မဲခေါင်၊ မေ ၂၉
ရှမ်းပြည်အရှေ့ပိုင်း၊ မိုင်းလားဒေသသို့ ရန်ကုန် နှင့် မန္တလေးတို့မှ ကုန်စည် ပို့ဆောင်ရာတွင် အလုံပိက် ကွန်တိန်နာစနစ်(E-lock) ဖြင့် ကုန်သွယ်နိုင်ရန် စစ်ကောင်စီက လုပ်ဆောင်နေကြောင်း လုပ်ငန်းရှင်များထံမှ သိရှိသည်။
ရန်ကုန်-မန္တလေး- တောင်ကြီး-ကျိုင်းတုံ-မိုင်းလား နယ်စပ် ကုန်သွယ်ရေး လုပ်ဆောင်ရာတွင် E-lock စနစ်သုံး ကုန်သေတ္တာတင် မော်တော်ယာဉ်များဖြင့် သွားလာရန် ကနဦး အဆင့်တစ် ကို လုပ်ဆောင်ခဲ့ပြီးနောက် အဆင့် ၂ကို အကောင်အထည်ဖော်ရန်အတွက် မေလ ၂၈ ရက်နေ့တွင် တောင်ကြီး-မန္တလေး၊ တောင်ကြီး-နေပြည်တော်-ရန်ကုန် စသည့် လမ်းကြောင်းများ၌ E-lock စနစ်ဆောင်ရွက်နိုင်ရန် စစ်ကောင်စီနှင့် လုပ်ငန်းရှင်များ တွေ့ဆုံ ဆွေးနွေးခဲ့သည်။
စစ်ကောင်စီအနေနှင့် ပေ၂၀ ရှည်သည့် ကွန်တိန်နာကားများဖြင့် ကုန်စည်ကို E-lock စနစ်ဖြင့် ပိတ်ကာ သယ်ယူပို့ဆောင်လိုနေခြင်း ဖြစ်သော်လည်း ပြည်တွင်းတွင် ကွန်တိန်နာကား ရှားပါးခြင်း၊ ကုန်တင်ယာဉ်အများစုမှာ ပေ ၄၀ ရှည်သည့် ကွန်တိန်နာများသာ တင်ဆောင်နိုင်ပြီး လက်ရှိ မိုင်းလားဒေသ လမ်းကြောင်းမှာ မိုးရွာသွန်းမှုကြောင့် မြေပြိုခြင်း၊ လမ်းကျဉ်းခြင်းတို့ကြောင့် သွားလာရန် လွယ်ကူမှု မရှိဟု ကုန်သည်များက ဆိုသည်။
“ဒီလမ်းက လက်ရှိ နိုင်ငံရေးအခြေအနေတွေကြောင့် သုံးနေကြရတာလေ။ ခရိုင်ချင်းဆက် လမ်းလေးတွေ အဆင်မပြေဘူး။ ဒီနှစ်က မိုးများတယ်။ မိုင်းလားကို သွားမယ့် လမ်းအခြေအနေက ကွန်တိန်နာကားတွေ သွားဖို့ အဆင်မပြေဘူး” ဟု ကုန်စည်ပို့ဆောင်ရေးလုပ်ငန်းရှင်တစ်ဦးက ဆိုသည်။
အလုံပိတ် ကွန်တိန်နာကားများ ရှားပါးသည့်အပြင် ပုပ်သိုးကုန်များကို မသယ်နိုင်ဘဲ သယ်ဆောင်နိုင်သည့် ကုန်စည်အမျိုးအစားမှာလည်း နည်းပါးသည့်အတွက် လုပ်ငန်းရှင်များ အဆင်မပြေ ဖြစ်နေသည်ဟု သိရသည်။
ပြည်တွင်းကုန်တင်ယာဉ်ကားအများစုမှာ အမိုးဖွင့်ထားသည့် ကားများသာ ဖြစ်ပြီး ကွန်တိန်နာပုံး တပ်ဆင်ထားသည့် ယာဉ်အများစုမှာ ပြည်တွင်း Logistics ကုမ္ပဏီတချို့တွင် ရှိသော်လည်း နိုင်ငံတဝှမ်း ကုန်စည်ပို့ဆောင်နိုင်ရန် လုံလောက်သည့် အခြေအနေတွင် ရှိမနေကြောင်း လုပ်ငန်းရှင်တစ်ဦးက ဆိုသည်။
E-lock စနစ်ဆိုသည်မှာ ကုန်စည်စတင်ပို့ဆောင်မည့်နေရာတွင် ကွန်တိန်နာပုံးအတွင်း တာဝန်ရှိသူများနှင့် စစ်ဆေးထည့်သွင်း အလုံပိက်ကာ ကုန်စည် ရယူမည့် နေရာရောက်မှ ဖွင့်ဖောက်သည့် စနစ်ဖြစ်ကာ လမ်းတလျှောက်တွင် ဖွင့်ဖောက်စစ်ဆေးရန် မလိုအပ်တော့ကြောင်း သိရှိရသည်။
စစ်ကောင်စီသည် ကနဦး စမ်းသပ်မှု အဆင့်တစ်ကို ယခုနှစ်ဆန်းပိုင်းတွင် စမ်းသပ်လုပ်ဆောင်ခဲ့ပြီး ကုန်တင်ယာဉ်များကို တောင်ကြီးမှ ရန်ကုန်အထိ အလုံပိတ်စနစ်ဖြင့် မောင်းနှင်ခဲ့ခြင်းဖြစ်ကြောင်း၊ အဆင့် ၂ အနေဖြင့် တောင်ကြီး-မန္တလေး၊ တောင်ကြီး-နေပြည်တော်-ရန်ကုန်၊ တောင်ကြီး-မိုင်းလား စသည့် လမ်းကြောင်းများတွင် ကျင့်သုံးရန် ရည်ရွယ်ထားခြင်းဖြစ်ကြောင်း လုပ်ငန်းရှင်များထံမှ သိရသည်။
ဖေသန်း
#MeKongNews
#မိုင်းလား
#ကုန်တင်ကား
#ကုန်သွယ်ရေး
#အလုံပိတ်ကွန်တင်နာ
