မဲခေါင်၊ မေ ၇
ရှမ်းပြည်အရှေ့ပိုင်း၊ ကျိုင်းတုံမြို့တွင် ဆိုင်ကယ်သူခိုးများ ခိုးယူထားသည့် ဆိုင်ကယ် ၃စီးကို ထပ်မံဖော်ထုတ်သိမ်းဆီးရမိကြောင်း ကျိုင်းတုံခရိုင်ရဲရုံးမှ သိရသည်။
ထပ်မံသိမ်းဆည်းရမိသည့် ဆိုင်ကယ် ၃စီးမှာ Honda wave i 110 အနီရောင် 2023 Model တစ်စီး၊ Honda wave i 110 အပြာရောင် 2025 Model တစ်စီး၊ Honda wave i 110 နက် /စိမ်းရောင် 2025 Model တစ်စီး ဖြစ်ပြီး ဆိုင်ကယ်ပျောက်သူများအနေဖြင့် ခရိုင်ရဲရုံးတွင် လာရောက်စုံစမ်းနိုင်ကြောင်း သိရသည်။
မေလ ၅ရက်က ဖမ်းဆီးရမိထားသူ ၆ဦးကို စစ်ဆေးချက်အရ ထပ်မံသိမ်းဆည်းရမိခြင်းဖြစ်ပြီး မေလ ၇ရက်အထိ ပြန်လည်သိမ်းဆည်းရမိသည့် ဆိုင်ကယ် ၁၀ စီးရှိပြီဖြစ်ကြောင်း၊ ဆိုင်ကယ်ခိုးယူသူများထဲတွင် လွတ်ငြိမ်းချမ်းသာခွင့်ဖြင့် အကျဉ်းထောင်များမှ ပြန်လွတ်လာသည့် ဝါရင့်သူခိုးများလည်း ပါဝင်ကြောင်း ခရိုင်ရဲရုံးနှင့်နီးစပ်သူတစ်ဦးက မဲခေါင်ကို ပြောသည်။
“ခိုးယူလုယက်ကျူးလွန်တာ ၃ အုပ်စု ရှိမယ်။ ပြီးခဲ့တဲ့ လွတ်ငြိမ်းထဲမှာ သူခိုးအကြီးစားတွေ ပါလာတယ် ယူဆတယ်။ သူတို့က ဖောက်ထွင်းတာ ကပ်တာ(Cutter)တွေနဲ့ ဖြတ်ပြီး ခိုးယူတာ၊ နောက်ထပ်က လုယက်တာ၊ အလစ်သုတ်တာပေါ့။ ခုကအလစ်သုတ်ထားတာတွေ”ဟု ၎င်းက ပြောသည်။
ထပ်မံသိမ်းဆည်းရမိသည့် ဆိုင်ကယ်များကို ကျိုင်းတုံခရိုင်ရဲရုံးရှေ့ရှိ တန်းစီကွင်းတွင် ရိုက်ကူးဖော် ပြကြောင်း သိရသည်။
“ဆိုင်ကယ်ကို GPS တပ်ထားရင် ပျောက်တာနဲ့လိုက်လို့လွယ်တယ်။ ချက်စီကို ရိုက်ထား မှတ်ထားရင်လည်း အတည်ပြုရတာ သေချာတာပေါ့။ မြို့ပြင်ဘက်ရွာတွေကျတော့ နယ်မြေအခြေအနေအရ အကန့်သတ်တွေရှိနေတော့ ဥပဒေအရ ကျင့်သုံးဖို့ လိုအပ်ပါတယ်”ဟု ခရိုင်ရဲရုံးနှင့် နီးစပ်သည့် သတင်းရင်းမြစ်က အကြံပြုသည်။
ပြီးခဲ့သည့်ရက်ပိုင်းက ကျိုင်းတုံ၊ မိုင်းပန်လည်အုပ်စုတွင် ဖမ်းမိသည့် ဆိုင်ကယ်သူခိုးများကို အုပ်ချုပ်ရေးကငွေယူပြီး ပြန်လွှတ်ပေးခဲ့သည့် လုပ်ရပ်မျိုးသည် ရာဇဝတ််မှုများ ထပ်မံကျူးလွန်ရန်အားပေးနေရာ ရောက်သည့်အပြင် ပြည်သူကိုကိုယ် စားမပြုသည့် လုပ်ရပ်ဖြစ်သည် ဝေဖန်ကြသည်။
ကျိုင်းတုံမြို့တွင် ညအချိန် အိမ်အတွင်းဖောက် ထွင်းဝင်ရောက်ပြီး ဆိုင်ကယ်၃စီး ခိုးယူခံရမှု၊ နေ့ခင်းကြောင်တောင်အစောင့်ရှိသည့်ကြားက ဆေးရုံအပ်ထားသည့်နေရာမှ ဆိုင်ကယ်ခိုးယူခံရမှုများအပြင် ကျောင်းကြိုမိဘများ၊ မြို့ရှောင်လမ်းသွားသူများထံမှ အကြမ်းဖက်ကာ ဆိုင်ကယ်လုယူမှုများ ဖြစ်ပွားလျက်ရှိသည်။
#MeKongNews
#ကျိုင်းတုံ
#ဆိုင်ကယ်ခိုးမှု
#လွတ်ငြိမ်းချမ်းသာခွင့်
#မိုင်းပန်လည်အုပ်စု
