မဲခေါင်၊ မေ ၂၃
မြန်မာနိုင်ငံတွင် အမျိုးသမီးစုံတွဲများဖြင့် အပြာကားရိုက်ကူးကာ Live လွင့်ကာ အကျိုးအမြတ်ရှာခဲ့သည့် တရုတ်နိုင်ငံသား ၃ဦး အပါအဝင် လူလေးဦးကို အလုပ်နှင့်ထောင်ဒါဏ် နှစ် ၃၀ စီ ကျခံစေရန် အမိန့်ချမှတ်ခဲ့ကြောင်း စစ်ကောင်စီက မေလ ၂၃ရက်တွင် သတင်းထုတ်ပြန်ထားသည်။
မြန်မာနိုင်ငံတွင် ညစ်ညမ်း(အပြာ) ကားရိုက်ကူးထုတ်လွင့်မှုအတွက် ထောင်ဒါဏ် နှစ် ၃၀ ချမှတ်မှုသည် သမိုင်းတလျှောက် အမြင့်ဆုံး ထောင်ဒါဏ်ချမှတ်မှု ဖြစ်လာပြီး ၎င်းတို့ကို လူကုန်ကူးမှုတားဆီးနှိမ်နင်းရေး ဥပဒေအရ ထောင်ဒဏ်ချမှတ်ခြင်းဖြစ်ကြောင်း သိရသည်။
လှိုင်သာယာ(အနောက်ပိုင်း)မြို့နယ် အပြင် ပဒံကျေးရွာ ရွှေကမ်းသာယာအိမ်ရာ Block 84 ၊တိုက်အမှတ် ၅ တွင် တရုတ်နိုင်ငံသားများ ဖြစ်သည့် အသက် ၃၉နှစ်အရွယ် Mr.Wang Shaohua၊ အသက် ၃၇နှစ်အရွယ် Mr.Yung Kun၊ အသက် ၂၉နှစ်အရွယ် Mr.Zeng Yuan တို့နှင့် မြန်မာနိုင်ငံသားဖြစ်သည့် အသက် ၃၂နှစ်အရွယ် မအဲလစ်စ် (ခ) နော်မူးရှီးဖော (ခ) ကျဲကျဲ တို့က မြန်မာအမျိုးသမီး စုံတွဲ ၄တွဲတို့ လိင်ဖျော်ဖြေရေးဗီဒီယို ရိုက်ကူး Live လွင့်ကာ အကျိုးအမြတ်ရှာဖွေခဲ့ကြသည် ဟု ဆိုသည်။
ရရှိသည့် အကျိုးအမြတ်ကိုလည်း ခေါင်းပုံဖြတ်ရယူခဲ့ကြောင်း စိစစ်တွေ့ရှိခဲ့ရသဖြင့် လှိုင်သာယာ(အနောက်ပိုင်း) မြို့နယ် ရဲစခန်း (ပ)၈၇၆/၂၀၂၄၊ လူကုန်ကူးမှုတားဆီးနှိမ်နင်းရေးဥပဒေ ပုဒ်မ ၃၈ (က)(ခ) တို့ဖြင့် အမှုရေးဖွင့် တရားစွဲခဲ့ပြီး အင်းစိန်ခရိုင်တရားရုံးမှ ၂၀၂၅ ခုနှစ် မေလ ၂၀ ရက်နေ့တွင် တရားခံ ၄ဦးကို လူကုန်ကူးမှုတားဆီးနှိမ်နင်းရေးဥပဒေ ပုဒ်မ ၃၈ (က) အရအလုပ်နှင့် ထောင်ဒါဏ် နှစ် ၂၀ စီ၊ လူကုန်ကူးမှုတားဆီးနှိမ်နင်းရေးဥပဒေ ပုဒ်မ ၃၈ (ခ) အရ အလုပ်နှင့် ထောင်ဒါဏ် ၁၀ နှစ်စီကျခံစေရန် အမိန့်ချမှတ်ခဲ့ခြင်းဖြစ်သည်။
ထို့အတူ အပြာကားရိုက်ကူးကာ Live လွင့်ထုတ် အကျိုးအမြတ်ရှာသည့် ဖြစ်စဉ်တွင် ပါဝင်နေသူ တစ်ဦး ဖြစ်သည့် တိမ်းရှောင် တရားခံ မ သူသူရှိန်ကိုလည်း ရာဇာဝတ်ကျင့်ထုံး ဥပဒေ ပုဒ်မ ၈၇/၈၈ အတည်ပြုထုတ်ဆင့်ခဲ့သည်။
လူသတ်မှု ၃၀၂ (၁)အတွက် ပြစ်ဒါဏ်ပင်လျှင် ထောင်ဒါဏ် ၁၀ နှစ်၊ မူးယစ်ဆေးဝါးရောင်းဝယ်မှုအတွက် အမြင့်ဆုံး ထောင်ဒါဏ် နှစ် ၂၀ ချမှတ်နေချိန် ညစ်ညမ်းဗီဒီယို ရိုက်ကူးထုတ်လွင့်ရောင်းချမှုအတွက် ထောင်ဒါဏ် နှစ် ၃၀ ချမှတ်မှုသည် အမြင့်ဆုံး ပြစ်ဒါဏ် ချမှတ်မှုဟု ဆိုနိုင်သည်။
ဖေသန်း
#MeKongNews
#တရုတ်နိုင်ငံသား
#လူကုန်ကူး
#လိင်ဖျော်ဖြေရေးဗီဒီယို
#အင်းစိန်ခရိုင်တရားရုံး
