မဲခေါင်၊ မေ ၆
ရှမ်း-ကရင်နီနယ်စပ်၊ မိုးဗြဲမြို့တွင် ကယန်းအမျိုးသားတပ်မတော် – KNA 2109 တပ်ရင်မှ ရဲဘော််ခွန်းဖိဒေးလစ် မေလ ၄ ရက် မိုးဗြဲတိုက်ပွဲအတွင်း ကျဆုံးကြောင်း ကယန်းအမျိုးသားတပ်မတော်က သတင်းထုတ်ပြန်သည်။
အသက် ၁၉ နှစ်အရွယ် ရဲဘော်ခွန်းဖိဒေးလစ်သည် ကယန်းအမျိုးသားတပ်မတော်တွင် တာဝန်ထမ်းဆောင်သည်မှာ အချိန်ကာလ အနည်းငယ်သာရှိသေးပြီး တိုက်ပွဲတွင်း စစ်ကောင်စီတပ်၏ ကျည်ထိမှန်ကျဆုံးခဲ့ခြင်း ဖြစ်သည်။
“ရဲဘော်ကတော့ဝင်တာမကြာသေးဘူး။ အတွေ့အကြုံအရတော့ နည်းနည်းပါးပါး တာဝန်ယူထားရတဲ့ အပိုင်းတွေရှိတာပေါ့နော်၊ ရာထူးကတော့ တပ်သားအဆင့်ပါ။ အသက်တော့ ၁၈ ကျော်ပဲရှိသေးတယ်”ဟု ကယန်းအမျိုးသားတပ်မတော် ပြောခွင့်ရပုဂ္ဂိုလ် ခွန်တောင်ကြီးက မဲခေါင်ကိုပြောသည်။
မိုးဗြဲတွင် စစ်ကောင်စီတပ်နှင့် တော်လှန်ရေးပူးပေါင်းတပ်များအကြား တိုက်ပွဲပြင်းထန်နေပြီး တော်လှန်ရေးတပ်များမှ နေရာအချို့လက်လွှတ်ပေးလိုက်ရသည့်အတွက် ပြန်လည်ရရှိရန်ကြိုးစားနေကြောင်း ခွန်တောင်ကြီးက ပြောသည်။
မိုးဗြဲမြို့အား စစ်ကောင်စီမှရရှိသွားခဲ့လျှင် ပြည်ထောင်စုလမ်းမကြီးနှင့်နန်းမယ်ခုံမြို့တဝိုက် စိုးရိမ်စရာအခြေအနေရှိလာနိုင်ပြီး လွိုင်ကော်အထိ စစ်ရေးချိန်းခြောက်နိုင်ကြောင်း ၎င်းက ပြောသည်။
လက်ရှိတွင် တော်လှန်ရေးတပ်များ ရင်ဆိုင်ထားသော ကာကင်း ၂ခုခန့်နှင့် မြို့အဝင်တို့ကို လက်လွှတ်ပေးခဲ့ရသော်လည်း စစ်ကောင်စီမှ စစ်ရေးအရ ချိန်းခြောက်နိုင်ခြင်း မရှိသေးကြောင်း တော်လှန်ရေးတပ်များမှ တတ်နိုင်သမျှကာထားကြောင်း မိုးဗြဲမြို့တွင်ရှိနေသည့် မြို့ပြတော်လှန်ရေးတပ်ဦးမှ တာဝန်ခံ ကိုထက်က မဲခေါင်ကိုပြောသည်။
ပြီးခဲ့သည့် ဧပြီလ ၂၇ ရက်တွင်လည်း စစ်ကောင်စီ၏ မိုးဗြဲရှိ ခမရ ၄၂၂ တပ်မှ အင်အား ၁၀၀ ကျော်ဖြင့် ထိုးစစ်ဆင်လာသောကြောင့် ပြည်သူ့ကာကွယ်ရေးတပ်များနှင့် တိုက်ပွဲဖြစ်ပွားခဲ့ပြီး မိုးဗြဲတပ်ရင်း(၁) P3-1001တပ်ရင်းမှ ရဲဘော်တစ်ဦးကျဆုံးခဲ့ပြီး စစ်ကောင်စီလက်နက်ကြီးကြောင့် ဒေသခံတစ်ဦးသေဆုံးခဲ့သည်။
တိုက်ပွဲများ ဆက်လက်ဖြစ်ပွါးနေသည့်အတွက် ပြည်သူများအနေဖြင့် မိုးဗြဲမြို့ဘက်ကို ဖြတ်သန်းသွားလာလိုပါက မြေပြင်အခြေနေစုံစမ်းပြီးမှ သွားလာစေလိုကြောင်း ရှမ်းတောင်စစ်ဒေသခွဲ၊ PDF ဗျူဟာအမှတ် (၁) သတင်းပြန်ကြားရေးဌာနမှ သတင်းထုတ်ပြန်ထားသည်။
မိုးဗြဲမြို့ကို ၁၁၁၁ စစ်ဆင်ရေးမှစတင်ကာ တော်လှန်ရေးတပ်များက ထိုးစစ်ဆင်တိုက်ခိုက်ခဲ့သော်လည်း သိမ်းပိုက်နိုင်ခြင်းမရှိသေးဘဲ ပြီးခဲ့သည့်နှစ် ဧပြီလဝန်းကျင်တွင် တကျော့ပြန်ထိုးစစ်များ ပြန်လည်စတင်ခဲ့ပြီး ယနေ့အထိ နေ့စဉ်ဆိုသလိုတိုက်ပွဲများဖြစ်ပွားနေသည်။
ဂနိုက်
#MeKongNews
#မိုးဗြဲတိုက်ပွဲ
#KNA
#ခမရ၄၂၂
#၁၁၁၁စစ်ဆင်ရေး
