မဲခေါင်၊ ဇူလိုင် ၈
အွန်လိုင်း လောင်းကစားနှင့် ကျားဖြန့်လုပ်ငန်းများကို ထိုင်း-မြန်မာ နယ်ခြားကော်မတီ စကားပြန် ဦးဘိုလေးနာမည်ဖြင့် အကာအကွယ်ယူဖွင့်လှစ်ထားပြီး အလုပ်သမား ၃၀၀ ကျော် နေ့ဆိုင်း ညဆိုင်းလုပ်ကိုင်နေကြောင်း တာချီလိတ် ဒေသခံများထံမှ သိရသည်။
အွန်လိုင်း လောင်းကစားနှင့် ကျားဖြန့်လုပ်ငန်းကို ဆန်ဆိုင်း(က)ရပ်ကွက်အတွင်းရှိ နယ်ခြားကော်မတီ ဘာသာပြန်ဦးဘိုလေး၏ နေအိမ်ရှေ့ ဟိုတယ်ဝန်းအတွင်းနှင့် မယ်ဆိုင်ချောင်းအနီး ဆန်ဆိုင်းပြည်သူ့စစ်ဂိတ်အနီးမှ (၃)ထပ်တိုက်တွင် ဖွင့်လှစ်လုပ်ကိုင်နေခြင်း ဖြစ်သည်။
အွန်လိုင်းလောင်းကစားလုပ်ငန်းကို ထိုင်း-မြန်မာ နယ်ခြားကော်မတီ၏ စကားပြန်ဦးဘိုလေးနာမည်ခံထားခြင်း ဖြစ်ပြီး သက်ဆိုင်ရာမှ ဝင်ရောက်ဖမ်းဆီးမှုများ ရှိလာသည့်အခါ အလုပ်သမားတွေကို ပြန်လည်ညှိနှိုင်းပြီး ချက်ချင်းပြန်လွှတ်ပေးကြောင်း သိရသည်။
“အောင်ရေဆေးခုံလမ်းကြားက သူ့အိမ်ရှေ့ဟိုတယ်မှာဆိုရင် ဆိုင်ကယ်တွေကားတွေအပြည့်ဘဲ အွန်လိုင်း အလုပ်သမားတွေက၊ နောက်ပြီး ရေချောင်းဘေးနားက အစိမ်းရောင်(၃)ထပ်တိုက်မှာ အွန်လိုင်းလုပ်တဲ့သူ (၂၀၀)လောက်ရှိတယ်။ ညနေ ၇ နာရီဆို အလုပ်ဆင်း အလုပ်ဝင်တဲ့သူတွေနဲ့ တစ်မြို့လုံး တစ်ခြားအွန်လိုင်း အလုပ်တွေ မတွေ့ရဘူး၊ ဘိုလေးနာမည်ခံထားတဲ့ဟာတွေဘဲ ရှိတယ်” ဟု ဒေသခံတစ်ဦးက ပြောသည်။
ထိုင်း-မြန်မာ နယ်ခြားကော်မတီသည် သက်ဆိုင်ရာ နှစ်နိုင်ငံနယ်မြေများမှ စစ်ဗျူဟာနှင့် မြို့နယ်အုပ်ချုပ်ရေးမှူးများမှ ကော်မတီအတွင်း ပါဝင်ဖွဲ့စည်းထားခြင်းဖြစ်ပြီး စစ်ကောင်စီ၏ ဗိုလ်ကြီးအဆင့်ရှိသူတစ်ဦးက အတွင်းရေးမှူးတာဝန်ယူကာ နှစ်နိုင်ငံ နယ်စပ်အရေး ဆောင်ရွက်နေခြင်း ဖြစ်သည်။
စကားပြန်ဘိုလေးကို နယ်ခြားကော်မတီမှ တရားဝင်ခန့်အပ်ထားခြင်း မရှိသည့်အကြောင်း ၂၀၁၉ ခုနှစ်က သက်ဆိုင်ရာ စစ်ဗျူဟာမှ မဲခေါင်သတင်းဌာနကို အတည်ပြုထားသော်လည်း နောက်ပိုင်းတွင် တာဝန်ခံအဖြစ် ပြောဆိုသုံးနှုန်းနေသည်ကို တွေ့ရသည်။
၂၀၂၂ ခုနှစ်တွင်လည်း နယ်ခြားကော်မတီ၏ စကားပြန်အလုပ်ကို ကူညီလုပ်ကိုင်နေသည့် ဦးဘိုလေး၏ တူဖြစ်သူတစ်ဦး ထိုင်းနိုင်ငံ၊ မယ်ဆိုင်မြို့တွင် TBC တံဆိပ်တပ်ထားသည့် မော်တော်ယာဉ်နှင့်အတူ နေအိမ်အခန်းငှါးအတွင်း မူးယစ်ဆေးဝါးအမြောက်များဖြင့် ဖမ်းဆီးခံခဲ့ရကာ ယခုလက်ရှိ ထိုင်းနိုင်ငံအကျဉ်းထောင်အတွင်း ပြစ်ဒဏ်ကျခံနေရသည်။
ထိုင်း-မြန်မာ နယ်ခြားကော်မတီ(TBC)တံဆိပ်ကပ်ထားသည့် လိုင်စဉ်မဲ့ နောက်ဆုံးပေါ် TOYOTA land cruiser ကားဖြင့် ချစ်ကြည်ရေးတံတားပေါ်တွင် အစစ်ဆေးခံတာမရှိ တရားမဝင်ငွေကြေးသယ်ဆောင်ခြင်း၊ လူသယ်ဆောင်ပေးခြင်းများနှင့် လက်နက်ကူးခြင်းများကိုလည်း နယ်ခြားကော်မတီအကာအကွယ်အောက်မှ ပြုလုပ်နေကြောင်း သိရသည်။
စကားပြန်ဦးဘိုလေးသည် ထိုင်း-မြန်မာ နယ်ခြားကော်မတီ၏ အကာအကွယ်ယူပြီး အွန်လိုင်းကျားဖြန့်လုပ်ငန်းများကို အကာအကွယ်ပေးနေသည့်အပြင် ထိုင်းနိုင်ငံသား တရားခံပြေးမူးယစ်ရာဇာများကိုလည်း လိုင်းကြေး ဘတ်သန်းချီရယူ ကာကွယ်ပေးထားကြောင်း မဲခေါင်းသတင်းဌာနမှ ခိုင်လုံသည့် သက်သေများ ရရှိထားသည်။
#MeaKongNews
#ကျားဖြန့်
#အွန်လိုင်း
#TBC
#ဘိုလေး
