မဲခေါင်၊ မတ် ၂၁
ကျိုင်းတုံမြို့နယ်၊ ပန်လော့(အထက်)ရွာ နတ်စင်ကွေ့အနီးတွင် မတ်လ ၂၀ ရက် ညပိုင်းက ကုန်ကားတစ်စီး ချောက်ထဲကျသဖြင့် တစ်ဦးသေဆုံးပြီး ၃ ဦး ဒဏ်ရာရရှိကြောင်း ကူညီကယ်ဆယ်သူများထံမှ သိရသည်။
ရှမ်းပြည်အရှေ့ပိုင်း၊ ကျိုင်းတုံမြို့နယ်၊ မိုင်းဇင်းအုပ်စု၊ ပန်လော့(အထက်)ရွာ နတ်စင်ကွေ့၊ မိုင်တိုင် အမှတ်(၄၀၃/၇)နှင့် (၄၀၄/၀)ကြားတွင် မတ်လ ၂၀ ရက်နေ့ ည ၆ နာရီခွဲခန့်တွင် ကုန်ကားတစ်စီး ချောက်ထဲကျတိမ်းမှောက်ခြင်းဖြစ်ပြီး ယာဉ်ပေါ်ပါ အမျိုးသား ၄ ဦး အနက် ၃ ဦး စိုးရိမ်ရဒဏ်ရာများ ရရှိကာ တစ်ဦးသေဆုံးကြောင်း၊ နှလုံးလှ လူမှုကူညီရေးအသင်းနှင့် တိုင်းနေ လူမှုကူညီရေး အသင်းတို့မှ သူနာတင်ယာဉ်များဖြင့် ကျိုင်းတုံမြို့နယ် ပြည်သူ့ဆေးရုံကြီးသို့ ပို့ဆောင်ပေးခဲ့ကြောင်း မီးသတ်ဌာနမှ ယနေ့ မတ်လ ၂၁ ရက်နေ့ နံနက်ပိုင်းတွင် ထုတ်ပြန်သည်။
သေဆုံးသူမှာ ယာဥ်မောင်းဖြစ်ပြီး အခင်းဖြစ်စဥ်အတွင်း ပွဲချင်းပြီးသေဆုံးကာ ကျန်သူများအနက် ကားအတွင်းညပ်နေသည့် ယာဥ်အကူကို အောက်စီဂျင်ပေးပြီး ယနေ့ မတ်လ ၂၁ ရက်၊ မနက် ၃ နာရီအထိ ကူညီကယ်ဆယ်ခဲ့ရသည်ဟု ကျိုင်းတုံကြက်ခြေနီတပ်ဖွဲ့ဝင်တစ်ဦးက ပြောသည်။
“ကားအောက်ပိနေတဲ့ ယာဉ်အကူကို အောက်ဆီဂျင်ပေးပြီး ကရိန်းနဲ့မထုတ်ပြီးတဲ့အထိ အသက်ရှင်အောင် စုပေါင်းကူညီပေးနိုင်ခဲ့တယ်”ဟု ၎င်းကဆိုသည်။
ယင်းနေရာသည် နှစ်စဥ်လို မကြာခဏ ယာဉ်တိမ်းမှောက်မှု၊ ချောက်ထဲကျမှုများ ဖြစ်ပွားလေ့ရှိသည့်အတွက် လမ်းကို Safety နှင့် ပြန်လည်ပြုပြင် ဖောက်လုပ်သင့်ကြောင်း ကျိုင်းတုံမြို့နေအင်ဂျင်နီယာတစ်ဦးက ပြောသည်။
ပြီးခဲ့သည့် ၂၀၂၄ ခုနှစ်၊ ဇူလိုင်လ ၁၅ ရက်ကလည်း ယင်းမိုင်းဇင်းအုပ်စု၊ ပန်လော့(အထက်)ကျေးရွာအနီး၊ ကျိုင်းတုံ-တာချီလတ်ပြည်ထောင်စုလမ်းမကြီး၊ မိုင်တိုင်အမှတ်(၁၁/၄)နှင့်(၁၁/၅)ကြားတွင် Nissan ဒီဇယ် ၁၂ ဘီးယာဉ်နှင့် Toyota Succeed ယာဉ်တို့ တိုက်မိပြီး မီးလောင်သွားသည့် Succeed ယာဉ်ပေါ်မှ အမျိုးသား ၄ ဦး၊ အမျိုးသမီး ၂ ဦး ၆ ဦးသေဆုံးပြီး ၁၂ ဘီးယာဉ်မှ အမျိုးသား ၂ ဦး ထိခိုက်ဒဏ်ရာများ ရရှိခဲ့သေးသည်။
မဟာ
#MeKongNews
#ကျိုင်းတုံ
#ပန်လော့ရွာ
#ယာဉ်တိမ်းမှောက်
#ကြက်ခြေနီ
