မဲခေါင်၊ ဇွန် ၃
ယူကရိန်းစစ်ထောက်လှမ်းရေးအဖွဲ့ SUB မှ အထူလျှို့ဝှက်စစ်ဆင်ရေးအဖြစ် ၁၈ လ အချိန်ယူပြီး ရုရှား ပြည်တွင်း ပစ်မှတ်များ အနီးအထိ ယူကရိန်းထုတ် FPV ဒရုန်းအစင်းပေါင်း ၁၁၇ စင်းကို ကုန်တင်ကားများဖြင့် သယ်ဆောင်ကာ ရုရှားလေတပ်အခြေစိုက် စခန်းကြီး ၄ ခုကို တိုက်ခိုက်ရာ အနည်းဆုံး လေယာဉ် အစီး ၄၀ ပျက်စီးခဲ့ကြောင်း သိရှိရသည်။
ဇွန် ၁ ရက်နေ့တွင် ရုရှားလေတပ်၏ ဗုံးကြဲလေယာဉ်များပင်မလေဆိပ်ဖြစ်သော မာမန့်စ်ဒေသ အိုလီညာ လေတပ်စခန်း၊ ယူကရိန်းနယ်စပ်မှ မိုင် ၂၅၀၀ အကွာတွင်ရှိသော ဆိုက်ဘေးရေးယားရှိ အာကူတက်ခ်အိုဘလက်စ် လေတပ်စန်း၊ မော်စကို အနီး အီဗန်နိုဗိုနှင့်ဒီယက်ဟီလီဗို လေတပ်များကို တိုက်ခိုက်ခဲ့ခြင်းဖြစ်သည်။
ယူကရိန်း စစ်ထောက်လှမ်းရေးအဖွဲ့သည် FPV ဒရုန်းများကို ညစဉ် ညတိုင်း ယူကရိန်းနိုင်ငံ လေယာဉ်ကွင်းများတွင် ဉာဏ်ရည်တု (AI) စနစ် ထည့်သွင်းလေ့ကျင်ပြီး အနီး ကပ်မှာ ဒရုန်းများ အရှိန်ဖြင့် ပစ်မှတ်များကို အသေခံဒိုင်ဗင်ထိုး တိုက်ခိုက်တတ်ရန် လေ့ကျင့်ခိုင်းစေခဲ့ ကြောင်း၊ ဒရုန်းများကို သစ်သားကွန်တိန်နာ အိမ်များထဲ ထည့်သွင်းကာ ၏ပစ်မှတ် လေဆိပ်များ အနီး ကုန်ကားများမောင်းသွားပြီးမှ ယခုလို တိုက်ခိုက်ခြင်းဖြစ်သောကြောင့် လေကြောင်းရန်ကာကွယ် ရေးစနစ်လည်း မကာကွယ်နိုင်ဘဲ ရုရှားအတွက် ပျက်စီးဆုံးရှုံးမှု တန်ကြေး ဒေါ်လာ ၁ . ၅ ဘီလီယံ ရှိခဲ့ သည်ဟု ယူကရိန်းထောက်လှမ်းရေးဘက်မှ သုံးသပ်ထုတ်ပြန်ခဲ့သည်။
တိုက်ခိုက်မှုတွင် ကုန်ကားမောင်းသူတစ်ဦးကို ဖမ်းမိခဲ့ရာတွင် ၎င်းကိုယ်တိုင် ကွန်တိန်နာအတွင်း FPV ဒရုန်းများ ပါဝင်ကြောင်းမသိသလို ပစ်မှတ်ရောက်ချိန် အလိုအလျှောက် ဒရုန်းများ သစ်သားကွန်တိန် နားများမှ ပျံတက်ပြီး တိုက်ခိုက်ခြင်းဖြစ်သည်ဟု ဆိုသည်။
ပျက်စီးသွားသော ရုရှားလေယာဉ်များထဲတွင် ယူကရိန်းမြေပေါ် နေ့စဉ် ဗုံးကြဲနေသည့် တာဝေး ဗုံးကျဲလေယာဉ် Tu-22M3 များ၊ Tu-95 ဗုံးကျဲလေယာဉ်များ၊ တစ်စီး ပေါင်းသန်း ၂၆၀ တန် လေကြောင်းကြိုတင်သတိပေးခြင်းနှင့် ထိန်းချုပ်မှုစနစ် (AWACS) သုံး A-50 ကင်းထောက်လေယာဉ် များပါဝင်ပြီး ထိုမဟာဗျူဟာမြောက် လေယာဉ်များသည် ဆိုဗီယက်ပြိုကွဲပြီးနောက် ယခုအထိ ရုရှားတစ်စီမှ အသစ်ထပ်မံထုတ်လုပ်နိုင်ခြင်းမရှိသည့် လေယာဉ်များဖြစ်သည့်အတွက် ပူတင်အတွက် အဆိုးရွားဆုံး ရှုံးနိမ့်မှုကြီး ဖြစ်ခဲ့သည်။
ရုရှားလော်ဘီမီဒီယာများကိုယ်တိုင်ကပင် ရုရှား ပုလဲဆိပ်ကမ်း ဗုံးကြဲခံရခြင်းဟု ညည်းတွား သုံးသပ်ကြပြီး အကြမ်းဖက်တိုက်ခိုက်မှုဖြစ်သောကြောင့် နျူကလီးယား လက်နက်ဖြင့် တုံ့ပြန်ရမည်ဟု သွေးထိုးလှုံ့ဆော်နေကြသည်။
ယူကရိန်းသမ္မတ ဇီလန်းစကီးကမူ တန်ဖိုးနည်းလွန်းသော ဒရုန်းလေးများဖြင့် ယခုကဲ့သို့ ရုရှား နိုင်ငံ အတွင်းပိုင်း အဝေးဆုံးအကွာအဝေးအထိ တိကျစွာ တိုက်ခိုက်နိုင်မှုမှာ သမိုင်းတွင်သော ရလဒ်၊ တိကျ ထိရောက်ဆုံးသော တိုက်ခိုက်မှုဖြစ်ကာ ထို့အတွက် ၁ နှစ်၊ ၆ လ နှင့် ၉ ရက်ကြာ စီစဉ်မှု အောင်ပွဲဟု ကြုံးဝါး ထုတ်ပြန်သွားခဲ့သည်။
ကိုကလင်း
Ref:Thesun
#MeKongNews
#ရုရှား
#ယူကရိန်း
#FPVဒရုန်း
#ဗုံးကြဲလေယာဉ်
