မဲခေါင်၊ ဇွန် ၁၆
ဗြိတိန်သည် နံပါတ်တစ် ရန်သူဖြစ်သည်ဟု ရုရှားမှ သတ်မှတ်ပြီးနောက် အစိုးရအနေဖြင့် နိုးထချိန်တန်ပြီဖြစ်ကာ အချိန်မနှောင်းမီ ကာကွယ်ရေးနှင့် လုံခြုံရေးအင်အားကို အဆင့်မြှင့်တင်ရန် ဘဏ္ဍာတိုက်ဖွင့်မှ ဖြစ်မည်ဟု ဗြိတိန်ကာကွယ်ရေးဝန်ကြီးဟောင်း မစ္စပန်နီမောဒန့်က သတိပေး တိုက်တွန်းသွားခဲ့သည်။
ဇွန် ၁၂ ရက်က ကရင်မလင်အစိုးရပိုင် မီဒီယာမှ မည်သူသည် ရုရှား၏ နံပါတ်တစ်ရန်သူ ဖြစ်မည်နည်း ဆိုသော မေးခွန်းဖြင့် INSOMAR အမည်ဖြင့် ဆန္ဒမဲကောက်ခံခဲ့ရာ ၃ နှစ်ကြာ ကျူးကျော်စစ်ဆင်နွှဲနေရသော ယူကရိန်းကို မဲပေးမှုသည် ၂၂ ရာခိုင်နှုန်းသာ ရှိကာ ပြင်သစ်က ၂၃၊ အမေရိကန်က ၂၄၊ ဂျာမနီ ၂၅ ရာခိုင်နှုန်း မဲပေးခဲ့ကြပြီး ဗြိတိန်ကို အမုန်းအများဆုံးအဖြစ် ၂၈ ရာခိုင်နှုန်း မဲပေးခဲ့ကြသဖြင့် ဗြိတိန်သည် ရုရှား၏ နံပါတ်တစ်ရန်သူဖြစ်လာခဲ့သည်။
ယင်းစစ်တမ်းထုတ်ပြန်မှု၌ ပူတင်အတွက် အဓိက ဝါဒဖြန့်သူ ဆိုလော့ဗ်ယော့ဗ်က စကော့တလန်ပြည်သူများ ကိုယ်ပိုင်လွတ်လပ်ခွင့်အတွက် တော်လှန်ကြရန်ပါ လှုံ့ဆော်တိုက်တွန်းသွားခဲ့သည်။
ရုရှားသမ္မတပူတင်သည် ယူကရိန်းကို အဓိက ကျောထောက်နောက်ခံပြုနေသော အနောက်အင်အားစု အဖွဲ့ဝင်များအနက် ဗြိတိန်ကို တိုက်ခိုက်တုံ့ပြန်နိုင်သည်ဟု မကြာခဏပြောဆိုလေ့ရှိရာ ယခုလည်း ယူကရိန်းစစ်ကာလ ၃ နှစ်ပြည့်သည့်တိုင် စစ်အင်အား အလုံးအရင်းထပ်ဖြည့်ပြီး တိုက်နေခြင်းဖြစ်ရာ ပူတင်၏ လောဘနှင့် ရည်မှန်းချက်မှာ ယူကရိန်းကိုအောင်နိုင်ခြင်းနှင့် မပြီးနိုင်ကြောင်း၊ ထို့ကြောင့် ဗြိတိန်အပါ ဥရောပနိုင်ငံများကို ဆက်လက်တိုက်ခိုက်လာဦးမည်မှာ သေချာသဖြင့် Hard Power ဖြင့် တုံ့ပြန်ခြင်းကသာ တားဆီးနိုင်ဖွယ်ရာ တစ်ခုတည်းသော နည်းလမ်းဖြစ်သည်ဟု ပန်နီမောဒန့်က သတိပေးတိုက်တွန်းသွားခဲ့ခြင်းဖြစ်သည်။
ယခုတစ်ပတ်အတွင်း ဗြိတိန်အတွက် အသုံးစားရိတ် ကြိုတင်သုံးသပ်မှုကို လော့ဒ်ရော်ဘတ်ဆန် ဦးဆောင်ကျင်းပခဲ့ရာ နေတိုးအဖွဲ့က နိုင်ငံ GDP ၏ ၃ ဒသမ ၅ ရာခိုင်နှုန်းကို စစ်ရေး ပြင်ဆင်တိုးချဲ့မှုအတွက် သုံးစွဲရေးအဆိုကို လိုက်လျောနိုင်ခြင်းမရှိသည့် အဖြေထွက်ခဲ့သဖြင့် GDP ၅ ရာခိုင်နှုန်း စစ်ရေးဘတ်ဂျက်သုံးရန် တိုက်တွန်းခဲ့သော ဒေါ်နယ်ထရမ့် တိုက်တွန်းမှုအတွက်လည်း လက်ခံနိုင်မည် မဟုတ်သည့် အနေအထားဖြစ်နေသည်။
ရုရှားကို ခုခံတွန်းလှန်ရန် ဘတ်ဂျက် ၁ ဒသမ ၅ ဘီလီယံ ရင်းနှီးမြှုပ်နှံမည့် အဆိုကိုလည်း လက်ရှိ ဝန်ကြီးချုပ် ကိုင်ရာစတာမာသည် အတည်ပြု အကောင်အထည်ဖော် နိုင်ခြင်းမရှိသေးသည့်အတွက် ရုရှားမှ တိုက်ခိုက်လာပါက ဗြိတိန်တွင် နိုင်ငံသားများ၏ သွေးများနှင့် အုတ်ဂူများ အသင်္ချေ ဖြစ်တည်လာလိမ့်မည်ဖြစ်ကာ အိပ်မက်မှ နိုးထချန်တန်ပြီဟု ပန်နီမောဒန့်က ပြတ်သားစွာ တိုက်တွန်းပြောဆိုသွားခဲ့သည်။
ကိုကလင်း
Ref: Thesun
#MeKongNews
#ဗြိတိန်
#စစ်အသုံးစရိတ်
#ရုရှား
#မစ္စပန်နီမောဒန့်
