မဲခေါင်၊ မေ ၁၅
ကရင်ပြည်နယ်၊ ဖားအံခရိုင်အတွင်းရှိ တညာကျိုး(ခ)တာလယ် ဗျုဟာစခန်းကို KNU က ပြန်လည်သိမ်းပိုက်ခဲ့ပြီး စစ်ကောင်စီအမြောက်တပ်မှ ဗိုလ်ကြီးတစ်ဦးအပါအဝင် စစ်ကောင်စီတပ်သား ၉ ဦး သေဆုံးခဲ့ကြောင်း မေလ ၁၅ ရက်တွင် သတင်းထုတ်ပြန်သည်။
နှစ်ပေါင်း ၃၆ နှစ်ကြာ စစ်ကောင်စီ အခြေစိုက်ခဲ့သည့် တညာကျိုး(ခ)တာလယ် ဗျုဟာစခန်းကို KNU – ကရင့်အမျိုးသားအစည်းအရုံး၊ တပ်မဟာ (၇) လက်အောက်ခံ တပ်ဖွဲ့က သိမ်းပိုက်ခဲ့ခြင်း ဖြစ်သည်။
ကော်သူးလေအုပ်ချုပ်နယ်မြေ၊ ဖားအံခရိုင်၊ တာကရယ်(ပိုင်ကျုံ) မြို့နယ်၊ ကာတဲကျေးရွာအနီး ဝင်ရောက်ကျူးကျော်တပ်စွဲထားသော စစ်ကောင်စီ တပ် ခလရ−၂၄ နှင့် အမြောက်တပ် အမတ−၃၁၁တို့ အခြေစိုက်သည့် တညာကျိုး(ခ) တာလယ်ဗျုဟာစခန်းကို ၂၀၂၅ ခုနှစ် မေလ ၁၃ ရက်နေ့ ည ၇နာရီ အချိန်တွင် တပ်မဟာ (၇) လက်အောက်ခံ ကရင်အမျိုးသား လွတ်မြောက်ရေးတပ်မတော်(K.N.L.A)၊ ကရင်အမျိုးသားကာကွယ်ရေးတပ်(K.N.D.O) မှ ပြန်လည် တိုက်ခိုက် သိမ်းပိုက်နိုင်ခဲ့ခြင်းဖြစ်သည်ဟု သတင်းထုတ်ပြန်ထားသည်။
စခန်းသိမ်းပိုက်စဉ်အတွင်း စစ်ကောင်စီအမြောက်တပ်မှ ဗိုလ်ကြီးတစ်ဦးအပါအဝင် စစ်ကောင်စီတပ်သား ၉ ဦး သေဆုံးခဲ့ပြီး ခလရ−၂၄ ဒုတပ်ရင်းမှူးမှာမူ ထွက်ပြေးလွတ်မြောက်လျက်ရှိပြီး ထွက်ပြေးသွားသည့်စစ်ကောင်စီတပ်သားများကို လိုက်လံ ဖမ်းဆီး လျက်ရှိကြောင်း KNU က ဖော်ပြထားသည်။
တညာကျိုး(တာလယ်) စခန်းကို ၁၉၈၉ ခုနှစ်တွင် မြန်မာစစ်တပ်မှ စတင်တည်ဆောက်ခဲ့ပြီး ၎င်းတို့ စတင်တည်ဆောက်သည့် အချိန်မှစပြီး အနီးဝန်းကျင်ရှိ ကျေးရွာများမှ ပြည်သူလူထုများအနေဖြင့် လွတ်လပ်စွာ သွားလာလုပ်ကိုင် ရှာဖွေစားသောက်ခွင့်များ ဆုံးရှုံးခဲ့ရပြီး ၂၀၂၅ ခုနှစ် မေလ ၁၃ ရက်နေ့ကျမှသာ ပြန်လည် သိမ်းပိုက်နိုင်ခဲ့ခြင်း ဖြစ်သည်။
ထုတ်ပြန်ထားသည့် ဓါတ်ပုံများအရ စစ်ကောင်စီလက်အောက်ခံ အဖွဲ့ဝင်တို့ထံမှ လက်နတ်ခဲယမ်းအများအပြားကိုလည်း ရရှိခဲ့သည်ကို တွေ့ရှိရသည်။
၎င်းစခန်းအား ပြန်လည် သိမ်းပိုက်နိုင်ခဲ့သည့်အတွက် အနီးအနားရှိကျေးရွာများအနေဖြင့် မူလအခြေအနေများအတိုင်း ပြန်လည် လုပ်ကိုင်ရှာဖွေစားသောက် နိုင်တော့မည် ဟု KNU က ထုတ်ပြန်ထားသည်။
Source – KNU
#MeKongNews
#ကရင်ပြည်နယ်
#တာလယ်ဗျူဟာစခန်း
#KNLA
#KNDO
