မဲခေါင်၊ ဧပြီ ၁၁
အမေရိကန်သမ္မတ ဒေါ်နယ်ထရမ့်က လာမည့် စနေနေ့(ဧပြီ ၁၂ ရက်) တွင် အိုမန်၌ အီရန်တာဝန်ရှိသူများနှင့် အီရန်၏ နျူကလီးယားပရိုဂရမ်အရေး ဆွေးနွေးပွဲကျင်းပမည်ဖြစ်ကာ ထိုဆွေးနွေးပွဲတွင် အီရန် ကို နျူကလီးယားပိုင်နိုင်ငံ ဖြစ်မလာစေရဟု အဆိုပြုထားပြီး ဆွေးနွေးမှု ပျက်ပြားလျှင် အီရန်ကို စစ်ရေးအရ အရှေ့အလယ်ပိုင်းဒေသ၏ တစ်ခုတည်းသော ဂျူးနိုင်ငံ အစ္စရေးက ဦးဆောင် တိုက်ခိုက်သူ ဖြစ်လာမည်ဟု အိမ်ဖြူတော် ဘဲဥပုံရုံးခန်းအတွင်း ထုတ်ပြန်ကြေညာ သတိပေးခဲ့သည်။
လွန်ခဲ့သည့် ၂ ရက်ကပင် အိမ်ဖြူတော်၌ ဒေါ်နယ်ထရမ့်နှင့် အစ္စရေးဝန်ကြီးချုပ် နက်တန်ယာဟုတို့ နှစ်ဦးအတူ ရှိနေခဲ့ပြီးနောက် ဧပြီ ၉ ရက်တွင် ဒေါ်နယ်ထရမ့်က ယခုလို အီရန်ကို နျူကလီးယား လက်နက်ပိုင်နိုင်ငံမဖြစ်ရေး အပြတ်ချေမှုန်းမည်ဟု ခြိမ်းခြောက်ခဲ့ခြင်းလည်းဖြစ်သည်။
ကနဦးရှင်းလင်းမှုတွင် ထရမ့်က “သဘောတူညီမှုမရရင် စစ်ရေးအရ အီရန်ကို ဦးဆောင်တိုက်ခိုက်မှာ က အစ္စရေးဖြစ်မှာပါ။ ကျွန်တော်တို့လည်း ပူးပေါင်းပါဝင်မှာပါ” ဟုပြောဆိုခဲ့သည်။
မကြာမီမှာပင် ထရမ့်က မိမိတို့ကို မည်သူကမျှ ဦးဆောင်ခွင့်ရမည်မဟုတ်ဘဲ အစ္စရေးသည် အဆိုပါဒေသ ပဋိပက္ခတွင် အဓိက အခန်းကဏ္ဍမှ ရှိနေသူဖြစ်သောကြောင့် ယခုလို အစ္စရေးဦးဆောင်တိုက်ခိုက်မည်ဟုသာ ပြောခဲ့ခြင်းဖြစ်ကြောင်း၊ အီရန်နိုင်ငံသားများသည် အလွန်တော်ပြီး ကောင်းမွန်ကြသော်လည်း အာဏာရှင်၏ ရက်စက်ကြမ်းတမ်းသော အုပ်စိုးမှုကြောင့် အဓွန့်ရှည်သော နိုင်ငံအဖြစ် တိုးတက်သည်ကိုသာ မြင်ချင်ကြောင်း၊ ထို့ကြောင့် နျူကလီးယားလက်နက်ကို လုံး၀ ပိုင်ဆိုင်ခွင့်ပြုနိုင်မည်မဟုတ်ကြောင်းနှင့် မိမိတို့နိုင်ငံ စစ်တပ်ကိုယ်တိုင် လိုအပ်လာလျှင် အီရန်ကို တိုက်ခိုက်သွားမည်ဖြစ်ကြောင်း ပြင်းထန်စွာသတိပေးသွားခဲ့ခြင်းဖြစ်သည်။
ထိုဆွေးနွေးပွဲမတိုင်မီမှာပင် အမေရိကန်သည် မဟာဗျူဟာ B2 ဗုံးကျဲလေယာဉ်ကြီးကို အရှေ့အလယ် ပိုင်းဒေသသို့ ပို့ဆောင်ထားနှင့်မည်ဖြစ်ကြောင်းလည်း သိရကာ ထရမ့်ဘက်က နျူကလီးယားမပိုင်ရေး အဆိုတင်သွင်းမှုကို အချိန် သိပ်မပေးနိုင်ဘဲ ၂ လအတွင်း အီရန်ကို တိုက်ရမည်လား၊ အဆိုကို လက်ခံမည်လား အဖြေထုတ်မည်ဟု သတိပေးထားကြောင်းလည်း သိရသည်။
ကိုကလင်း
Ref: timesofisrael
#MeKongNews
#အစ္စရေး
#အမေရိကန်
#အီရန်
#နျူကလီးယား
