မဲခေါင်၊ ဧပြီ ၆
ငလျင်ဒဏ်ကြောင့် မန္တလေးရှိ အိုးဘိုအကျဥ်းထောင်တွင်း ကျဆုံးခဲ့သည့် နိုင်ငံရေးအကျဥ်းသူ ၆ ဦး၏ အမည်စာရင်းကို မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် – PPNM မှ ဧပြီလ ၅ ရက်တွင် အသိပေးထုတ်ပြန်သည်။
မတ်လ ၂၈ ရက်နေ့တွင် လှုပ်ခတ်ခဲ့သည့်ငလျင်ကြောင့် အိုးဘိုထောင်ရှိ အမျိုးသမီးအဆောင် (၁) နှင့် အဆောင် (၂) တို့ ပြိုကျခဲ့သည့်အတွက် ယင်းအဆောင်များတွင် မတရားဖမ်းဆီးအကျဉ်းချခံထားရသည့် နိုင်ငံရေးအကျဉ်းသူများထဲမှ မမိုးသူဇာခိုင်၊ ဒေါ်လဲ့လဲ့စိုး၊ ဒေါ်ခင်အုန်းရွှေ၊ မကေကေဝင်း၊ မပပဝင်း နှင့် မဖူးဝေဝေ တို့ အသက်ဆုံးရှုံးခဲ့ကြောင်း PPNM အနေဖြင့် စုံစမ်းအတည်ပြု သိရှိထားသည်ဟု ဆိုသည်။
ငလျင်ကြောင့် အိုးဘိုထောင်တွင် အနည်းဆုံး လူ ၁၂ ဦး သေဆုံးမှုရှိကြောင်း သတင်းအချက်အလက်ရရှိမှု အပေါ်မှုတည်၍ PPNM အနေဖြင့် စုံစမ်းအတည်ပြုခဲ့ရာ အထက်ဖော်ပြပါ နိုင်ငံရေးအကျဉ်းသူ (၆)ဦး ပါဝင်ခဲ့ကြောင်းသိရှိရသည်ဟု ထုတ်ပြန်ချက်တွင်ပါရှိသည်။
“ကျဆုံးသွားသူတွေရဲ့ သက်ဆိုင်ရာမိသားစုဝင်တွေ သင်္ဂြိုလ်ခွင့်မရဘူးလို့ သိရပါတယ်။ ဖုန်းလိုင်းတွေ ပျက်နေတဲ့အချိန် အရေးပေါ်သင်္ဂြိုလ်တာတွေ သိခွင့်တောင်မရကြပါဘူး” ဟု PPNM မှ ဦးသိုက်ထွန်းဦးက မဲခေါင်ကို ပြောသည်။
ငလျင်ကြောင့် ပြင်းထန်သည့်ထိခိုက်ဒဏ်ရာကြောင့် စိုးရိမ်ရသူ နိုင်ကျဥ်း ၉ ဦးရှိပြီး ဆေးရုံတက်ရန်လိုအပ်သူ ၄၀ ကျော်ရှိကြောင်း PPNM ၏ ထုတ်ပြန်ချက်တွင်ပါရှိသည်။
အချို့ထိခိုက်ဒဏ်ရာများသည် အကျဉ်းထောင်များတွင် ကုသရန်မလွယ်ကူ၍ ပြင်ပဆေးရုံသို့ ပို့ဆောင်ရန် လိုအပ်လျှက်ရှိသော်လည်း ကုသခွင့်မရပဲ ယနေ့အချိန်ထိ ကန့်သတ်ခံထားရသူများစွာရှိသည်ဟု PPNM ထံမှ သိရသည်။
“ခြေကျိုး၊ လက်ကျိုး၊ ခေါင်းပေါက်သူတွေ ရှိတယ်။ အသက်ရှင်သန်နေဆဲ မသေဆုံးနိုင်ဘူးလို့ ယူဆခံထားရတဲ့သူတွေမှာတော့ ဆေးကုသခွင့်ရဖို့ တောင်းဆိုနေရဆဲ ဖြစ်ပါတယ်” ဟု ဦးသိုက်ထွန်းဦးက ဒဏ်ရာရသူများ၏ အခြေအနေကို ရှင်းပြသည်။
ထို့အပြင် ထိခိုက်ဒဏ်ရာရရှိသူများမှာ မိသားစုဝင်များနှင့် ဆက်သွယ်တွေ့ဆုံခွင့်မရသည့် အခြေအနေများလည်း ရင်ဆိုင်ကြုံတွေ့နေကြကြောင်း၊ စစ်ကောင်စီ၏ အကျဉ်းဦးစီးဌာနအနေဖြင့် ၎င်းတို့ဘက်ကို အာရုံစိုက်လာမည် စိုးရိမ်သည့်အတွက် သေဆုံးသူနှင့် ဒဏ်ရာရသူစာရင်းကို တရားဝင်မထုတ်ပြန်ဘဲ ဖုံးကွယ်ထားခြင်းဖြစ်ကြောင်း၊ ထိုသို့ဖုံးကွယ်ထားခြင်း မပြုဘဲ ပွင့်လင်းစွာ ထုတ်ပြန်ပေးရန်လိုအပ်ကြောင်း ဦးသိုက်ထွန်းဦးက တောင်းဆိုသည်။
လက်ရှိ အကျဉ်းထောင်များတွင် ဆေးဝါးလိုအပ်ချက် များစွာရှိနေပြီး အရက်ပြန်၊ ဂွမ်း၊ အနာကျက်ဆေးရည်၊ ပတ်တီး စသည့် ဆေးဝါးပစ္စည်းများ လိုအပ်လျှက်ရှိကြောင်း သိရသည်။
မဟာ
#MeKongNews
#အိုးဘိုထောင်
#စစ်ကိုင်းငလျင်
#PPNM
#နိုင်ငံရေးအကျဉ်းသား
မှတ်ချက် – ပုံဟောင်း
