန်က ထိုင်းနိုင်ငံတစ်နှံတစ်လျှား ကျားဖြန့်လုပ်ငန်းများ များစွာတိုးပွားလာနေပြီး ဘန်ကောက်သည် တရားမဝင်ကျားဖြန့်နှင့် ငွေကြေးခဝါချမှု အသိုက်ဖြစ်နေပြီဖြစ်ကြောင်း၊ ထိုင်းမှ ကျားဖြန့်လုပ်ငန်းများ ကမ္ဘောဒီးယားသို့ ပျံ့နှံ့စိမ့်ဝင်လာခြင်းဖြစ်ကြောင်း ပြောဆိုခဲ့သည်။
“ဇူလိုင် ၉ ရက်နေ့မှာပဲ သက်ဆင်ကိုယ်တိုင်က ရုပ်သံအင်တာဗျူးမှာ ဘန်ကောက်ဟာ ကျားဖြန့် ထိပ်တန်းခေါင်းဆောင်တွေ ဇိမ်ခံအိမ်ယာတွေနဲ့ နေတဲ့ ရပ်ဝန်းဖြစ်ကြောင်း၊ ဘတ်ဘီလီယံချီတဲ့ အိမ်တွေနဲ့ ဘန်ကောက်မှာနေထိုင်ကြပြီး အိမ်နီးချင်းနိုင်ငံတွေဆီ အတားအဆီးမရှိ လွတ်လပ်စွာ သွားလာနေနိုင်ကြတယ်လို့ သူပဲ ပြောခဲ့တာ၊ ဒါကြောင့် အာဆီယံ ခေါင်းဆောင်တွေကို သူ့စကားအရ ထိုင်းသည်သာ ကျားဖြန့် ဗဟိုချက်ဖြစ်တယ်လို့ ဝန်ခံခဲ့တာကို သိစေအပ်တာပါ။ ထိုင်းနိုင်ငံရေးသမားတွေ ကမ္ဘောဒီးယားကို ကျားဖြန့်ဗဟိုချက်လို့ စွပ်ဆွဲနေတာတွေရပ်တန်းကရပ်ပါ။ သူတို့ပဲ မျက်ကန်းလို နေပြီး သူတို့နိုင်ငံကိုယ်တိုင်က ရွှေတြိဂံကထွက် မူးယစ်ဆေးဝါးတွေ၊ ကျားဖြန့်လုပ်ငန်းတွေအကုန်လုံး ကို ငြိမ်းချမ်းသာယာ၀ပြောစေရေး လုပ်ဆောင်နေတဲ့နိုင်ငံဖြစ်တယ်ဆိုတာ မေ့မနေကြဖို့လိုတယ်” ဟု ဟွမ်ဆန်က ပြောသွားခဲ့သည်။
ထို့အပြင် သက်ဆင်သည် နယ်စပ်ဂိတ်များအား ပိတ်ပင်မှုအတွက် အဓိက အမိန့်ပေးသူဖြစ်သည်မှာ သေချာပြီး အသက်ရှူအောင့်ပြိုင်ပွဲတွင် ပိုမိုအောင့်နိုင်သူသာ အနိုင်ရမည်ဟု ဆိုလိုရင်းမှာ နယ်စပ်များ ပိတ်ထားမှုတွင် ဒုက္ခရောက်ခြင်းကို ပိုတောင့်ခံနိုင်သည့် ကမ္ဘောဒီးယားနှင့်ထိုင်းတို့ တစ်နိုင်ငံအနိုင်ရ မည်ဟု ဆိုလိုကာ ထိုသို့ပြောဆိုပြီးသည်နှင့် နယ်စပ်ဂိတ်များ ထိုင်းပိတ်ပင်လိုက်ခြင်း၊ ပြည်ထဲရေးဝန်ကြီး၊ ဒုဝန်ကြီးချုပ်၊ ဘွန်ကျိုင်ထိုင်းပါတီမှ အနူတင်ကို ရာထူးမှ ဖယ်ရှားမည့်အကြောင်းလည်း မိမိအား ဖုန်းဆက်တိုင်ပင်ပြီးသည်နှင့် အမှန်တကယ် ဖယ်ရှားခဲ့မှုများကိုကြည့်လျှင် ထိုင်းအာဏာသည် သက်ဆင်လက်ထဲတွင်သာ အားလုံးရှိနေကြောင်း၊ ကိုယ့်နိုင်ငံကိုပင် သစ္စာဖောက်သူသည် မိမိလို သူငယ်ချင်းအပေါ် သစ္စာဖောက်ခြင်းမှာ မဆန်းကြောင်း ဟွမ်ဆန်က ဖနွမ်ပင်ပို့စ်မှတစ်ဆင့် ထုတ်ပြန်ပြောဆိုသွားခဲ့သည်။
ကိုကလင်း
Ref: phnompenhpost
#MeKongNews
#ထိုင်းနိုင်ငံ
#သက်ဆင်
#ကျားဖြန့်
#ကမ္ဘောဒီးယား
