မဲခေါင်၊ မေ ၅
ထိုင်းနိုင်ငံနယ်စပ်၊ လာအိုနိုင်ငံမြောက်ပိုင်း၊ ဘော်ကီယိုခရိုင်ရှိ လာအိုစစ်အခြေစိုက်စခန်းများကို လက်နက်ကိုင်တပ်ဖွဲ့များက ဝင်ရောက်စီးနင်းရာ အနည်းဆုံးလာအိုစစ်သား ၅ဦးသေဆုံးပြီး အရပ်သားများ ပိတ်မိနေကြောင်း သိရသည်။
တိုက်ခိုက်မှုများ ဖြစ်ပွားရာနေရာမှာ ထိုင်းနိုင်ငံ၊ ချင်းရိုင်ခရိုင်၊ ဝိန်းကန်ခရိုင်ခွဲနှင့် မျက်နှာချင်းဆိုင်ဘက်အခြမ်းတွင် တည်ရှိပြီး မေလ ၃ရက် ညနေပိုင်းမှ စတင်ကာ ဝင်ရောက်စီးနင်းမှုများ ဖြစ်ပွားခဲ့ခြင်းဖြစ်ကြောင်း၊ လာအိုနိုင်ငံ၊ ဖက်သခရိုင်၊ ဖူဖာမွန်နှင့် ကျိုင်းတောင်းအရပ်ရှိ စစ်စခန်း ၄ခုအနက် ၃ခု စီးနင်းခံရကြောင်း၊ တိုက်ခိုက်သူများသည် လက်နက်ကြီးများ တပ်ဆင်ထားပြီး စနစ်တကျလေ့ကျင့်ထားသူများဖြစ်ကာ စစ်ကူများမလာရောက်နိုင်စေရန်အတွက် ဥမင်များလည်း တူးထားကြောင်း ထိုင်းသတင်းတွင် ဖော်ပြသည်။
ဒဏ်ရာရသူများကို ကယ်ထုတ်ရန် လာအိုစစ်တပ်က ကြိုးစားသော်လည်း ပစ်ခတ်မှုများဖြင့် ကြုံရပြီး တိုက်ပွဲဖြစ်ပွားရာနေရာသို့ သွားရောက်ရန်ကြိုးပမ်းသည့် အကြီးတန်းအရာရှိတစ်ဦးမှာလည်း တိုက်ခိုက်ခံရပြီး သေဆုံးကြောင်း သိရသည်။
အခင်းဖြစ်ပွားရာနေရာတွင် ၇နှစ်အရွယ် မိန်းကလေးငယ်တစ်လည်း ပိတ်မိနေပြီး အရပ်သားများလုံခြုံရေးအတွက် စိုးရိမ်စရာ အခြေအနေရှိကြောင်း သိရသည်။
ဖက်သခရိုင်အတွင်းရှိ ဟွေဆနန်၊ လမ်းပင်းနှင့် ဟက်စကဲ့သို့ ကျေးရွာများသို့ သယ်ယူပို့ဆောင်ရေးလမ်းကြောင်းများလည်း ဖြတ်တောက်ခံထားရပြီး အရပ်သားများလည်း ထွက်ခွင့်မရကြောင်း၊ မရှိမဖြစ်ကုန်ပစ္စည်းများလည်း ပို့ဆောင်၍မရသည့်အတွက် စိုးရိမ်ကြောက်ရွံ့မှုများ မြင့်တက်နေကြောင်း ဒေသခံများကပြောသည်။
တိုက်ခိုက်မှု၏ နောက်ကွယ်မှ အကြောင်းအရင်းမှာ လာအိုနိုင်ငံ၊ ကျိုင်းတောင်းအရပ်တွင် မကြာသေးမီက စိတ်ကြွဆေးပြား သန်း ၂၀ ဖမ်းဆီးခံရသည့် ဖြစ်စဉ်နှင့် ဆက်စပ်နေကြောင်း သုံးသပ်ကြသည်။ တိုက်ခိုက်မှုတွင် တိုင်းရင်းသားပြည်သူ့စစ်များနှင့် ဆက်စပ်နေသည့် နိုင်ငံဖြတ်ကျော်မူးယစ်ရာဇဝတ်ဂိုဏ်များ ပါဝင်နေသည်ဟု လေ့လာသူများက သုံးသပ်သည်။
ထောက်လှမ်းရေးအစီရင်ခံစာများက တိုက်ခိုက်မှုတွင် နိုင်ငံတကာနောက်ခံရှိသည်ဟု သံသယရှိရသော မုန်းတိုက်ခိုက်ရေးသမားများ ပါဝင်သည်ဟု ဖော်ပြနေသည်။
ထိုင်းနိုင်ငံဘက်ကမှု အရေးပေါ်အနေဖြင့် တိုက်ခိုက်ရေးတပ်ဖွဲ့ အမှတ် ၃၁၀၄ ကို နယ်စပ်တစ်လျှောက်တွင် တပ်ဖြန့်ချထားကြောင်း သိရသည်။
တိုက်ခိုက်မှုများကြောင့် ထိုင်နိုင်ငံဘက်ရှိ ကျေးရွာများသို့ ကျည်ဆံများ ကျရောက်လာကြောင်း သိရသဖြင့် ဖာဘွန်နှင့် ဖူချိဒေါင်ဒေသများတွင် ထိုင်းလုံခြုံရေးတပ်ဖွဲ့များ ကင်းလှည့်နေပြီး မဲခေါင်မြစ်တလျှောက်တွင်လည်း ထိုင်းရေတပ်က ကင်းလှည်နေသည်။
တိုက်ပွဲများဖြစ်ပွားရာဒေသမှာ ထိုင်း၊ မြန်မာ၊ လာအို ၃နိုင်ငံဆုံရာ ရွှေတြိဂံဒေသနှင့် မလှမ်းမကမ်းတွင် တည်ရှိပြီး မဲခေါင်မြစ်ကြောင်းဘေးတွင်ဖြစ်သည်။ လာအိုနိုင်ငံ၊ ဘော်ကီယိုခရိုင်တွင် ဧပြီလ ၂၁ရက် ညနေပိုင်းက စိတ်ကြွေဆေးပြား သန်း ၂၀ ကို ဖမ်းဆီးရမိခြင်းဖြစ်သည်။
Source – TransborderNews
#MeKongNews
#လာအိုနိုင်ငံ
#ဘော်ကီယိုခရိုင်
#စစ်အခြေစိုက်စခန်း
#စီးနင်း
#မူးယစ်ဆေးဝါး
