မဲခေါင်၊ မေ ၂၀
ထိုင်းနိုင်ငံတွင် အထက်လွှတ်တော် ရွေးကောက်ပွဲကျင်းပခဲ့ရာ၌ ငွေကြေးခဝါချပြီး မဲလိမ်၊ မဲဝယ်မသမာမှု စွပ်စွဲချက်များကြောင့် စစ်တပ်က အာဏာထပ်သိမ်းမည်ကို ကြောက်ရွံ့နေရပြီဟု ရှပ်နီခေါင်းဆောင်ဟောင်းလည်းဖြစ်၊ အာဏာရှင်စနစ်ဆန့်ကျင်ရေး ဒီမိုကရေစီညီညွတ်ရေးတပ်ဦး – UDD ဥက္ကဌဟောင်း မစ္စတီဒါတာဝန်ဆိသ်က မေ ၁၉ ရက်တွင် ထုတ်ပြန်ပြောဆိုသည်။
ယခင် ထိုင်းစစ်တပ်က ရွေးကောက်မခံရဘဲ အသင့်ခန့်ထားသည့် ကိုယ်စားလှယ်များသာ ကြီးစိုးထားသော ထိုင်းအထက်လွှတ်တော်သည် ပြီးခဲ့သည့်နှစ် ဇွန်လက နောက်ဆုံး မဲပေးရွေးချယ်မှုတွင် အမတ် ၉၂ ယောက်အထိ ငွေကြေးခဝါချခြင်းနှင့် တရာမဝင်မဲဝယ်၊ မဲမသမာမှုများလုပ်ဆောင်ခဲ့ကြောင်း အခိုင်အမာစွပ်စွဲမှုများ ထွက်ပေါ်လာခဲ့ပြီဖြစ်သည်။
ထိုပြဿနာကို အထက်လွှတ်တော်ကိုယ်စားလှယ်များဘက်က တရားရေးဝန်ကြီးနှင့် ကာကွယ်ရေးဝန်ကြီး ၂ ယောက်စလုံးက မဲလိမ်မှုများလုပ်ဆောင်ရန် ဦးဆောင်စီစဉ်ခဲ့သည်ဟု တုံ့ပြန် ထုတ်ပြန်ခဲ့ကြသော်လည်း အထူးစုံစမ်းစစ်ဆေးရေးဌာန (DSI) အကြီးအကဲကို မကြာသေးမီရက်ပိုင်းက ရာထူးမှ အနားပေးပြီး ကာကွယ်ရေးဝန်ကြီး ဖမ်သမ်က ယာယီတာဝန်ယူထားသည့် အနေအထားသို့ ရောက်ရှိကုန်သည်။
ထိုအခြေအနေများနှင့်ပတ်သက်ပြီး မစ္စတီဒါတာဝန်ဆိသ်က ရွေးကောက်ပွဲကော်မရှင်သည် ယခုအမှုကို အလုံးစုံပေါ်ပေါက်သည်အထိ စစ်ဆေးဖော်ထုတ်နိုင်ရန် အထူးလိုအပ်ကြောင်း၊ အတိတ်က ခြေလှမ်းအမှားများစွာကို ရွေးကောက်ပွဲကော်မရှင်က လုပ်ခဲ့သော်လည်း ယခု နိုင်ငံရေးအကျပ်အတည်း ဖြစ်ပွားလာမှုအား မဖော်ထုတ်နိုင်ပါက အစဉ်အလာအတိုင်း ထိုင်းစစ်တပ်မှ စစ်အာဏာပြန်သိမ်းမည့် အဖြစ်သို့ ဆိုက်ရောက်ဦးမည်သာဖြစ်ကာ ယခုတစ်ကြိမ် စစ်အာဏာသိမ်းလျှင် ကျရှုံးနိုင်ငံ (failed state) ဆိုသည်ထက် ပိုဆိုးသော အဖတ်ဆယ်မရသည့် နိုင်ငံဖြစ်သွားတော့မည်ဟု သတိပေး ပြောဆိုသွားခဲ့သည်။
လက်ရှိတွင်ပင် ဒုတိယမဲအများဆုံးသာရရှိပြီး အစိုးရဖွဲ့ခွင့်ရခဲ့သော ဖွေထိုင်းပါတီနှင့် မဟာမိတ်ပါတီများ ပူးပေါင်းပြီး အစိုးရအဖွဲ့ဖွဲ့စည်းထားသော်လည်း ဖွေထိုင်းနှင့် ဘန်ဂျိုင်ထိုင်း ပါတီတို့အကြား အကွဲအပြဲဇာတ်လမ်း ဖြစ်ပွားနေပြီဖြစ်ကြောင်း၊ ထိုင်းတွင် စစ်တပ်သည် နိုင်ငံရေးနှင့် ဒီမိုကရေစီရေးကို ရှင်းလင်းနေသည့် အဖွဲ့သာဖြစ်သောကြောင့် အထက်လွှတ်တော်အမတ်များသည်လည်း ဖွဲ့စည်းပုံ အခြေခံဥပဒေခုံရုံးအပါ လွတ်လပ်သော အရပ်ဘက်အေဂျင်စီများကိုပါ ထိန်းချုပ်နိုင်စွမ်းရှိသည့် နိုင်ငံရေးအာဏာကို အလိုရှိနေကြခြင်းထက် အမျိုးသားအကျိုးစီးပွားကို ပိုကြည့်ကြရန် လိုကြောင်း၊ ဖွေထိုင်းပါတီ၏ ပြဿနာမှာ လက်ရှိ ဝန်ကြီးချုပ်ပေထောင်တန်၏ ဖခင် ဝန်ကြီးချုပ်ဟောင်း သက်ဆင်ကို အကာအကွယ်ပေးနိုင်ရေးအတွက်သာ အရေးအကြီးဆုံးအဖြစ် မှတ်ယူထားပြီး ထို့ကြောင့်ပင် စစ်တပ် ပတ်သတ်ထားသော ကိစ္စရပ်တချို့၌ တာဝန်ယူဖြေရှင်းနိုင်ခြင်း မရှိဖြစ်နေရကြောင်း၊ သက်ဆင် အနေဖြင့် သတ်မှတ် ပြစ်ဒဏ်ကျခံပေးလိုက်လျှင်လည်း ရှပ်နီအဖွဲ့ဝင်များ၊ လူငယ်တက်ကြွလှုပ်ရှားသူများ ကျခံပေးဆပ်ရသည့် ထောင်ဒဏ်များကဲ့သလို့ ပြင်းထန်စွာ ခံရရန် မရှိသည့်အတွက် ကြောက်ရွံ့မနေဘဲ ထောင်ကျခံလိုက်ခြင်းက ပိုကောင်းခဲ့မည်ဖြစ်ကြောင်း၊ ထောင်တွင်းနေရမည်ကို ကြောက်ပြီး ထောင်အကျဉ်းထောင်တွင် ဆေးမကုဘဲ ပြင်ပထွက် ဆေးကုသမှုကို ဖန်တီးခဲ့ခြင်းက ဖွေထိုင်းပါတီအတွက် အားနည်းချက် ဖြစ်စေခဲ့သည်ဟု မစ္စတီဒါ တာဝန်ဆိသ်က ရှင်းလင်း ပြောကြားသွားခဲ့သည်။
ကိုကလင်း
Ref:Bangkokpost
#MeKongNews
#ထိုင်းနိုင်ငံ
#စစ်တပ်အာဏာသိမ်း
#ကျရှုံးနိုင်ငံ
#ဖွေထိုင်းပါတီ
