မဲခေါင်၊ မေ ၁၁
ထိုင်းနိုင်ငံတွင် မေ ၄ ရက်မှ ၈ ရက်အတွင်းမှာပင် ကူးစက်မှု ၇၀၁၃ ဦးအထိ ကူးစက်မှုဆတိုးပွားများလာသဖြင့် မိုးဦးကျကျောင်းဖွင့်ချိန် အထူးသတိပြုကာကွယ်ကြရန် ထိုင်းရောဂါထိန်းချုပ်ရေးဌာန DDC က မေ ၉ ရက်တွင် သတိပေးထုတ်ပြန်သည်။
၂၀၂၅ ခုနှစ်အတွင်း ကိုဗစ် – ၁၉ ကူးစက်ပြန့်ပွားမှု စိုးရိမ်ဖွယ်ရာ ပြန်လည်မြင့်တက်လာပြီး ဇန်နဝါရီ ၁ ရက်မှ မေ ၈ ရက်အထိ ၄၁၁၉၇ ဦး ရောဂါပိုးတွေ့ရှိကာ ၁၅ ဦးသေဆုံးကြောင်း၊ မေ ၄ ရက်မှ ၈ ရက်အတွင်း ကူးစက်ခံရမှု ၇၀၁၃ ခုတွင် အများဆုံး ကူးစက်ခံရသည့် သက်တမ်းအလိုက်အုပ်စုမှာ မွေးစမှ ၄ နှစ်အရွယ်အုပ်စုတွင်ဖြစ်ကာ ၎င်းနောက် ၃၀ မှ ၃၉ နှစ်၊ ၂၀ မှ ၂၉ နှစ်ကြား အုပ်စုတွင် ကူးစက်မှု အစဉ်လိုက်အများဆုံးဖြစ်သည်ဟု ဆိုသည်။
ဇန်နဝါရီ ၁ ရက်မှ မေလ ၈ ရက်အတွင်း တုပ်ကွေးရောဂါ ဖြစ်ပွားမှု ၃၂၂,၉၉၁ မှုရှိပြီး သေဆုံးသူ ၄၃ ဦးရှိကာ လူတစ်သိန်းလျှင် ၄၉၇ ဒသမ ၅၈ ဦးနှုန်း ဖျားနာမှုဖြစ်ပွားခဲ့သည်။
ဆုန်ကရန် သင်္ကြန်ကာလအတွင်း လူစုလူဝေးများခဲ့သဖြင့် ကိုဗစ် – ၁၉ ကူးစက်မှု မြင့်မားခဲ့သေးသော်လည်း ပြန်လည်ကျဆင်း သွားပြီး ကျဆင်းမှုမှာ ရည်မှန်းထားသည့် ၅ နှစ်စီမံကိန်းလျာထားချက်ထက် များစွာပိုနေသေးသည်ဟု DDC က ဆိုသည်။
ကိုဗစ်-၁၉ ဗိုင်းရပ်စ်သည် ရာသီအကူးအပြောင်းကာလဖြစ်သောကြောင့် ကျရောက်လာတော့မည့် မိုးဦးကျချိန်၊ စာသင်ကျောင်းများ ပြန်လည်ဖွင့်လှစ်မည့်အချိန်တွင် ကပ်ဘေး ပမာဏအထိ ဆိုးရွားစွာ ကူးစက်မည်ကို စိုးရိမ်ရကြောင်း၊ ထို့ကြောင့် ထိုကာလများတွင် နေအိမ်များ၌ သက်ကြီး ထိရှလွယ် အသက်အရွယ်အုပ်စု၊ ရောဂါရှိသူအုပ်စုများထံ မကူးစက်စေရေး အထူးသတိပြု ကာကွယ်ရန်လိုအပ်ကြောင်း DDC မှ ညွှန်ကြားရေးမှူးချုပ် ဒေါက်တာ ပနုမက်စ် ရန်ဝေ့ဆာကူက သတိပေး ထုတ်ပြန်ခဲ့သည်။
ကိုကလင်း
Ref:The Nation Thailand
Photo – Unicef Thailand
#MeKongNews
#ကိုဗစ်၁၉
#ကျောင်းဖွင့်ချိန်
#ရောဂါထိန်းချုပ်ရေးဌာန
#ထိုင်းနိုင်ငံ
