မဲခေါင်၊ မတ်၁၄
ရှမ်းပြည်မြောက်ပိုင်းရှိ စစ်ကောင်စီနှင့် UWSA ပူးတွဲထိန်းချုပ်နေသည့် တန့်ယန်းမြို့နယ်၊ နားဟုတ် ကျေးရွာအုပ်စုအနီးတွင် ကျားဖြန့်လုပ်ကိုင်သူ နိုင်ငံခြားသား ၁၆၅ ဦးနှင့် မြန်မာ တစ်ဦးတို့အား မတ် ၁၂ ရက်တွင် ဖမ်းမိခဲ့ကြောင်း စစ်ကောင်စီက ယနေ့ မတ်လ ၁၄ ရက်တွင် သတင်းထုတ်ပြန်သည်။
စစ်ကောင်စီ၏ ထုတ်ပြန်ချက်တွင် မည်သည့်နိုင်ငံသားဖြစ်သည်ဟု မဖော်ပြထားသော်လည်း ဒေသခံများကမူ တရုတ်နိုင်ငံသား အများစုဖြစ်ကြောင်းပြောသည်။ စစ်ကောင်စီထုတ်ပြန်ချက်တွင် ဖမ်းဆီးရမိသူများနှင့်အတူ လုပ်ငန်းအသုံးပြု StarLink ၂ စုံ၊ ဖုန်းနှင့် ကွန်ပြူတာများ၊ အဆောက်အဦများ၊ ပရိဘောဂများကို သိမ်းဆည်းရရှိခဲ့ကြောင်း ဖော်ပြထားသည်။
ပြီးခဲ့သည့် မတ်လ ၉ ရက်က မြန်မာနိုင်ငံမြောက်ပိုင်း တရုတ်နယ်စပ်ရှိ ကျားဖြန့်ငွေလိမ်ဂိုဏ်းများကို အပြီးသတ်ရှင်းလင်းနိုင်ပြီဟု ဘေဂျင်းမြို့တော်တွင် ပြုလုပ်သည့် သတင်းစာရှင်းပွဲ၌ တရုတ်နိုင်ငံခြားရေးဝန်ကြီး Wang Yi က ပြောကြားခဲ့သော်လည်း ရှမ်းပြည်မြောက်ပိုင်းရှိ စစ်ကောင်စီထိန်းချုပ်သည့် မူဆယ်တွင် ကျားဖြန့်များ အများအပြားရှိနေဆဲဖြစ်ကြောင်း ဒေသခံများက ပြောကြားခဲ့သည့်သတင်း မဲခေါင်က ဖော်ပြခဲ့ပြီးနောက် ယခု ရှမ်းမြောက်ရှိ တန့်ယန်းတွင် ကျားဖြန့်များ ထပ်မံ ဖမ်းမိခဲ့ခြင်း ဖြစ်သည်။
ရှမ်းမြောက်တွင် ကျားဖြန့်လုပ်ငန်းများကို နှိမ်နင်းစဉ်က ကျားဖြန့်များမှာ တန့်ယန်း၊ မိုင်းရယ်ဘက်မှ အတွင်းပိုင်း မိုင်းကိုင်၊ လဲချားဘက်အထိ ပြောင်းရွှေ့ခဲ့သည့်အတွက် တရုတ်အစိုးရ ထုတ်ပြန်သကဲ့သို့ ကျားဖြန့်များ အပြီးသတ်ရှင်းလင်းနိုင်ပြီဆိုသည့်အချက်မှာ မှန်ကန်မှုမရှိကြောင်း စစ်ရေးလေ့လာသူတစ်ဦးက ပြောသည်။
“စစ်တပ်ရှိရင် ကျားဖြန့်ရှိတယ်။ ရမခတိုင်းမှူး၊ တန့်ယန်း၊ မိုင်းရယ် ဗျူဟာမှူးတွေ ဖမ်းခံထားရတာ မကြာသေးဘူးဆိုတော့ နောက်လူတွေက ဖမ်းပြမှ ဖြစ်မှာ၊ အဖမ်းပြတာပေါ့လေ” ဟု ၎င်းက ဆိုသည်။
တရုတ်နိုင်ငံဘက်မှ တန့်ယန်းနှင့် မိုင်းရယ်ဘက်သို့ပြောင်းရွှေ့သွားသည့် ကျားဖြန့်လုပ်ငန်းအချို့၏ လူစာရင်းအတိအကျနှင့် နေရာအတိအကျကို မြန်မာစစ်တပ်ဘက်သို့ပေးပြီး ဖမ်းဆီးခိုင်းသော်လည်း ဖမ်းဆီးနိုင်ခြင်းမရှိသည့်အတွက် ဖေဖော်ဝါရီလအတွင်းက ရမခစစ်တိုင်းမှူး၊ မိုင်းရယ်ဗျူဟာမှူး၊ တန့်ယန်းဗျူဟာမှူးတို့ကို စစ်ကောင်စီက ကိုယ်တိုင်ဖမ်းဆီးခဲ့ခြင်း ဖြစ်သည်။
ပြီးခဲ့သည့် ၂၀၂၄ ခုနှစ်၊ ဇူလိုင်လအတွင်း UWSA တပ်ဖွဲ့များ တန့်ယန်းမြို့အတွင်း ဝင်ရောက်နေရာယူပြီးနောက် နိုဝင်ဘာလ၌ ကျားဖြန့်လုပ်ကိုင်သူ တစ်ထောင်ကျော်အား ပထမဆုံးအကြိမ် ဖမ်းဆီးခဲ့ပြီး ၎င်းတို့ထဲမှ တရုတ်နိုင်ငံသား ၇၆၀ ကျော်ကို တရုတ်နိုင်ငံသို့ ပြန်လည်လွှဲပြောင်းပေးခဲ့သည်။
မဟာ
#MeKongNews
#ကျားဖြန့်
#တန့်ယန်း
#စစ်ကောင်စီ
#တရုတ်နိုင်ငံသား
